1065. කාමාවචරධර්‍මයෝ යැ, කාමාවචර නො වූ ධර්‍මයෝ යැ, රූපාවචරධර්‍මයෝ යැ, රූපාවචර නො වූ ධර්‍මයෝ යැ, අරූපාවචරධර්‍මයෝ යැ, අරූපාවචර නො වූ ධර්‍මයෝ යැ, පරියාපන්නධර්‍මයෝ යැ, අපරියාපන්නධර්‍මයෝ යි.
1066. කාමාවචරධර්‍මයෝ කවරහ යත්: යටින් අවීචිනිරය හිම් කොට උඩින් පරනිර්මිතවශවර්ති දෙවියන් ඇතුළු කොට මේ අතරැ මෙහි හැසිරෙන මෙහි ඇතුළු වූ යම් ස්කන්‍ධ කෙනෙක් ධාතු - ආයතන - රූප - වේදනා - සංඥා - සංස්කාර කෙනෙක් විඥානයෙක් වේ ද මේ ධර්‍මයෝ කාමාවචරයෝ යි.
1067. කාමාවචර නො වූ ධර්‍මයෝ කවරහ යත්: රූපාවචරයෝ යැ, අරූපාවචරයෝ යැ, අපර්‍ය්‍යාපන්නයෝ යි. මොහු කාමාවචර නො වූ ධර්‍මයෝ යි.
1068. රූපාවචරධර්‍මයෝ කවරහ යත්: යටින් බඹලොව පිරියත් කොට උඩින් අකනිටාදෙවියන් ඇතුළු කොට මේ අතරැ මෙහි හැසිරෙන මෙහි ඇතුළු වූ සමාපන්නයාගේ හෝ උපන්නහුගේ හෝ ඉහාත්මයෙහි සුඛවිහරණ ඇත්තහුගේ හෝ යම් චිත්තචෛතසිකධර්‍ම කෙනෙක් වෙත් ද, මේ ධර්‍මයෝ රූපාවචරයෝ යි.
1069. රූපාවචර නො වූ ධර්‍මයෝ කවරහ යත්: කාමාවචරයෝ යැ, අරූපාවචරයෝ යැ, අපර්‍ය්‍යාපන්නයෝ යි. මොහු රූපාවචර නො වූ ධර්‍මයෝ යි.
1070. අරූපාවචරධර්‍මයෝ කවරහ යත්: යටින් ආකාසානඤ්චායතනූපග දෙවියන් පිරියත් කොට උඩින් නේවසඤ්ඤානාසඤ්ඤායතනූපග දෙවියන් ඇතුළු කොට මේ අතරැ මෙහි හැසිරෙන මෙහි ඇතුළු වැ සිටි සමාපන්නයාගේ හෝ උපපන්නයාගේ හෝ දිට්ඨධම්මසුඛවිහාර ඇත්තහුගේ හෝ යම් චිත්තචෛතසිකධර්‍ම කෙනෙක් වෙත් ද, මේ ධර්‍මයෝ අරූපාවචරයෝ යි.
1071. අරූපාවචර නො වූ ධර්‍මයෝ කවරහ යත්: කාමාවචරයෝ යැ, රූපාවචරයෝ යැ, අපර්‍ය්‍යාපන්නයෝ යැ යන මේ ධර්‍මයෝ අරූපාවචර නො වෙත්.
1072. වට්ටපරියාපන්න ධර්‍මයෝ කවරහ යත්: සාස්‍රව වූ කාමාවචර රූපාවචර අරූපාවචර කුශල අකුශල අව්‍යාකෘත ධර්‍මයෝ යැ, රූපස්කන්‍ධ යැ, වේදනාස්කන්‍ධ යැ, සංඥාස්කන්‍ධ යැ, සංස්කාරස්කන්‍ධ යැ, විඥානස්කන්‍ධ යැ යන මේ ධර්‍මයෝ (භව වශයෙන් අවකාශ වශයෙන් පිරිසිඳුනාලද) පරියාපන්නයෝ වෙත්.
1073. අපරියාපන්න ධර්‍මයෝ කවරහ යත්: සතර මාර්‍ගයෝ ද, මාර්‍ගඵලයෝ ද, අසඞ්ඛතධාතු ද යන මේ ධර්‍මයෝ (භවාදී විසින්) අපරියාපන්නයෝ වෙත්.
6.
1074. දේවා යනු: දෙවියෝ තුන්දෙනෙකි. සම්මුතිදෙවියෝ යැ, උත්පත්තිදෙවියෝ යැ, විශුද්ධිදෙවියෝ යි. සම්මුතිදෙවියෝ නම්: අභිෂේක ලත් රජවරු යැ, රාජදේවීහු යැ, රාජකුමාරයෝ යි. උත්පත්තිදෙවියෝ නම්: සිවුමහරජයෙහි දෙවියන් පටන් කොට එයින් මතුයෙහි දෙවියෝ යැ. විශුද්ධිදෙවියෝ නම්: රහත්හු යි.
1075. දන් දී සිල් සමාදන් වැ පෙහෙවස්කම් කොට කොහි උපදී ද යත්:
දන් දී සිල් සමාදන් වැ පෙහෙවස්කම් කොට ඇතැම් කෙනෙක් ගෘහපතිමහාසාරයන්ගේ සහභාවයට පැමිණෙති. ඇතැම් කෙනෙක් බ්‍රාහ්මණමහාසාරයන්ගේ සහභාවයට පැමිණෙති. ඇතැම් කෙනෙක් ක්‍ෂත්‍රිය මහාසාරයන්ගේ සහභාවයට පැමිණෙත්. ඇතැම් කෙනෙක් චාතුම්මහාරාජිකදෙවියන්ගේ සහභාවයට පැමිණෙති. ඇතැම් කෙනෙක් තාවතිංසදෙවියන්ගේ සහභාවයට පැමිණෙති. ඇතැම් කෙනෙක් යාමදෙවියන්ගේ සහභාවයට පැමිණෙති. ඇතැම් කෙනෙක් තුසිතදෙවියන්ගේ සහභාවයට පැමිණෙති. ඇතැම් කෙනෙක් නිම්මාණරතීදෙවියන්ගේ සහභාවයට පැමිණෙති. ඇතැම් කෙනෙක් පරනිම්මිතවසවත්තීදෙවියන්ගේ සහභාවයට පැමිණෙත්.