21. 5.
බුද්ධ කථා
[ඒ ඒ කාලයෙහි ශරීර ආයු ප්‍රභා ප්‍රමාණ නානාත්‍වය මිස සෙසු බුදුදහමින් බුදුවරුන්ගේ බුදුවරුන් කෙරෙන් හීනාතිරෙක බවෙක් නම් නැත. බුදුවරුන් කෙරෙහි අවශේෂයෙන් හීනාතිරෙකතා ඇතැයි අන්‍ධක නිකායවාසීන් සෙයින් ලබ්ධි ගත්තවුන්ගේ වාද බිඳුනට ‘බුද්ධ කථා’ එයි.]
1. ස. පු: බුදුවරුන්ගේ බුදුවරුන් කෙරෙන් හීනාතිරෙකතා ඇද් ද?
ප. පටිඤ්‍ඤා: එසේ යැ.
ස. අනු: සතිපට්ඨාන හෙයින් ද?
ප. පටි: එසේ නො කියැයුතු යැ ...
ස. අනු: සම්‍යක්ප්‍රධාන හෙයින් වේ ද ... ඍද්ධිපාද හෙයින් ... ඉන්‍ද්‍රිය හෙයින් … බල හෙයින් … බෝධ්‍යඞ්ග හෙයින් ... වශීභාව හෙයින් … සර්‍වඥඥානදර්‍ශන හෙයින් වේ ද?
ප. පටි: එසේ නො කියැයුතු යැ ...
බුද්ධ කථා නිමි.
21. 6.
සබ්බදිසා කථා
[‘හැම දික්හි බුදුවරු සිටිති’ යි මහාසාංඝිකනිකායවාසීන් සෙයින් ලබ්ධි ගත්තාහු ඇත. උන්ගේ වාද බිඳුනට ‘සබ්බදිසා කථා’ එයි.]
1. ස. පු: හැම දික්හි බුදුවරු සිටිත් ද?
ප. පටිඤ්‍ඤා: එසේ යැ.
ස. අනු: පෙරදිග බුදුහු සිටිත් ද?
ප. පටි: එසේ නො කියැයුතු යැ ...
2. ස. පු: පෙරදිගැ බුදුහු සිටිත් ද?
ප. පටිඤ්‍ඤා: එසේ යැ.
ස. අනු: ඒ බුදුහු කිනම්හ. කවර ජාති ඇතියහ. කවර ගෝත්‍ර ඇතියහ. ඒ බුදුන්ගේ මාපියෝ කිනම්හ. ඒ බුදුන්ගේ ශ්‍රාවකයුගය කිනම් ඇතියේ යැ. ඒ බුදුන්ගේ උපස්ථායක කවරෙ යැ. ඒ බුදුහු කෙබඳු සිවුරු දරත් ද, කෙබඳු පාත්‍ර ධරත් ද, කවර ගමෙක හෝ නියම්ගමෙක හෝ නුවරෙක හෝ රටෙක හෝ ජනපදයෙක හෝ සිටිත් ද?
ප. පටි: එසේ නො කියැයුතු යැ ...
ස. අනු: දකුණුදිගැ ... පැළදිගැ … උතුරුදිගැ … යටදිගැ බුදුහු සිටිත් ද?
ප. පටි: එසේ නො කියැයුතු යැ ...
3. ස. පු: යට දෙස බුදුහු සිටිත් ද?
ප. පටිඤ්‍ඤා: එසේ යැ.
ස. අනු: ඒ බුදුහු කිනම්හ … කිනම් දනවියෙකැ හෝ සිටිත් ද?
ප. පටි: එසේ නො කියැයුතු යැ ...
ස. අනු: උඩ දෙස බුදුහු සිටිත් ද?
ප. පටි: එසේ නො කියැයුතු යැ …
4. ස. පු: උඩ දෙස බුදුහු සිටිත් ද?
ප. පටිඤ්‍ඤා: එසේ යැ.
ස. අනු: සිවුමහරදයෙහි සිටිත් ද, … තව්තිසැ සිටිත් ද, ... යාම දෙව්ලොවැ සිටිත් ද, … තුසීපුර සිටිත් ද, ... නිර්‍මාණරති දෙව්ලොවැ සිටිත් ද, පරනිර්මිත වශවර්ති දෙව්ලොවැ සිටිත් ද ... බඹලොවැ සිටිත් ද?
ප. පටි: එසේ නො කියැයුතු යැ ...
සබ්බදිසා කථා නිමි.