1. ස. පු: සඤ්ඤාවේදයිතනිරෝධසමාපත්තිය අසඤ්ඤසත්තූපික (අසංඥාසත්ත්‍වොත්පත්ති පිණිස) වේ ද?

ප. පටිඤ්‍ඤා: එසේ යැ.

ස. අනු: සඤ්ඤාවේදයිතනිරෝධසමවත් සමවන්නහුට අලෝභකුසලමූලය, අදොසකුසලමූලය, අමෝහකුසලමූලය, ශ්‍රද්ධා වීර්‍ය්‍ය ස්මෘති සමාධි ප්‍රඥා ඇද්ද?

ප. පටි: එසේ නො කියැයුතු යැ ...

2. ස. පු: සඤ්ඤාවේදයිතනිරෝධසමවත් සමවන්නහුට අලෝභකුසලමූලය අදොසකුසලමූලය අමෝහකුසලමූලය ශ්‍රද්ධා ... ප්‍රඥා නැද්ද?

ප. පටිඤ්‍ඤා: එසේ යැ.

ස. ඨ: ඉදින් සඤ්ඤාවේදයිතනිරෝධසමවත් සමවන්නහුට අලෝභකුසලමූලය අදොසකුසලමූලය අමෝහකුසලමූලය ශ්‍රද්ධා වීර්‍ය්‍ය ස්‍මෘති සමාධි ප්‍රඥා නැත් නම්,

ස. පා: භවත ‘සඤ්ඤාවේදයිතනිරෝධසමාපත්තිය අසඤ්ඤසත්තූපිකා යැ’ යනු නො කියැයුතු මැ යැ.

3. ස. පු: සඤ්ඤාවේදයිතනිරෝධසමාපත්තිය අසඤ්ඤසත්තූපිකා වේ ද?

ප. පටිඤ්‍ඤා: එසේ යැ.

ස. අනු: සඤ්ඤාවේදයිතනිරෝධසමවත් සමවන්නහුට ස්‍පර්‍ශ වේදනා සංඥා චේතනා චිත්ත ඇද්ද?

ප. පටි: එසේ නො කියැයුතු යැ ...

4. ස. පු: සඤ්ඤාවේදයිතනිරෝධසමවත් සමවන්නහුට ස්‍පර්‍ශ වේදනා සංඥා චේතනා චිත්ත නැද්ද?

ප. පටිඤ්‍ඤා: එසේ යැ.

ස. අනු: ස්‍පර්‍ශ නො කරනුවහට මාර්‍ගභාවනා ... අචිත්තකයාහට මාර්‍ගභාවනා වේ ද?

ප. පටි: එසේ නො කියැයුතු යැ ...

ස. අනු: ස්‍පර්‍ශකයාහට මාර්‍ගභාවනා ... සචිත්තකයාහට මාර්‍ගභාවනා වෙයි නො?

ප. පටිඤ්‍ඤා: එසේ යැ.

ස. ඨ: ඉදින් ස්‍පර්‍ශකයාහට මාර්‍ගභාවනා වේ නම් ... සචිත්තකයාහට මාර්‍ගභාවනා වේ නම්,

ස. පා: භවත, ‘සඤ්ඤාවේදයිතනිරෝධසමාපත්ති අසඤ්ඤසත්තූපිකා යැ’ යනු නො කියැයුතු මැ යැ.

5. ස. පු: සඤ්ඤාවේදයිතනිරෝධසමාපත්ති අසඤ්ඤසත්තූපිකා වේ ද?

ප. පටිඤ්‍ඤා: එසේ යැ.

ස. අනු: යම් කිසි කෙනෙක් සඤ්ඤාවේදයිතනිරෝධසමවත් සමවදනාහු වෙත් නම්, ඔහු හැම අසඤ්ඤසත්තූපිකා නම් වෙත් ද?

ප. පටි: එසේ නො කියැයුතු යැ ...

6. ප. පු: සඤ්ඤාවේදයිතනිරෝධසමවත් ‘අසඤ්ඤසත්තූපිකා’යි නො කියැයුතු වේ ද?

ස. පටිඤ්‍ඤා: එසේ යැ.

ප. අනු: මෙහිදු අසංඥී නො? එහිදු අසංඥී නො?

ස. පටිඤ්‍ඤා: එසේ යැ.

ප. ඨ: ඉදින් මෙහිත් අසංඥී වේ නම්, එහිත් අසංඥී වේ නම්,

ප. පා: භවත, එකරුණින් ‘සඤ්ඤාවේදයිතනිරෝධසමාපත්තිය අසඤ්ඤසත්තූපිකා යැ’යි කියැයුතු මැ යැ.