2-7. මහණෙනි, පස් කරුණෙකින් සමන්‍වාගත මෙහෙණ ... සික්මන් ... හෙරණ ... හෙරැණි ... උවසු ... උවැසි ගෙණවුත් තබන ලද්දක සෙයින් නිරයෙහි උපදින්නී වෙයි. කවර පසෙකින් යත්:

ප්‍රාණවධ කරන්නී වෙයි, අයිනාදන් ගන්නී වෙයි, කාමයෙහි මිසහසර ඇත්තී වෙයි, මුසවා කියන්නී වෙයි, මදයට හා පමාවට කරුණු වූ රහමෙර පානය කරන්නී වේ.

මහණෙනි, මෙ පස් කරුණින් සමන්‍වාගත උවැසි ගෙණවුත් තබන ලද්දක සෙයින් නිරයෙහි උපදින්නී වේ.

මහණෙනි, පස් කරුණෙකින් සමන්‍වාගත උවැසි ගෙණවුත් තබන ලද්දක සෙයින් ස්වර්‍ගයෙහි උපදින්නී වෙයි. කවර පසෙකින් යත්:

ප්‍රාණවධයෙන් වැළකුනී වෙයි, අයිනාදනින් වැළකුනී වෙයි, කාමයෙහි මිසහසරින් වැළකුනී වෙයි, මුසාවායෙන් වැළකුනී වෙයි, මදප්‍රමාදකාරණ වූ රහමෙරින් වැළකුනී වේ.

මහණෙනි, මෙ පස් දහමින් සමන්‍වාගත උවැසි ගෙණ වුත් තබන ලද්දක සෙයින් ස්වර්‍ගයෙහි උපදින්නී වේ යයි.

8. මහණෙනි, පස් කරුණෙකින් සමන්‍වාගත ආජීවක (අජෙලුමහණ) ගෙණවුත් තබන ලද්දකු සෙයින් නිරයෙහි උපදනේ ය. කවර පසෙකින් යත්:

ප්‍රාණවධ කරනුයේ වෙයි, අයිනාදන් ගන්නේ වෙයි, අබ්‍රම්සැරි වෙයි, මුසාවා බණනුයේ වෙයි, මදප්‍රමාදයට කරුණු වූ රහමෙර පානය කරනුයේ වේ.

මහණෙනි, මෙ පස් කරුණෙන් සමන්‍වාගත අජෙලුමහණ ගෙණවුත් තබන ලද්දකු සෙයින් නිරයෙහි උපදනේ යයි.

9-17. මහණෙනි, පස් කරුණෙකින් සමන්‍වාගත නුවට ... නුවටසවු ... දුළුලු … පිරිවැජි … මාගන්‍දික තීර්‍ත්‍ථක ... තෙදණ්ඩික තීර්‍ත්‍ථක ... ආරූද්ධක තීර්‍ත්‍ථක ... ගෝතමක තීර්‍ත්‍ථක ... දේවධම්මික තීර්‍ත්‍ථක ගෙණවුත් තබන ලද්දකු සෙයින් නිරයෙහි උපදනේය. කවර පසෙකින් යත්:

ප්‍රාණවධ කරනුයේ වෙයි, අයිනාදන් ගන්නේ වෙයි, අබ්‍රම්සැරි වෙයි, මුසාවා බණනුයේ වෙයි, මදප්‍රමාදකාරණ වූ රහමෙර පානය කරනුයේ වේ.

මහණෙනි, මෙ පස් කරුණෙන් සමන්‍වාගත දේවධම්මික ගෙණවුත් තබන ලද්දකු සෙයින් නිරයෙහි උපදනේ ය යි.

(ආජිවකාදීන්ගේ සිල්පරීමක් නැති බැවින් ස්වර්‍ගපක්‍ෂය නො වදාරන ලද)