2. 1. 5.
නොවේදනා සූත්‍රය
229. සැවැත්නුවර–
මහණෙනි, ධාතුනානාත්‍වය නිසා ඵස්සනානාත්‍වය උපදී. ඵස්සනානාත්‍වය නිසා වේදනානානාත්‍වයක් උපදී. වේදනානානාත්‍වය නිසා ඵස්සනානාත්‍වය නූපදී. ඵස්සනානාත්‍වය නිසා ධාතුනානාත්‍වය නූපදී.
මහණෙනි, ධාතුනානාත්‍වය කවරේ ද යත්: චක්ඛුධාතු ය … මනෝ ධාතු යි. මහණෙනි, මේ ධාතුනානාත්‍වය යි කියනු ලැබේ.
මහණෙනි, කෙසේ නම් ධාතුනානාත්‍වය නිසා ඵස්සනානාත්‍වය උපදී ද? ඵස්සනානාත්‍වය නිසා වේදනානානාත්‍වය උපදී ද? වේදනානානාත්‍වය නිසා ඵස්සනානාත්‍වය නූපදී ද?. ඵස්සනානාත්‍වය නිසා ධාතුනානාත්‍වය නූපදී ද? මහණෙනි, චක්ඛුධාතුව නිසා චක්ඛුසම්ඵස්සය උපදී. චක්ඛුසම්ඵස්සය නිසා චක්ඛුසම්ඵස්සයෙන් හටගත් වේදනාව උපදි. චක්ඛුසම්ඵස්සයෙන් හටගත් වේදනාව නිසා චක්ඛුසම්ඵස්සය නූපදී. චක්ඛුසම්ඵස්සය නිසා චක්ඛුධාතුව නූපදී … මනෝධාතුව නිසා මනෝසම්ඵස්සය උපදී. මනෝසම්ඵස්සය නිසා මනෝසම්ඵස්සයෙන් හටගත් වේදනාව උපදී. මනෝසම්ඵස්සයෙන් හටගත් වේදනාව නිසා මනෝසම්ඵස්සය නූපදී. මනෝසම්ඵස්සය නිසා මනෝධාතුව නූපදී.
මහණෙනි, මෙසේ ධාතුනානාත්‍වය නිසා ඵස්සනානාත්‍වය උපදී. ඵස්සනානාත්‍වය නිසා වේදනානානාත්‍වය උපදී. වේදනානානාත්‍වය නිසා ඵස්සනානාත්‍වය නූපදී. ඵස්සනානාත්‍වය නිසා ධාතුනානාත්‍වය නූපදී යි.
2. 1. 6.
බාහිරධාතුනානත්ත සූත්‍රය
230. සැවැත්නුවර–
මහණෙනි, තොපට ධාතුනානාත්‍වය දේශනා කරන්නෙමි. එය අසවු දේශනා කරන්නෙමි. මහණෙනි, ධාතුනානාත්‍වය කවරේ ද යත්: රූපධාතු ය, සද්දධාතු ය, ගන්‍ධධාතු ය, රසධාතු ය, ඵොට්ඨබ්බධාතු ය, ධම්මධාතු යි. මහණෙනි, මෙය ධාතුනානාත්‍වය යි කියනු ලැබේ.
2. 1. 7.
පරියෙසනානානත්ත සූත්‍රය
231. සැවැත්නුවර–
මහණෙනි, ධාතුනානාත්‍වය නිසා සංඥානානාත්‍වය උපදී. සංඥානානාත්‍වය නිසා සංකල්පනානාත්‍වය උපදී. සංකල්පනානාත්‍වය නිස ඡන්‍දනානාත්‍වය උපදී. ඡන්‍දනානාත්‍වය නිසා පරිදාහනානාත්‍වය උපදී. පරිදාහනානාත්‍වය නිසා පර්‍ය්‍යෙෂණානානාත්‍වය උපදී.
මහණෙනි, ධාතුනානාත්‍වය කවරේ ද යත්: රූපධාතු ය, ධම්මධාතු යි. මහණෙනි, මේ ධාතුනානාත්‍වය යි කියනු ලැබේ.
මහණෙනි, කෙසේ නම් ධාතුනානාත්‍වය නිසා සංඥානානාත්‍වය උපදී ද, සංඥානානාත්‍වය නිසා සංකල්පනානාත්‍වය උපදී ද, සංකල්පනානාත්‍වය නිසා ඡන්‍දනානාත්‍වය උපදී ද, ඡන්‍දනානාත්‍වය නිසා පරිදාහනානත්‍වය උපදී ද, පරිදාහනානත්‍වය නිසා පර්‍ය්‍යෙෂණානානාත්‍වය උපදී ද?
මහණෙනි, රූපධාතුව නිසා රූපසංඥාව උපදී. රූපසංඥාව නිසා රූපසංකල්පය උපදී. රූපසංකල්පය නිසා රූපච්ඡන්‍දය උපදී. රූපච්ඡන්‍දය නිසා රූපපරිදාහය උපදී. රූපපරිදාහය නිසා රූපපර්‍ය්‍යෙෂණාව උපදී. මහණෙනි, සද්දධාතුව නිසා … මහණෙනි, ධර්‍මධාතුව නිසා ධර්‍මසංඥාව උපදී. ධර්‍මසංඥාව නිසා ධර්‍මසඞ්කල්පය උපදී. ධර්‍මසඞ්කල්පය නිසා ධර්‍මච්ඡන්‍දය උපදී. ධර්‍මච්ඡන්‍දය නිසා ධර්‍මපරිදාහය උපදී. ධර්‍මපරිදාහය නිසා ධර්‍මපර්‍ය්‍යෙෂණාව උපදී.
මහණෙනි, මෙසේ ධාතුනානාත්‍වය නිසා සංඥානානාත්‍වය උපදී. සංඥානානාත්‍වය නිසා සඞ්කල්පනානාත්‍වය උපදී. සඞ්කල්පනානාත්‍වය නිසා ඡන්‍දනානාත්‍වය උපදී. ඡන්‍දනානාත්‍වය නිසා පරිදාහනානත්‍වය උපදී. පරිදාහනානත්‍වය නිසා පර්‍ය්‍යෙෂණානානාත්‍වය උපදී යි.