2. 3. 4.
ඝටීකාරසුත්තං.
105. සාවත්ථියං–
එකමන්තං ඨිතො ඛො ඝටීකාරො දෙවපුත්තො භගවතො සන්තිකෙ ඉමං ගාථං අභාසි:
අවිහං උපපන්නාසෙ විමුත්තා සත්ත භික්ඛවො,
රාගදොසපරික්ඛීණා තිණ්ණා ලොකෙ විසත්තිකන්ති.
[භගවා:]
කෙ ච තෙ අතරුං සඞ්ඝං මච්චුධෙය්යං සුදුත්තරං,
කෙ හිත්වා මානුසං දෙහං දිබ්බං යොගං උපච්චගුන්ති.
[දෙවපුත්තො:]
උපකො පලගණ්ඩො ච පුක්කුසාති ච තෙ තයො,
භද්දියො භද්දදෙවො ච බාහුදන්තී ච පිඞ්ගියො,
තෙ හිත්වා මානුසං දෙහං දිබ්බං යොගං උපච්චගුන්ති.
[භගවා:]
කුසලී භාසසි තෙසං මාරපාසප්පහායිනං,
කස්ස තෙ ධම්මමඤ්ඤාය අච්ඡිදුං භවබන්ධනන්ති.
[දෙවපුත්තො:]
න අඤ්ඤත්ර භගවතා නාඤ්ඤත්ර තව සාසනා,
යස්ස තෙ ධම්මමඤ්ඤාය අච්ඡිදුං භවබන්ධනං.
යත්ථ නාමඤ්ච රූපඤ්ච අසෙසං උපරුජ්ඣති,
තං තෙ ධම්මං ඉධඤ්ඤූය අච්ඡිදුං භවබන්ධනන්ති.
[භගවා:]
ගම්භීරං වාචසි වාචං දුබ්බිජානං සුදුබ්බුධං,
කස්ස ත්වං ධම්මමඤ්ඤාය වාචං භාසසි ඊදිසන්ති.
[දෙවපුත්තො:]
කුම්භකාරො පුරෙ ආසිං වෙහලිඞ්ගෙ ඝටීකරො,
මාතාපෙත්තිභරො ආසිං කස්සපස්ස උපාසකො.
විරතො මෙථුනා ධම්මා බ්රහ්මචාරී නිරාමිසො,
අහුවා තෙ සගාමෙය්යො අහුවා තෙ පුරෙ සඛා.
සොහං එතෙ පජානාමි විමුත්තෙ සත්ත භික්ඛවො,
රාගදොසපරික්ඛීණෙ තිණ්ණෙ ලොකෙ විසත්තිකන්ති.
[භගවා:]
එවමෙතං තදා ආසි යථා භාසසි භග්ගව,
කුම්භකාරො පුරෙ ආසි වෙහලිඞ්ගෙ ඝටීකරො.
මාතාපෙත්තිභරො ආසි කස්සපස්ස උපාසකො.
විරතො මෙථුනා ධම්මා බ්රහ්මචාරී නිරාමිසො,
අහුවා මෙ සගාමෙය්යො අහුවා මෙ පුරෙ සඛාති.
[ථෙරා:]
එවමෙතං පුරාණානං සහායානං අහු සඞ්ගමො,
උභින්නං භාවිතත්තානං සරීරන්තිමධාරිනන්ති.
2. 3. 5.
ජන්තුසුත්තං.
106. එවං මෙ සුතං එකං සමයං සම්බහුලා භික්ඛූ කොසලෙසු විහරන්ති හිමවන්තපස්සෙ අරඤ්ඤකුටිකායං උද්ධතා උන්නළා චපලා මුඛරා විකිණ්ණවාචා මුට්ඨස්සතිනො අසම්පජානා අසමාහිතා විබ්භන්තචිත්තා පාකතින්ද්රියා.
අථ ඛො ජන්තු දෙවපුත්තො තදහුපොසථෙ පණ්ණරසෙ යෙන තෙ භික්ඛූ තෙනුපසඞ්කමි, උපසඞ්කමිත්වා තෙ භික්ඛූ ගාථාහි අජ්ඣභාසි:
සුඛජීවිනො පුරෙ ආසුං භික්ඛූ ගොතමසාවකා,
අනිච්ඡා පිණ්ඩමෙසනා අනිච්ඡා සයනාසනං,
ලොකෙ අනිච්චතං ඤත්වා දුක්ඛස්සන්තං අකංසු තෙ.