2. දෙවපුත්තසංයුත්තං
1. සුරියවග්ගො
2. 1. 1.
පඨමකස්සපසුත්තං
82. එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො කස්සපො දෙවපුත්තො අභික්කන්තාය රත්තියා අභික්කන්තවණ්ණො කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි.
එකමන්තං ඨිතො ඛො කස්සපො දෙවපුත්තො භගවන්තං එතදවොච: “භික්ඛුං භගවා පකාසෙසි. නො ච භික්ඛුනො අනුසාසනින්ති.”
[භගවා:]
තෙන හි කස්සප තඤ්ඤෙවෙත්ථ පටිභාතූති.
[කස්සපදෙවපුත්තො:]
“සුභාසිතස්ස සික්ඛෙථ සමණූපාසනස්ස ච,
එකාසනස්ස ච රහො චිත්තවූපසමස්ස චාති.”
ඉදමවොච කස්සපො දෙවපුත්තො සමනුඤ්ඤො සත්ථා අහොසි.
අථ ඛො කස්සපො දෙවපුත්තො සමනුඤ්ඤො මෙ සත්ථාති භගවන්තං අභිවාදෙත්වා පදක්ඛිණං කත්වා තත්ථෙවන්තරධායීති.
2. 1. 2.
දුතියකස්සපසුත්තං
83. සාවත්ථියං–
එකමන්තං ඨිතො ඛො කස්සපො දෙවපුත්තො භගවතො සන්තිකෙ ඉමං ගාථං අභාසි:
භික්ඛු සියා ඣායී විමුත්තචිත්තො ආකඞ්ඛෙ චෙ හදයස්සානුපත්තිං,ලොකස්ස ඤත්වා උදයබ්බයඤ්ච සුචෙතසො අනිස්සිතො තදානිසංසොති.
2. 1. 3.
මාඝසුත්තං
84. සාවත්ථියං–
අථ ඛො මාඝො දෙවපුත්තො අභික්කන්තාය රත්තියා අභික්කන්තවණ්ණො කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි . එකමන්තං ඨිතො ඛො මාඝො දෙවපුත්තො භගවන්තං ගාථාය අජ්ඣභාසි:
කිං සු ඣත්වා සුඛං සෙති කිං සු ඣත්වා න සොචති,
කිස්සස්ස එකධම්මස්ස වධං රොචෙසි ගොතමාති.
[භගවා:]
කොධං ඣත්වා සුඛං සෙති කොධං ඣත්වා න සොචති,
කොධස්ස විසමූලස්ස මධුරග්ගස්ස වත්රභූ,
වධං අරියා පසංසන්ති තං හි ඣත්වා න සොචතීති.
2. 1. 4.
මාගධසුත්තං
85. සාවත්ථියං–
එකමන්තං ඨිතො ඛො මාගධො දෙවපුත්තො භගවන්තං ගාථාය අජ්ඣභාසි:
කති ලොකස්මිං පජ්ජොතා යෙහි ලොකො පකාසති,
භවන්තං පුට්ඨුමාගම්ම කථං ජානෙමු තං මයන්ති.
[භගවා:]
චත්තාරො ලොකෙ පජ්ජොතා පඤ්චමෙත්ථ න විජ්ජති,
දිවා තපති ආදිච්චො රත්තිං ආභාති චන්දිමා.
අථ අග්ගි දිවාරත්තිං තත්ථ තත්ථ පකාසති,
සම්බුද්ධො තපතං සෙට්ඨො එසා ආභා අනුත්තරාති.
2. 1. 5.
දාමලිසුත්තං
86. සාවත්ථියං–
අථ ඛො දාමලි දෙවපුත්තො අභික්කන්තාය රත්තියා අභික්කන්තවණ්ණො කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතො ඛො දාමලි දෙවපුත්තො භගවතො සන්තිකෙ ඉමං ගාථං අභාසි: