667. කා නාම ත්වං විසාලක්ඛි රම්මෙ චිත්තලතාවනෙ,
සමන්තා අනුපරියාසි නාරීගණපුරක්ඛතා.

668. යදා දෙවා තාවතිංසා පවිසන්ති ඉමං වනං,
සයොග්ගා සරථා සබ්බෙ චිත්රා හොන්තී ඉධාගතා.

669. තුය්හඤ්ච ඉධ පත්තාය උය්යානෙ විචරන්තියා,
කායෙ න දිස්සති චිත්තං කෙනරූපං තවෙදිසං
දෙවතෙ පුච්ඡිතාචික්ඛ කිස්ස කම්මස්සිදං ඵලන්ති.

670. යෙන කම්මෙන දෙවින්ද රූපං මය්හං ගතී ච මෙ,
ඉද්ධි ච අනුභාවො ච තං සුණොහි පුරීන්දද.

671. අහං රාජගහෙ රම්මෙ සුනන්දානාමුපාසිකා,
සද්ධා සීලෙන සම්පන්නා සංවිභාගරතා සදා.

672. අච්ඡාදනඤ්ච භත්තඤ්ච සෙනාසනං පදීපියං,
අදාසිං උජුභූතෙසු විප්පසන්නෙන චෙතසා.

673. චාතුද්දසිං පඤ්චදසිං යාච පක්ඛස්ස අට්ඨමී,
පාටිහාරිය පක්ඛඤ්ච අට්ඨඞ්ගසුසමාගතං.

674. උපොසථං උපවසිස්සං සදා සීලෙසු සංවුතා,
සඤ්ඤමා සංවිභාගා ච විමානං ආවසාමහං

675. පාණාතිපාතා විරතා මුසාවාදා ච සඤ්ඤතා,
ථෙය්යා ච අතිචාරා ච මජ්ජපානා ච ආරකා.

676. පඤ්චසික්ඛාපදෙ රතා අරියසච්චාන කොවිදා,
උපාසිකා චක්ඛුමතො ගොතමස්ස යසස්සිනො.

677. තස්සා මෙ ඤාතිකුලා දාසී සදා මාලාභිහාරතී,
තාහං භගවතො ථූපෙ සබ්බමෙවාභිරොපයිං.

678. උපොසථෙ චහං ගන්ත්වා මාලාගන්ධවිලෙපනං,
ථූපස්මිං අභිරොපෙසිං පසන්නා සෙහි පාණිහි.

679. තෙන කම්මෙන දෙවින්ද රූපං මය්හං ගතී ච මෙ,
ඉද්ධි ච අනුභාවො ච යං මාලං අභිරොපයිං.

680. යඤ්ච සීලවතී ආසිං න තං තාව විපච්චතී,
ආසා ච පන මෙ දෙවින්ද සකදාගාමිනී සියන්ති.

681. පාරිච්ඡත්තකෙ කොවිළාරෙ රමණීයෙ මනොරමෙ,
දිබ්බං මාලං ගන්ථමානා ගායන්තී සම්පමොදසී.

682. තස්සා තෙ නච්චමානාය අඞ්ගමඞ්ගෙහි සබ්බසො,
දිබ්බා සද්දා නිච්ඡරන්ති සවණීයා මනොරමා.

683. තස්සා තෙ නච්චමානාය අඞ්ගමඞ්ගෙහි සබ්බසො,
දිබ්බා ගන්ධා පවායන්ති සුචිගන්ධා මනොරමා.

684. විවත්තමානා කායෙන යා වෙණීසු පිළන්ධනා,
තෙසං සූයති නිග්ඝොසො තුරියෙ පඤ්චඞ්ගිකෙ යථා.

685. වටංසකා වාතධූතා වාතෙන සම්පකම්පිතා,
තෙසං සූයති නිග්ඝොසො තුරියෙ පඤ්චඞ්ගිකෙ යථා.

686. යාපි තෙ සිරස්මිං මාලා සුචිගන්ධා මනොරමා,
වාති ගන්ධො දිසා සබ්බා රුක්ඛො මඤ්ජුස්සකො යථා.

687. ඝායසෙ තං සුචිං ගන්ධං රූපං පස්සසි අමානුසං,
දෙවතෙ පුච්ඡිතාචික්ඛ කිස්ස කම්මස්සිදං ඵලන්ති.

688. පභස්සරං අච්චිමන්තං වණ්ණගන්ධෙන සඤ්ඤුතං,
අසොකපුප්ඵමාලාහං බුද්ධස්ස උපනාමයිං.

689. තාහං කම්මං කරිත්වාන කුසලං බුද්ධවණ්ණිතං,
අපෙතසොකා සුඛිතා සම්පමොදාමනාමයාති.

උළාරං උච්ඡුපල්ලඞ්කං ලතා ච ගුත්තිලෙන ච
දද්දල්ල සෙසවතී මල්ලී විසාලක්ඛි පාරිච්ඡත්තකො
වග්ගො තෙන පවුච්චතීති.