3. 10.
681. පාරිච්ඡත්තකෙ කොවිළාරෙ රමණීයෙ මනොරමෙ,
දිබ්බං මාලං ගන්ථමානා ගායන්තී සම්පමොදසී.
682. තස්සා තෙ නච්චමානාය අඞ්ගමඞ්ගෙහි සබ්බසො,
දිබ්බා සද්දා නිච්ඡරන්ති සවණීයා මනොරමා.
683. තස්සා තෙ නච්චමානාය අඞ්ගමඞ්ගෙහි සබ්බසො,
දිබ්බා ගන්ධා පවායන්ති සුචිගන්ධා මනොරමා.
684. විවත්තමානා කායෙන යා වෙණීසු පිළන්ධනා,
තෙසං සූයති නිග්ඝොසො තුරියෙ පඤ්චඞ්ගිකෙ යථා.
685. වටංසකා වාතධූතා වාතෙන සම්පකම්පිතා,
තෙසං සූයති නිග්ඝොසො තුරියෙ පඤ්චඞ්ගිකෙ යථා.
686. යාපි තෙ සිරස්මිං මාලා සුචිගන්ධා මනොරමා,
වාති ගන්ධො දිසා සබ්බා රුක්ඛො මඤ්ජුස්සකො යථා.
687. ඝායසෙ තං සුචිං ගන්ධං රූපං පස්සසි අමානුසං,
දෙවතෙ පුච්ඡිතාචික්ඛ කිස්ස කම්මස්සිදං ඵලන්ති.
688. පභස්සරං අච්චිමන්තං වණ්ණගන්ධෙන සඤ්ඤුතං,
අසොකපුප්ඵමාලාහං බුද්ධස්ස උපනාමයිං.
689. තාහං කම්මං කරිත්වාන කුසලං බුද්ධවණ්ණිතං,
අපෙතසොකා සුඛිතා සම්පමොදාමනාමයාති.
පාරිච්ඡත්තක විමානං.
පාරිච්ඡත්තකවග්ගො තතියො.
තස්සුද්දානං:
උළාරං උච්ඡුපල්ලඞ්කං ලතා ච ගුත්තිලෙන ච
දද්දල්ල සෙසවතී මල්ලී විසාලක්ඛි පාරිච්ඡත්තකො
වග්ගො තෙන පවුච්චතීති.
4. මඤ්ජෙට්ඨකවග්ගො
4. 1.
690. මඤ්ජෙට්ඨකෙ විමානස්මිං සොණ්ණ වාලුක සන්ථතෙ,
පඤ්චඞ්ගිකෙන තුරියෙන රමසි සුප්පවාදිතෙ.
691. තස්මා විමානා ඔරුය්හ නිම්මිතා රතනාමයා,
ඔගාහසි සාලවනං පුප්ඵිතං සබ්බකාලිකං
692. යස්ස යස්සෙව සාලස්ස මූලෙ තිට්ඨසි දෙවතෙ,
සො සො මුඤ්චති පුප්ඵානි ඔනමිත්වා දුමුත්තමො
693. වාතෙරිතං සාලවනං ආධූතං දිජසෙවිතං,
වාති ගන්ධො දිසා සබ්බා රුක්ඛො මඤ්ජූසකො යථා
694. ඝායසෙ තං සුචිං ගන්ධං රූපං පස්සසි අමානුසං,
දෙවතෙ පුච්ඡිතාචික්ඛ කිස්ස කම්මස්සිදං ඵලන්ති
695. අහං මනුස්සෙසු මනුස්සභූතා දාසී අයිරකුලෙ අහුං,
බුද්ධං නිසින්නං දිස්වාන සාලපුප්ඵෙහි ඔකිරිං
696. වටංසකං ච සුකතං සාලපුප්ඵමයං අහං,
බුද්ධස්ස උපනාමෙසිං පසන්නා සෙහි පාණිහි.
697. තාහං කම්මං කරිත්වාන කුසලං බුද්ධවණ්ණිතං,
අපෙතසොකා සුඛිතා සම්පමොදාමනාමයාති.
මඤ්ජෙට්ඨක විමානං.
4. 2.
698. පභස්සර වරවණ්ණනිභෙ
සුරත්තවත්ථ නිවාසනෙ
මහිද්ධිකෙ චන්දනරුචිරගත්තෙ
කා ත්වං සුභෙ දෙවතෙ වන්දසෙ මමං
699. පල්ලඞ්කො ව තෙ මහග්ඝො
නානාරතනචිත්තිතො රුචිරො
යත්ථ ත්වං නිසින්නා විරොචසි
දෙවරාජාරිව නන්දනෙ වනෙ
700. කිං ත්වං පුරෙ සුචරිතමාචරි භද්දෙ
කිස්ස කම්මස්ස විපාකං අනුභොසි දෙවලොකස්මිං
දෙවතෙ පුච්ඡිතාචික්ඛ කිස්සකම්මස්සිදං ඵලන්ති