4. මඤ්ජෙට්ඨකවග්ගො
4. 1.
690. මඤ්ජෙට්ඨකෙ විමානස්මිං සොණ්ණ වාලුක සන්ථතෙ,
පඤ්චඞ්ගිකෙන තුරියෙන රමසි සුප්පවාදිතෙ.
691. තස්මා විමානා ඔරුය්හ නිම්මිතා රතනාමයා,
ඔගාහසි සාලවනං පුප්ඵිතං සබ්බකාලිකං
692. යස්ස යස්සෙව සාලස්ස මූලෙ තිට්ඨසි දෙවතෙ,
සො සො මුඤ්චති පුප්ඵානි ඔනමිත්වා දුමුත්තමො
693. වාතෙරිතං සාලවනං ආධූතං දිජසෙවිතං,
වාති ගන්ධො දිසා සබ්බා රුක්ඛො මඤ්ජූසකො යථා
694. ඝායසෙ තං සුචිං ගන්ධං රූපං පස්සසි අමානුසං,
දෙවතෙ පුච්ඡිතාචික්ඛ කිස්ස කම්මස්සිදං ඵලන්ති
695. අහං මනුස්සෙසු මනුස්සභූතා දාසී අයිරකුලෙ අහුං,
බුද්ධං නිසින්නං දිස්වාන සාලපුප්ඵෙහි ඔකිරිං
696. වටංසකං ච සුකතං සාලපුප්ඵමයං අහං,
බුද්ධස්ස උපනාමෙසිං පසන්නා සෙහි පාණිහි.
697. තාහං කම්මං කරිත්වාන කුසලං බුද්ධවණ්ණිතං,
අපෙතසොකා සුඛිතා සම්පමොදාමනාමයාති.
මඤ්ජෙට්ඨක විමානං.
4. 2.
698. පභස්සර වරවණ්ණනිභෙ
සුරත්තවත්ථ නිවාසනෙ
මහිද්ධිකෙ චන්දනරුචිරගත්තෙ
කා ත්වං සුභෙ දෙවතෙ වන්දසෙ මමං
699. පල්ලඞ්කො ව තෙ මහග්ඝො
නානාරතනචිත්තිතො රුචිරො
යත්ථ ත්වං නිසින්නා විරොචසි
දෙවරාජාරිව නන්දනෙ වනෙ
700. කිං ත්වං පුරෙ සුචරිතමාචරි භද්දෙ
කිස්ස කම්මස්ස විපාකං අනුභොසි දෙවලොකස්මිං
දෙවතෙ පුච්ඡිතාචික්ඛ කිස්සකම්මස්සිදං ඵලන්ති
701. පිණ්ඩාය තෙ චරන්තස්ස
මාලං ඵාණිතඤ්ච අදදං භන්තෙ
තස්ස කම්මස්සිදං විපාකං
අනුභොමි දෙවලොකස්මිං
702. හොති ච මෙ අනුතාපො
අපරද්ධං දුක්කතඤ්ච මෙ භන්තෙ
සාහං ධම්මං නාස්සොසිං
සුදෙසිතං ධම්මරාජෙන
703. තං තං වදාමි භද්දන්තෙ
යස්ස මෙ අනුකම්පියො
කොචි ධම්මෙසු තං සමාදපෙථ
සුදෙසිතං ධම්මරාජෙන
704. යෙසං අත්ථි සද්ධා බුද්ධෙ ධම්මෙ ච සඞ්ඝරතනෙ ච,
තං තෙ මං අතිවිරොචන්ති ආයුනා යසසා සිරියා
705. පතාපෙන වණ්ණෙන උත්තරිතරා
අඤ්ඤෙ මහිද්ධිකතරා මයා දෙවාති
පභස්සර විමානං.
4. 3.
706. අලඞ්කතා මණිකඤ්චනාචිතං
සුවණ්ණජාල චිත්තං මහන්තං
අභිරුය්හ ගජවරං සුකප්පිතං
ඉධාගමා වෙහාසයං අන්තළික්ඛෙ
707. නාගස්ස දන්තෙසු දුවෙසු නිම්මිතා
අච්ඡොදිකා පදුමිනියො සුඵුල්ලා
පදුමෙසු ච තුරියගණා පභිජ්ජරෙ
ඉමා ච නච්චන්ති මනොහරායො
708. දෙවිද්ධිපත්තාසි මහානුභාවෙ
මනුස්සභූතා කිමකාසි පුඤ්ඤං
කෙනාසි එවං ජලිතානුභාවා
වණ්ණො ච තෙ සබ්බදිසා පභාසතීති