659. පීතවත්ථෙ පීතධජෙ පීතාලඞ්කාරභූසිතෙ,
පීතන්තරාහි වග්ගුහි අපිළන්ධාව සොභසි.

660. කා කම්බුකෙයූරධරෙ කඤ්චනාවෙළභූසිතෙ,
හෙමජාලක පච්ඡන්නෙ නානාරතනමාලිනි.

661. සොවණ්ණමයා ලොහිතඞ්කමයා ච
මුත්තාමයා වෙළුරියමයා ච
මසාරගල්ලා සහ ලොහිතඞ්කා
පාරාවතක්ඛීහි මණීහි චිත්තිතා.

662. කොචි කොචි එත්ථ මයූරසුස්සරො
හංසස්සරඤ්ඤො කරවීකසුස්සරො
තෙසං සරො සූයති වග්ගුරූපො
පඤ්චඞ්ගිකං තුරියමිවප්පවාදිතං.

663. රථො ච තෙ සුභො වග්ගු නානාරතනචිත්තිතො
නානාවණ්ණාභි ධාතූහි සුචිභත්තො ච සොභති.

664. තස්මිං රථෙ කඤ්චනබිම්බවණ්ණෙ
යා ත්වං ඨිතා භාසසිමං පදෙසං
දෙවතෙ පුච්ඡිතාචික්ඛ කිස්ස කම්මස්සිදං ඵලන්ති.

665. සොවණ්ණජාලං මණිසොණ්ණචිත්තිතං
මුත්තාචිතං හෙමජාලෙන ඡන්නං
පරිනිබ්බුතෙ ගොතමෙ අප්පමෙය්යෙ
පසන්නචිත්තා අහමාභිරොපයිං.

666. තාහං කම්මං කරිත්වාන කුසලං බුද්ධවණ්ණිතං,
අපෙතසොකා සුඛිතා සම්පමොදාමනාමයා’ති.

667. කා නාම ත්වං විසාලක්ඛි රම්මෙ චිත්තලතාවනෙ,
සමන්තා අනුපරියාසි නාරීගණපුරක්ඛතා.

668. යදා දෙවා තාවතිංසා පවිසන්ති ඉමං වනං,
සයොග්ගා සරථා සබ්බෙ චිත්රා හොන්තී ඉධාගතා.

669. තුය්හඤ්ච ඉධ පත්තාය උය්යානෙ විචරන්තියා,
කායෙ න දිස්සති චිත්තං කෙනරූපං තවෙදිසං
දෙවතෙ පුච්ඡිතාචික්ඛ කිස්ස කම්මස්සිදං ඵලන්ති.

670. යෙන කම්මෙන දෙවින්ද රූපං මය්හං ගතී ච මෙ,
ඉද්ධි ච අනුභාවො ච තං සුණොහි පුරීන්දද.

671. අහං රාජගහෙ රම්මෙ සුනන්දානාමුපාසිකා,
සද්ධා සීලෙන සම්පන්නා සංවිභාගරතා සදා.

672. අච්ඡාදනඤ්ච භත්තඤ්ච සෙනාසනං පදීපියං,
අදාසිං උජුභූතෙසු විප්පසන්නෙන චෙතසා.

673. චාතුද්දසිං පඤ්චදසිං යාච පක්ඛස්ස අට්ඨමී,
පාටිහාරිය පක්ඛඤ්ච අට්ඨඞ්ගසුසමාගතං.

674. උපොසථං උපවසිස්සං සදා සීලෙසු සංවුතා,
සඤ්ඤමා සංවිභාගා ච විමානං ආවසාමහං

675. පාණාතිපාතා විරතා මුසාවාදා ච සඤ්ඤතා,
ථෙය්යා ච අතිචාරා ච මජ්ජපානා ච ආරකා.

676. පඤ්චසික්ඛාපදෙ රතා අරියසච්චාන කොවිදා,
උපාසිකා චක්ඛුමතො ගොතමස්ස යසස්සිනො.

677. තස්සා මෙ ඤාතිකුලා දාසී සදා මාලාභිහාරතී,
තාහං භගවතො ථූපෙ සබ්බමෙවාභිරොපයිං.