4914. රාජාසි ලුද්දකම්මො එකරාජාති පුප්ඵවතියා,
සො පුච්ඡි බ්රහ්මබන්ධුං ඛණ්ඩහාලං පුරොහිතං මූළ්හං.

4915. සග්ගානමග්ගමාචික්ඛ ත්වංසි බ්රාහ්මණ ධම්මවිනයකුසලො,
යථා ඉතො වජන්ති සුගතිං නරා පුඤ්ඤානි කත්වාන.

4916. අතිදානං දදිත්වාන අවජ්ඣෙ දෙව ඝාතෙත්වා,
එවං වජන්ති සුගතිං නරා පුඤ්ඤානි කත්වාන.

4917. කිං පන තං අතිදානං කෙ ච අවජ්ඣා ඉමස්මිං ලොකස්මිං,
එතඤ්ච ඛො නො අක්ඛාහි යජිස්සාම දදාම දානානි.

4918. පුත්තෙහි දෙව යජිතබ්බං මහෙසීහි නෙගමෙහි ච උසභෙහි,
ආජානීයෙහි චතූහි සබ්බචතුක්කෙන දෙව යජිතබ්බං.

4919. තං සුත්වා අන්තෙපුරෙ කුමාරා ච මහෙසියො ච හඤ්ඤන්තු,
එකො අහොසි නිග්ඝොසො භෙස්මා අච්චුග්ගතො සද්දො.

4920. ගච්ඡථ වදෙථ කුමාරෙ චන්දං සුරියං ච භද්දසෙනඤ්ච,
සූරඤ්ච වාමගොත්තං පසුරා කිර හොථ යඤ්ඤත්ථාය.

4921. කුමාරියොපි වදෙථ උපසෙනිං කොකිලඤ්ච මුදිතඤ්ච,
නන්දඤ්චාපි කුමාරිං පසුරා කිර භොථ යඤ්ඤත්ථාය.

4922. විජයම්පි මය්හං මහෙසිං එරාවතිං කෙසිනං සුනන්දඤ්ච,
ලක්ඛණවරූපපන්නා පසුරා කිර හොථ යඤ්ඤත්ථාය.

4923. ගහපතයොපි වදෙථ පුණ්ණමුඛං භද්දියං සිගාලඤ්ච,
වඩ්ඪඤ්චාපි ගහපතිං පසුරා කිර හොථ යඤ්ඤත්ථාය.

4924. තෙ තත්ථ ගහපතයො අවොචිංසු සමාගතා පුත්තදාර පරිකිණ්ණා,
සබ්බසිඛිනො දෙව කරොහි අථවා නො දාසෙ සාවෙහි.

4925. අභයඞ්කරම්පි මෙ හත්ථිං නාලාගිරිං අච්චුතං වරුණදන්තං,
ආනෙථ ඛො නෙ ඛිප්පං යඤ්ඤත්ථාය භවිස්සන්ති.

4926. අස්සරතනම්පි කෙසිං සුරාමුඛං පුණ්ණකං විනතකඤ්ච,
ආනෙථ ඛො නෙ ඛිප්පං යඤ්ඤත්ථාය භවිස්සන්ති.

4927. උසභම්පි යූථපතිං අනොජං නිසභං ගවම්පතිං තෙපි මය්හං ආනෙථ,
සමුපාකරොන්තු සබ්බං යජිස්සාම දදාම දානානි.

4928. සබ්බං පටියාදෙථ යඤ්ඤං පන උග්ගතම්හි සුරියම්හි,
ආණාපෙථ ච කුමාරෙ අභිරමන්තු ඉමං රත්තිං.

4929. සබ්බං උපට්ඨපෙථ යඤ්ඤං පන උග්ගතම්හි සුරියම්හි,
වදෙථදානි කුමාරෙ අජ්ජ වො පච්ඡිමා රත්තිං.

4930. තං තං මාතා අවචා රොදන්ති ආගතා විමානතො,
යඤ්ඤො කිර තෙ පුත්ත භවිස්සති චතූහි පුත්තෙහි.

4931. සබ්බෙපි මය්හං පුත්තා චත්තා චන්දාස්මිං හඤ්ඤමානස්මිං,
පුත්තෙහි යඤ්ඤං යජිත්වාන සුගතිං සග්ගං ගමිස්සාමි.

4932. මා පුත්ත සද්දහෙසි සුගති කිර හොති පුත්තයඤ්ඤෙන,
නිරයානෙසො මග්ගො නෙසො මග්ගො හි සග්ගානං.

4933. දානානි දෙහි කොණ්ඩඤ්ඤ අහිංසා සබ්බභූතභව්යානං,
එසමග්ගො සුගතියා න ච මග්ගො පුත්තයඤ්ඤෙන.

4934. ආචරියානං වචනා ඝාතෙස්සං චන්දඤ්ච සුරියඤ්ච,
පුත්තෙහි යජිත්වාන දුච්චජෙහි සුගතිං සග්ගං ගමිස්සාමි.