5084. යං කිඤ්චි රතනං අත්ථි ධතරට්ඨනිවෙසනෙ,
සබ්බානි තෙ උපායන්තු ධීතරං දෙහි රාජිනො.

5085. න නො විවාහො නාගෙහි කතපුබ්බො කුදාචනං,
තං විවාහං අසංයුත්තං කථං අම්හෙ කරොමසෙ.

5086. ජීවිතං නූන තෙ චත්තං රට්ඨං වා මනුජාධිප,
න හි නාගෙ කුපිතම්භි චිරං ජීවන්ති තාදිසා.

5087. යො ත්වං දෙව මනුස්සෙසු ඉද්ධිමන්තං අනිද්ධිමා,
වරුණස්ස නියං පුත්තං යාමුනං අතිමඤ්ඤසි.

5088. නාතිමඤ්ඤාමි රාජානං ධතරට්ඨං යසස්සිනං,
ධතරට්ඨො හි නාගානං බහුන්නමපි ඉස්සරො.

5089. අහි මහානුභාවොපි න මෙ ධීතරමාරහො,
ඛත්තියො ච විදෙහානං අභිජාතා සමුද්දජා.

5090. කම්බලස්සතරා උට්ඨෙන්තු සබ්බෙ නාගෙ නිවෙදය,
බාරාණසිං පවජ්ජන්තු මා ච කිඤ්චි විහෙඨයුං.

5091. නිවෙසනෙසු සොබ්භෙසු රථියා චච්චරෙසු ච,
රුක්ඛග්ගෙසු ච ලබ්බන්තු විතතා තොරණෙසු ච.

5092. අහම්පි සබ්බසෙතෙන මහතා සුමහං පුරං,
පරික්ඛිපිස්සං භොගෙහි කාසීනං ජනයං භයං.

5093. තස්ස තං වචනං සුත්වා උරගා නෙකවණ්ණිනො,
බාරාණසිං පවජ්ජිංසු න ච කිඤ්චිවිහෙඨයුං.

5094. නිවෙසනෙසු සොබ්භෙසු රථියා චච්චරෙසු ච,
රුක්ඛග්ගෙසු ච ලම්බිංසු විතතා තොරණෙසු ච.

5095. තෙ දිස්වාන ලම්බන්තෙ පුථු කන්දිංසු නාරියො,
නගෙ සොණ්ඩිකතෙ දිස්වා පස්සසන්තෙ මුහුං මුහුං.

5096. බාරාණසී පව්යධිතා ආතුරා සමපජ්ජථ,
බාහා පග්ගය්හ පක්කන්දුං ධීතරං දෙහි රාජිනො.

5097. පුප්ඵාභිහාරස්ස වනස්ස මජ්ඣෙ
කො ලොහිතක්ඛො විහතන්තරංසො,
කාකම්බුකායූරධරා සුවත්ථා
තිට්ඨන්ති නාරියො දස වන්දමානා.

5098. කො ත්වං බ්රහාබාහු වනස්ස මජ්ඣෙ
විරොචසි ඝතසිත්තොව අග්ගි,
මහෙසක්ඛො අඤ්ඤතරොසි යක්ඛො
උදාහු නාගොසි මහානුභාවො.

5099. නාගොහමස්මිං ඉද්ධිමා තෙජසී දුරතික්කමො,
ඩසෙය්යං තෙජසා කුද්ධො ඵීතං ජනපදං අපි.

5100. සමුද්දජා හි මෙ මාතා ධතරට්ඨො ච මෙ පිතා,
සුදස්සනකනිට්ඨොස්මි භූරිදත්තොති මං විදූ.

5101. යං ගම්භීරං සදාවට්ටං රහදං භෙස්මං අවෙක්ඛසි,
එස දිව්යො මමාවාසො අනෙකසතපොරිසො.

5102. මයූරකොඤ්චාභිරුදං නීලොදං වනමජ්ඣතො,
යමුනං පවිස මාභිතො ඛෙමං වත්තවතං සිවං.

5103. තත්ථ පත්තො සානුචරො සහපුත්තෙන බ්රාහ්මණ,
පූජිතො මය්හං කාමෙහි සුඛං බ්රාහ්මණ වච්ඡසි.

5104. සමා සමන්තා පරිතො බහූත තගරා මහී,
ඉන්දගොපකසඤ්ඡන්නා සොභතී හරිතුත්තමා.