4320. මා පණ්ඩිතියං විභාවය බාලමතො භව සබ්බපාණිනං,
සබ්බො ජනො තං ඔචිනායතු එවං තව අත්ථො භවිස්සති.

4321. කරොමි තෙ තං වචනං යං මං භණසි දෙවතෙ,
අත්ථකාමාසි මෙ අම්ම හිතකාමාසි දෙවතෙ.

4322. කින්නුසන්තරමානොව කාසුං ඛණසි සාරථි,
පුට්ඨො මෙ සම්ම අක්ඛාහි කිං කාසුයා කරිස්සසි.

4323. රඤ්ඤො මූගො ච පක්ඛො ච පුත්තො ජාතො අචෙතසො,
සොම්හි රඤ්ඤා සමජ්ඣිට්ඨො පුත්තං මෙ නිඛණං වනෙ.

4324. න බධිරො න මූගොස්මි න පක්ඛො නපි පඞ්ගුලො,
අධම්මං සාරථි කයිරා මඤ්චෙ ත්වං නිඛණං වනෙ.

4325. ඌරූ බාහූ ච මෙ පස්ස භාසිතඤ්ච සුණොහි මෙ,
අධම්මං සාරථි කයිරා මඤ්චෙ ත්වං නිඛණං වනෙ.

4326. දෙවතානුසි ගන්ධබ්බො ආදු සක්කො පුරින්දදො,
කො වා ත්වං කස්ස වා පුත්තො කථං ජානෙමු තං මයං.

4327. නම්හි දෙවො න ගන්ධබ්බො නපි සක්කො පුරින්දදො,
කාසිරඤ්ඤො අහං පුත්තො යං කාසුයා නිඝඤ්ඤසි.

4328. තස්ස රඤ්ඤො අහං පුත්තො යං ත්වං සමුපජීවසි,
අධම්මං සාරථි කයිරා මං වෙ ත්වං නිඛණං වනෙ.

4329. යස්ස රුක්ඛස්ස ඡායාය නිසීදෙය්ය සයෙය්ය වා,
න තස්ස සාඛං භඤ්ජෙය්ය මිත්තදූභො හි පාපකො.

4330. යථා රුක්ඛො තථා රාජා යථා සාඛා තථා අහං.
යථා ඡායූපගො පොසො එවං ත්වමසි සාරථි;
අධම්මං සාරථි කයිරා මඤ්චෙ ත්වං නිඛණං වනෙ.

4331. පහුතභක්ඛො භවති විප්පවුත්ථො සකාඝරා,
බහූ නං උපජීවන්ති යො මිත්තානං න දූභති

4332. යං යං ජනපදං යාති නිගමෙ රාජධානියො,
සබ්බත්ථ පූජිතො හොති යො මිත්තානං න දූභති.

4333. නාස්ස චොරා පසහන්ති නාතිමඤ්ඤෙති ඛත්තියො,
සබ්බෙ අමිත්තෙ තරති යො මිත්තානං න දූභති.

4334. අක්කුද්ධො සඝරං එති සභාය පටිනන්දිතො,
ඤාතීනං උත්තමො හොති යො මිත්තානං න දූභති.

4335. සක්කත්වා සක්කතො හොති ගරු හොති සගාරවො,
වණ්ණකිත්තිභතො හොති යො මිත්තානං න දූභති.

4336. පූජකො ලභතෙ පූජං වන්දකො පටිවන්දනං,
යසො කිත්තිඤ්ච පප්පොති යො මිත්තානං න දූභති.

4337. අග්ගි යථා පජ්ජලති දෙවතාව විරොචති,
සිරියා අජහිතො හොති යො මිත්තානං න දූභති.