6471. ගච්ඡන්තො සො භාරද්වාජො අද්දසා අච්චුතං ඉසිං,
දිස්වානං තං භාරද්වාජො සම්මොදි ඉසිනා සහ.

6472. කච්චින්නු භොතො කුසලං කච්චි භොතො අනාමයං,
කච්චි උඤ්ඡෙන යාපෙසි කච්චි මූලඵලා බහූ.

6473. කච්චි ඩංසා ච මකසා ච අප්පමෙව සිරිංසපා,
වනෙ වාළමිගාකිණ්ණෙ කච්චි හිංසා න විජ්ජති.

6474. කුසලඤ්චෙව මෙ බ්රහ්මෙ අථො බ්රහ්මෙ අනාමයං,
අථො උඤ්ඡෙන යාපෙමි අථො මූලඵලා බහූ.

6475. අථො ඩංසා ච මකසා ච අප්පමෙව සිරිංසපා,
වනෙ වාළමිගාකිණ්ණෙ හිංසා මය්හං න විජ්ජති.

6476. බහූනි චස්ස පූගානි අස්සමෙ වසතො මම,
නාභිජානාමි උප්පන්නං ආබාධං අමනොරමං.

6477. ස්වාගං තෙ මහාබ්රහ්මෙ අථො තෙ අදුරාගතං.
අන්තො පවිස භද්දන්තෙ පාදෙ පක්ඛාලයස්සු තෙ.

6478. තින්දුකානි පියාලානි මධුකෙ කාසුමාරියො,
ඵලානි ඛුද්දකප්පානි භුඤ්ජ බ්රහ්මෙ වරං වරං.

6479. ඉදම්පි පානීයං සීතං ආභතං ගිරිගබ්භරා,
තතො පිව මහාබ්රහ්මෙ සචෙ ත්වං අභිකඞ්ඛසි.

6480. පටිග්ගහීතං යං දින්නං සබ්බස්ස අග්ඝියං කතං,
සඤ්ජයස්ස සකං පුත්තං සිවීහි විප්පවාසිතං;
තමහං දස්සනමාගතො යදි ජානාසි සංස මෙ.

6481. න භවං එති පුඤ්ඤත්ථං සිවිරාජස්ස දස්සනං,
මඤ්ඤෙ භවං පත්ථයති රඤ්ඤො භරියං පතිබ්බතං.

6482. මඤ්ඤෙ කණ්හාජිනං දාසිං ජාලිං දාසඤ්ච ඉච්ඡසි,
අථවා තයො මාතාපුත්තෙ අරඤ්ඤා නෙතුමාගතො;
න තස්ස භොගා විජ්ජන්ති ධනං ධඤ්ඤඤ්ච බ්රාහ්මණ.

6483. අකුද්ධරූපාහං භොතො නාහං යාචිතුමාගතො,
සාධු දස්සනමරියානං සන්නිවාසො සදා සුඛො.

6484. අදිට්ඨපුබ්බො සිවිරාජා සිවීහි විප්පවාසිතො,
තමහං දස්සනමාගතො යදි ජානාසි සංස මෙ.

6485. එස සෙලො මහාබ්රහ්මෙ පබ්බතො ගන්ධමාදනො,
යත්ථ වෙස්සන්තරො රාජා සහපුත්තෙහි සම්මති.

6486. ධාරෙන්තො බ්රාහ්මණං වණ්ණං ආසදඤ්ච මසං ජටං,
චම්මවාසී ඡමා සෙති ජාතවෙදං නමස්සති.

6487. එතෙ නීලා පදිස්සන්ති නානාඵලධරා දුමා,
උග්ගතා අබ්භකූටාව නීලා අඤ්ජනපබ්බතා.

6488. ධවස්සකණ්ණා ඛදිරා සාලාඵන්දනමාලුවා,
සම්පවෙධන්ති වාතෙන සකිං පීතාව මාණවා.

6489. උපරි දුමපරියායෙසු සංගීතියොව සූයරෙ,
නජ්ජුහා කොකිලසඞ්ඝා සම්පතන්ති දුමා දුමං.

6490. අව්හයන්තෙව ගච්ඡන්තං සාඛාපත්තසමෙරිතා,
රමයන්තෙව ආගන්තුං මොදයන්ති නිවාසිනං;
යත්ථ වෙස්සන්තරො රාජා සහ පුත්තෙහි සම්මති.