2664. චිරස්සං වත පස්සාම බ්රාහ්මණං දෙවවණ්ණිනං,
මහාජටං ඛාරිධරං පඞ්කදන්තං රජස්සිරං.

2665. චිරස්සං වත පස්සාම ඉසිං ධම්මගුණෙ රතං,
කාසායවත්තවසනං වාකචීරං පටිච්ඡදං.

2666. ආසනං උදකං පජ්ජං පතිගණ්හාතු නො භවං,
අග්ඝෙ භවන්තං පුච්ඡාම අග්ඝං කුරුතු නො භවං.

2667. අධිච්ච වෙදෙ පරියෙස චිත්තං
පුත්තෙ ගෙහෙ තාත පතිට්ඨපෙත්වා,
ගන්ධෙ රසෙ පච්චනුභුය්ය සබ්බං
අරඤ්ඤං සාධු මුනි සො පසත්ථො.

2668. වෙදා න සච්චා න ච චිත්තලාභො
න පුත්තලාභෙන ජරං විහන්ති,
ගන්ධෙ රසෙ මුඤ්චනමාහු සන්තෙ
සකම්මනා හෙති ඵලූපපත්ති.

2669. අද්ධා හි සච්චං වචනං තවෙතං
සකම්මනා හොති ඵලූපපත්ති
ජිණ්ණා ච මාතාපිතරො තවයිමෙ
පස්සෙය්යු තං වස්සසතං අරොගං.

2670. යස්සස්ස සක්ඛි මරණෙන රාජ
ජරාය මෙත්ති නරවිරියසෙට්ඨ,
යොචාපි ජඤ්ඤා න මරිස්සං කදාචි
පස්සෙය්යු තං වස්සසතං ආරොගං.

2671. යථාපි නාවං පුරිසො දකම්හි
එරෙති චෙනං උපනෙති තීරං,
එවම්පි ව්යාධි සතතං ජරා ච
උපනෙන්ති මච්චං වසමන්තකස්ස.

2672. පඞ්කො ව කාමා පලිපො ච කාමා
මනොහරාදුත්තරා මච්චුධෙය්යා,
එතස්මිං පඞ්කෙ පලිපෙ ව්යසන්නා
හීනත්තරූපා න තරන්ති පාරං.

2673. අයං පුරෙ ලුද්දමකාසි කම්මං
ස්වායං ගහීතො න හි මොක්ඛිතො මෙ,
ඔරුන්ධියානං පරිරක්ඛිස්සාමි
මායං පුනලුද්දමකාසි කම්මං.

2674. ගාවංව නට්ඨං පුරිසො යථා වනෙ
පරියෙසති රාජ අපස්සමානො,
එවං නට්ඨො එසුකාරී මමත්ථො
සොහං කථං න ගවෙසෙය්ය රාජ.

2675. හිය්යොති හීයති පොසො
පරෙථ පරිහායති,
අනාගතං නෙතමත්ථිති ඤත්වා,
උප්පන්නං ඡන්දං කොපනුදෙය්ය ධීරො.

2676. පස්සාමි වොහං දහරිං කුමාරිං
මත්තූපමං කෙතක පුප්ඵනෙත්තං,
අභුත්තභොගෙ පඨමෙ වයස්මිං
ආදාය මච්චු වජතෙ කුමාරිං.

2677. යුවා සුජාතො සුමුඛො සුදස්සනො
සාමො කුසුම්භපරිකිණ්ණමස්සු,
හිත්වාන කාමෙ පටිගච්ච ගෙහං
අනුජාන මං පබ්බජිස්සාමි දෙව.

2678. සාඛාහි රුක්ඛො ලභතෙ සමඤ්ඤං
පහිනසාඛං පන ඛාණුමාහු,
පහීනපුත්තස්ස මමජ්ජ හොති
වාසෙට්ඨි භික්ඛාචරියාය කාලො.

2679. අඝස්මිං කොඤ්චාව යථා හිමච්චයෙ
තන්තානි ජාලානි පදාළෙය්ය හංසා,
ගච්ඡන්ති පුත්තා ච පතී ච මය්හං
සාහං කථං නානුවජෙ පජානං.

2680. එතෙ භුත්වා වමිත්වා ච පක්කමන්ති විහඞ්ගමා,
යෙ ච භුත්වා න වමිංසු තෙ මෙ හත්ථත්ථමාගතා.