2689. යමෙකරත්තිං පඨමං ගබ්භෙ වසති මාණවො,
අබ්භුට්ඨිතොව සයති සගච්ඡං න නිවත්තති.

2690. න යුජ්ඣමානා න බලෙන වස්සිතා
නරා න ජීරන්ති නවාපි මීයරෙ,
සබ්බං හි තං ජාතිජරායුපද්දුතං
තම්මෙ මතී හොති චරාමි ධම්මං.

2691. චතුරඞ්ගිනිං සෙනං සුභිංසරූපං
ජයන්ති රට්ඨාධිපතී පසය්හ,
න මච්චුනො ජයිතුං උස්සහන්ති
තම්මෙ මතී හොති චරාමි ධම්මං.

2692. හත්ථීහි අස්සෙහි රථෙහි පත්තිහි
පරිවාරිතා මුච්චරෙ එකවෙය්යා,
න මච්චුනො මුච්චිතුං උස්සහන්ති
තම්මෙ මතී හොති චරාමි ධම්මං.

2693. හත්ථීහි අස්සෙහි රථෙහි පත්තිහි
සූරා පහඤ්ජන්ති පධංසයන්ති,
න මච්චුනො භඤ්ජිතුං උස්සහන්ති
තම්මෙ මතී හොති චරාමි ධම්මං.

2694. මත්තා ගජා භින්නගළා පභින්නා
නගරානි මද්දන්ති ජනං හනන්ති,
න මච්චුනො මද්දිතුං උස්සහන්ති
තම්මෙ මතී හොති චරාමි ධම්මං.

2695. ඉස්සාසිනො කතහත්ථාපි ධීරා
දූරෙපාතී අක්ඛණවෙධිනොපි,
න මච්චුනො විජ්ඣිතුං උස්සහන්ති
තම්මෙ මතී හොති චරාමි ධම්මං.

2696. සරානි ඛීයන්ති සසෙලකානනා
සබ්බං හි තං ඛීයති දීඝමන්තරං,
සබ්බං හි තං භඤ්ජරෙ කාලපරියං
තම්මෙ මතී හොති චරාමි ධම්මං.

2697. සබ්බෙසමෙවං හි නරානනාරිනං
චලාවලං පාණභුනොධ ජීවිතං,
පටොව ධුත්තස්ස දුමොව කූලජො
තම්මෙ මතී හොති චරාමි ධම්මං.

2698. දුමප්ඵලානෙව පතන්ති මාණවා
දහරා ච වුද්ධා ච සරීරභෙදා,
නාරියො නරා මජ්ඣිමපොරිසා ච
තම්මෙ මතී හොති චරාමි ධම්මං.

2699. නායං වයො තාරකරාජසන්නිභො
යාදබ්භතීතං ගතමෙවදානි තං,
ජිණ්ණස්ස හි නත්ථි රතී කුතො සුඛං
තම්මෙ මතී හොති චරාමි ධම්මං.

2700. යක්ඛා පිසාචා අථවාපි පෙතා
කුපිතාපි තෙ අස්සසන්තී මනුස්සෙ,
න මච්චුනො අස්සසිතුස්සහන්ති
තම්මෙ මතී හොති චරාමි ධම්මං.

2701. යක්ඛෙ පිසාචෙ අථවාපි පෙතෙ
කුපිතෙපි තෙ නිජ්ඣපනං කරොන්ති,
න මච්චුනො නිජ්ඣපනං කරොන්ති
තම්මෙ මතී හොති චරාමි ධම්මං.

2702. අපරාධකෙ හෙඨකෙ දූසකෙ ච
රාජානො දණ්ඩෙන්ති විදිත්වා දොසං,
න මච්චුනො දණ්ඩයිතුස්සහන්ති
තම්මෙ මතී හොති චරාමි ධම්මං.

2703. අපරාධකා දූසකා හෙඨකා ච
ලභන්ති තෙ රාජිනො නිජ්ඣපෙතුං,
න මච්චුනො නිජ්ඣපනං කරොන්ති
තම්මෙ මතී හොති චරාමි ධම්මං.

2704. න ඛත්තියොති න පි බ්රාහ්මණොති
න අඩ්ඪකා බලවා තෙජවාපි,
න මච්චුරාජස්ස අපෙඛමත්ථි
තම්මෙ මතී හොති චරාමි ධම්මං.