2328. කුතො නු ආගච්ඡසි රුම්මවාසී
ඔතල්ලකො පංසුපිසාචකොව,
සඞ්කාරචොළං පටිමුච්ච කණ්ඨෙ
කො රෙ තුවං හොහිසි අදක්ඛිණෙය්යො.

2329. අන්නං තව ඉදං පකතං යසස්සී
තං ඛජ්ජරෙ භුඤ්ජරෙ පිය්යරෙ ච,
ජානාසි මං ත්වං පරදත්තූපජීවිං
උත්තිට්ඨපිණ්ඩං ලභතං සපාකො.

2330. අන්නං මම ඉදං පකතං බ්රාහ්මණානං
අත්තත්ථාය සද්දහතො මමයිදං,
අපෙහි එත්තො කිමිධට්ඨිතොසි
න මාදිසා තුය්හං දදන්ති ජම්ම.

2331. ථලෙ ච නින්නෙ ච වපන්ති බීජං
අනූපඛෙත්තෙ ඵලමාසසානා,
එතාය සද්ධාය දදාහි දානං
අප්පෙව ආරාධයෙ දක්ඛිණෙය්යෙ.

2332. ඛෙත්තානි මය්හං විදිතානි ලොකෙ
යෙසාහං බීජානි පතිට්ඨපෙමි,
යෙ බ්රාහ්මණා ජාතිමන්තූපපන්නා
තානීධ ඛෙත්තානි සුපෙසලානී.

2333. ජාතිමදො ව අතිමානිතා ච
ලොභො ච දොසො ච මදො ච මොහො,
එතෙ අගුණා යෙසු වසන්ති සබ්බෙ,
තානීධ ඛෙත්තානි අපෙසලානි.

2334. ජාතිමදො ව අතිමානිතා ච
ලොභො ච දොසො ච මදො ච මොහො,
එතෙ අගුණා යෙසු න සන්ති සබ්බෙ,
තානීධ ඛෙත්තානි සුපෙසලානි.

2335. කෙවත්ථ ගතා උපජොතියො ච
උපජ්ඣායො අථවා භණ්ඩකුච්ඡි,
ඉමස්ස දණ්ඩඤ්ච වධඤ්ච දත්වා
ගලෙ ගහෙත්වා ඛලයාථ ජම්මං.

2336. ගිරං නඛෙන ඛණසි අයො දන්තෙන ඛාදසි,
ජාතවෙදං පදහසි යො ඉසිං පරිභාසසි.

2337. ඉදං වත්වාන මාතඞ්ගො ඉසි සච්චපරක්කමො,
අන්තලික්ඛස්මිං පක්කාමි බ්රාහ්මණානං උදික්ඛතං.

2338. ආවෙඨිතං පිට්ඨිතො උත්තමඞ්ගං
බාහං පසාරෙති අකම්මනෙය්යං
සෙතානි අක්ඛීනි යථා මතස්ස
කො මෙ ඉමං පුත්තමකාසි එවං.

2339. ඉධාගමා සමණො රුම්මවාසී
ඔතල්ලකො පංසුපිසාචකොව
සඞ්කාරචොළං පටිමුච්ච කණ්ඨෙ
සො තෙ ඉමං පුත්තමකාසි එවං.

2340. කතමං දිසං අගමා භූරිපඤ්ඤො
අක්ඛාථ මෙ මාණවා එතමත්ථං
ගන්ත්වාන තං පටිකිරියෙමු අච්චයං
අප්පෙව නං පුත්තං ලභෙමු ජීවිතං.

2341. වෙහාසයං අගමා භූරිපඤ්ඤො
පථද්ධුනො පණ්ණරසෙව චන්දො,
අපිචාපි සො පුරිමං දිසං අගඤ්ඡි
සච්චප්පටිඤ්ඤො ඉසි සාධුරූපො.