1. සංග්‍රහ අසංග්‍රහ පද නිර්‍දෙශය
1. රූපස්කන්‍ධය කෙතෙක් ස්කන්‍ධයන් විසින් කෙතෙක් ආයතනයන් විසින් කෙතෙක් ධාතූන් විසින් සඞ්ගෘහීත ද යත්:
රූපස්කන්‍ධය එක්මැ රූපස්කන්‍ධය විසින් එකොළොස් ආයතනයෙකින් එකොළොස් ධාතුයෙකින් සඞ්ගෘහීත යි.
(ස්කන්‍ධාදී) කෙතෙකින්, සඞ්ගෘහීත නොවේ ද යත්: සතර නාමස්කන්‍ධයන් විසින් එක් මැ මනායතනය විසින් සප්ත විඥාන ධාතූන් විසින් අසඞ්ගෘහීත යි.
2. වේදනාස්කන්‍ධය කෙතෙක් ස්කන්‍ධයන් විසින් කෙතෙක් ආයතනයන් විසින් කෙතෙක් ධාතූන් විසින් සඞ්ගෘහීත ද යත්:
වේදනාස්කන්‍ධය එක් මැ වේදනාස්කන්‍ධය විසින්, එක් මැ ධර්‍මායතනය විසින් එක් මැ ධර්‍මධාතුව විසින් සඞ්ගෘහීත යි.
(ස්කන්‍ධාදී) කෙතෙකින් අසඞ්ගෘහීත ද යත්: සතර ස්කන්‍ධයෙකින් එකොළොස් ආයතනයෙකින් සතළොස් ධාතුයෙකින් අසඞ්ගෘහීත යි.
3. සංඥාස්කන්‍ධය කෙතෙක් ස්කන්‍ධයන් විසින් කෙතෙක් ආයතනයන් විසින් කෙතෙක් ධාතූන් විසින් සඞ්ගෘහීත ද යත්:
සංඥාස්කන්‍ධය එක් මැ සංඥාස්කන්‍ධය විසින් එක් මැ ධර්‍මායතනය විසින් එක් මැ ධර්‍මධාතුව විසින් සඞ්ගෘහීත යි.
(ස්කන්‍ධාදී) කෙතෙකින් අසඞ්ගෘහීත ද යත්: සතර ස්කන්‍ධයෙකින් එකොළොස් ආයතනයෙකින් සතළොස් ධාතුයෙකින් අසඞ්ගෘහීත යි.
4. සංස්කාරස්කන්‍ධය කෙතෙක් ස්කන්‍ධයන් විසින්, කෙතෙක් ආයතනයන් විසින්, කෙතෙක් ධාතුන් විසින් සඞ්ගෘහීත ද යත්:
සංස්කාර ස්කන්‍ධය එක් මැ සංස්කාර ස්කන්‍ධය විසින් එක් මැ ධර්‍මායතනය විසින් එක් මැ ධර්‍මධාතුව විසින් සඞ්ගෘහීත යි.
කෙතෙකින් අසඞ්ගෘහීත ද යත්: සතර ස්කන්‍ධයකින් එකොළොස් ආයතනයකින් සතළොස් ධාතුයෙකින් අසඞ්ගෘහීත යි.
5. විඥානස්කන්‍ධය කෙතෙක් ස්කන්‍ධයන් විසින් කෙතෙක් ආයතනයන් විසින් කෙතෙක් ධාතූන් විසින් සඞ්ගෘහීත ද යත්:
විඥාන ස්කන්‍ධය එක් මැ විඥානස්කන්‍ධය විසින් එක් මැ මනායතනය විසින් සප්ත විඥාන ධාතූන් විසින් සඞ්ගෘහීත යි.
කෙතෙකින් අසඞ්ගෘහීත ද යත්: සතර ස්කන්‍ධයකින් එකොළොස් ආයතනයකින් එකොළොස් ධාතුයෙකින් අසඞ්ගෘහීත යි.
6. රූපස්කන්‍ධයත් වේදනාස්කන්‍ධයත් කෙතෙක් ස්කන්‍ධයන් විසින් කෙතෙක් ආයතනයන් විසින් කෙතෙක් ධාතූන් විසින් සඞ්ගෘහීත ද යත්:
රූපස්කන්‍ධයත් වේදනාස්කන්‍ධයත් (රූප - වේදනා යන) ස්කන්‍ධයන් දෙදෙනා විසින් එකොළොස් ආයතනයෙකින් එකොළොස් ධාතුයෙකින් සඞ්ගෘහීත වෙති.
(ස්කන්‍ධාදි) කෙතෙකින් අසඞ්ගෘහීත ද යත්: ස්කන්‍ධ තුනෙකින් එක් මැ මනායතනයෙන් සප්තවිඥානධාතූන් විසින් අසඞ්ගෘහීත වෙත්.
7. රූපස්කන්‍ධයත් සංඥාස්කන්‍ධයත් ... (රූප - සංඥා යන) ස්කන්‍ධ දෙකින් එකොළොස් ආයතනයෙකින් එකොළොස් ධාතුයෙකින් සඞ්ගෘහීත වෙති.
කෙතෙකින් අසඞ්ගෘහීත ද යත්: ස්කන්‍ධ තුනකින් එක් මැ මනායතනයෙන් සප්තවිඥානධාතූන් විසින් අසඞ්ගෘහීත වෙත්.
8. රූපස්කන්‍ධයත් සංස්කාරස්කන්‍ධයත් –පෙ– (රූප සංස්කාර යන) ස්කන්‍ධ දෙකින් එකොළොස් ආයතනයෙකින් එකොළොස් ධාතුයෙකින් සඞ්ගෘහීත වෙති.
කෙතෙකින් අසඞ්ගෘහීත ද යත්: ස්කන්‍ධ තුනෙකින් එක් මනායතනය විසින් සප්තවිඥානධාතූන් විසින් අසඞ්ගෘහීත වෙත්.
9. රූපස්කන්‍ධයත් විඥානස්කන්‍ධයත් ... (රූප – විඥාන යන) ස්කන්‍ධ දෙකින් දොළොස් ආයතනයන් විසින් අටළොස් ධාතූන් විසින් සඞ්ගෘහීත වෙති.
කෙතෙකින් අසඞ්ගෘහීත ද යත්: ස්කන්‍ධ තුනෙකින් අසඞ්ගෘහීත වෙති. කිසි ආයතන කෙනකුන් විසින් කිසි ධාතු කෙනකුන් විසින් අසඞ්ගෘහීත නො වෙත්.