6. 2. 3. 3.
[උත්තරිමනුස්සධම්ම සූත්‍රය]
[සැවැත්නිදාන යි]
23. මහණෙනි, ධර්‍ම සයක් ප්‍රහීණ නො කොට මනුෂ්‍යධර්‍මයෙන් මතුයෙහි ආර්‍ය්‍යභාවය ගෙණදීමට සමත් ඥානදර්‍ශන විශේෂය පසක් කරන්නට අභව්‍ය වෙයි. කවර සයක යත්:
මුළාසිහි ඇති බව ය, විමසුම් නුවණ නැති බව ය, ඉඳුරන්හි නො පියූ දොර ඇති බව ය, බොජුන්හි පමණ නො දන්නා බව ය, කොහොන් වත් ය, (සිවුපස සඳහා අනුන් උස් හෝ පාත් හෝ කොට කරණ කථා නමැති) ලපනා යි.
missing trans
මහණෙනි, ධර්‍ම සයක් ප්‍රහීණ කොට උත්තරිමනුෂ්‍යධර්‍මයෙන් ආර්‍ය්‍යභාවකරණයට සමත් ඥානදර්‍ශනවිශේෂය පසක් කරන්නට භව්‍ය වෙයි. කවර සයෙක යත්:
මුළාසිහි ඇති බව ය විමසුම් නුවණ නැති බව ය ඉඳුරන්හි පියූ දොර ඇති බව ය භෝජනයෙහි පමණ නොදන්න බව ය කුහනා ය ලපනා යි.
මහණෙනි, මෙ දහම් සය පහා මිනිස්දමින් මතුයෙහි ආර්‍ය්‍යභාවකරණයට සමත් ඥානදර්‍ශන විශේෂය පසක් කිරීමට භව්‍ය වේ ය යි.
6. 2. 3. 4.
[සුඛසෝමනස්ස සූත්‍රය]
[සැවැත්නිදාන යි]
24. මහණෙනි, කරුණු සයෙකින් සමන්‍වාගත මහණ දිටුදැමියෙහි ම සුවසොම්නස් බහුල කොට ඇති ව වෙසෙයි. ඔහු විසින් ආස්‍රවයන්ගේ ක්‍ෂය සඳහා කාරණය ද (පරිපූර්‍ණ කොට) අරඹන ලද වේ ය යි. කවර සයෙකින යත්:
මහණෙනි, මෙ සස්නෙහි මහණ ධර්‍මාරාම (ධර්‍මයෙහි ඇලුනේ) වෙයි. භාවනාරාම (භාවනායෙහි ඇලුනේ) වෙයි. ප්‍රහාණාරාම (කෙලෙස් පහකිරී මෙහි ඇලුනේ) වෙයි. ප්‍රවිවේකාරාම (කායචිත්තඋපධි විවේකයෙහි ඇලුනේ) වෙයි. අව්‍යාපද්‍යාරාම වෙයි. නිෂ්ප්‍රපඤ්චාරාම (නිවනෙහි ඇලුනේ) වෙයි.
මහණෙනි, මෙ දම් සයෙන් යුත් මහණ දිටුදැමියෙහි ම සුව සොම්නස් බිහිලි කොට වෙසෙයි. ආස්‍රවක්‍ෂය පිණිස කාරණය ද (පරිපූර්‍ණ කොට) අරඹන ලද වේ ය යි.
6. 2. 3. 5.
[අධිගම සූත්‍රය]
[සැවැත්නිදාන යි]
25. මහණෙනි, කරුණු සයෙකින් යුත් මහණ නො ලද අධිකුශල ධර්‍මය ලබන්නට හෝ ලද කුශලධර්‍මය වඩන්නට හෝ අභව්‍ය වෙයි. කවර සයෙකින යත්:
මහණෙනි, මෙ සස්නෙහි මහණ ආගමන (අයෙහි) කුශල නො වෙයි. අපගමන (වැයෙහි) කුශල නො වෙයි. උපායකුශල නො වෙයි. නො ලත් කුසල්දහමුන්ගේ අධිගමය (ලැබීම) පිණිස කත්තුකාමතාකුසලච්ඡන්‍දය නො උපදවයි. අධිගත කුශල ධර්‍මයන් නො රක්නේ වෙයි. සාතත්‍ය (නිරන්තර) ක්‍රියායෙන් කුසල් දහම් නො සපයන්නේ වෙයි.
මහණෙනි, මෙ ධර්‍ම සයෙන් සමන්‍වාගත මහණ නො ලත් කුශලධර්‍මය ලබන්නට හෝ ලද කුශලධර්‍මය වඩන්නට හෝ අභව්‍ය වෙයි.
මහණෙනි, කරුණු සයෙකින් සමන්‍වාගත මහණ නො ලද කුශලධර්‍මය ලබන්නට හෝ ලද කුශලධර්‍මය වඩන්නට හෝ භව්‍ය වෙයි. කවර සයෙකින යත්:
මහණෙනි, මෙ සස්නෙහි මහණ ආයකුශල ද වෙයි, අපායකුශල ද වෙයි, උපායකුශල ද වෙයි, අනධිගත කුශලධර්‍මයන්ගේ අධිගමය සඳහා ඡන්‍දය උපදවයි, අධිගත කුශල ධර්‍මයන් රක්නේ වෙයි, සතතක්‍රියායෙන් සපයන්නේ වෙයි.
මහණෙනි, මෙ ධර්‍ම සයෙන් සමන්‍වාගත මහණ නො ලත් කුසල්දහම් ලබන්නට ද ලත් කුසල්දහම් වඩන්නට ද භව්‍ය වන්නේ ය යි.
6. 2. 3. 6.
[මහන්තත්ත සූත්‍රය]
[සැවැත්නිදාන යි]
26. මහණෙනි, කරුණු සයෙකින් සමන්‍වාගත මහණ නො බෝකලෙකින් ම ධර්‍මයන්හි මහද්භාවයට විපුලභාවයට පැමිණේ. කවර සයෙකින යත්:
මහණෙනි, මෙ සස්නෙහි මහණ ඥානාලෝක බහුල කොට ඇතියේ වෙයි, භාවනානුයෝග බහුල කොට ඇතියේ වෙයි, ප්‍රීතිප්‍රාමෝද්‍ය බහුල කොට ඇතියේ වෙයි. කුශලධර්‍මයන්හි අසන්තුෂ්ටි (නො සෑහීම) බහුල කොට ඇතියේ වෙයි, කුශලධර්‍මයන්හි නො බහාතැබූ (අත් නො හළ) වීර්‍ය්‍යය ඇතියේ වෙයි, දැනුදු මතුයෙහිදු වීර්‍ය්‍යය කෙරේ මැ යි.
මහණෙනි, මෙ දහම් සයෙන් සමන්‍වාගත මහණ නො බෝකලෙකින් ම ධර්‍මයන්හි මහත්ත්‍වයට විපුලත්‍වයට පැමිණේ ය යි.
6. 2. 3. 7.
[පඨම නිරය සූත්‍රය]
[සැවැත්නිදාන යි]
27. මහණෙනි, කරුණු සයෙකින් සමන්‍වාගත වූයේ ගෙණවුත් බහා තැබුවක් යම්සේ නම් එ සෙයින් නිරයෙහි (උපදනේ) වෙයි. කවර සයෙකින යත්:
පණිවා කරණුයේ වෙයි, අයිනාදන් ඇතියේ වෙයි, කාමයෙහි මිසහසර ඇතියේ වෙයි, මුසවා කියන සුලුයේ වෙයි, ලමු ආශා ඇතියේ වෙයි, මිසදිටු ඇතියේ වෙයි.