9. 1. 3.
කස්සපගොත්තසුත්තං.
223. එකං සමයං ආයස්මා කස්සපගොත්තො කොසලෙසු විහරති අඤ්ඤතරස්මිං වනසණ්ඩෙ. තෙන ඛො පන සමයෙන ආයස්මා කස්සපගොත්තො දිවාවිහාරගතො අඤ්ඤතරං වෙතං ඔවදති.
අථ ඛො යා තස්මිං වනසණ්ඩෙ අධිවත්ථා දෙවතා ආයස්මතො කස්සපගොත්තස්ස අනුකම්පිකා අත්ථකාමා ආයස්මං කස්සපගොත්තං සංවෙජෙතුකාමා යෙනායස්මා කස්සපගොත්තො තෙනුපසඞ්කමි. උපසඞ්කමිත්වා ආයස්මන්තං කස්සපගොත්තං ගාථාහි අජ්ඣභාසි:
ගිරිදුග්ගචරං චෙතං අප්පපඤ්ඤං අචෙතසං,
අකාලෙ ඔවදං භික්ඛු මන්දො’ව පටිභාති මං.
සුණාති න විජානාති ආලොකෙති න පස්සති,
ධම්මස්මිං භඤ්ඤමානස්මිං අත්ථං බාලො න බුජ්ඣති.
සචෙපි දස පජ්ජොතෙ ධාරයිස්සසි කස්සප,
නෙව දක්ඛිති රූපානි චක්ඛු හි’ස්ස න විජ්ජතීති.
අථ ඛො ආයස්මා කස්සපගොත්තො තාය දෙවතාය සංවෙජිතො සංවෙගමාපාදීති.
9. 1. 4.
සම්බහුලාසුත්තං.
224. එකං සමයං සම්බහුලා භික්ඛූ කොසලෙසු විහරන්ති අඤ්ඤතරස්මිං වනසණ්ඩෙ. අථ ඛො තෙ භික්ඛූ වස්සං වුත්ථා තෙමාසච්චයෙන චාරිකං පක්කමිංසු. අථ ඛො යා තස්මිං වනසණ්ඩෙ අධිවත්ථා දෙවතා තෙ භික්ඛූ අපස්සන්තී පරිදෙවමානා තායං වෙලායං ඉමං ගාථං අභාසි:
අරති විය මෙ’ජ්ජ ඛායති බහුකෙ දිස්වාන විවිත්තෙ ආසනෙ,
තෙ චිත්තකථා බහුස්සුතා කො’මෙ ගොතමසාවකා ගතාති.
එවං වුත්තෙ අඤ්ඤතරා දෙවතා තං දෙවතං ගාථාය අජ්ඣභාසි:
මගධං ගතා කොසලං ගතා එකච්චියා පන වජ්ජිභූමියා,
මගා විය අසඞ්ගචාරිනො අනිකෙතා විහරන්ති භික්ඛවොති.
9. 1. 5.
ආනන්දසුත්තං.
225. එකං සමයං ආයස්මා ආනන්දො කොසලෙසු විහරති අඤ්ඤතරස්මිං වනසණ්ඩෙ.
තෙන ඛො පන සමයෙන ආයස්මා ආනන්දො අතිවෙලං ගිහීසඤ්ඤත්තිබහුලො විහරති.
අථ ඛො යා තස්මිං වනසණ්ඩෙ අධිවත්ථා දෙවතා ආයස්මතො ආනන්දස්ස අනුකම්පිකා අත්ථකාමා ආයස්මන්තං ආනන්දං සංවෙජෙතුකාමා යෙනායස්මා ආනන්දො තෙනුපසඞ්කමි. උපසඞ්කමිත්වා ආයස්මන්තං ආනන්දං ගාථාය අජ්ඣභාසි:
රුක්ඛමූලගහණං පසක්කිය නිබ්බානං හදයස්මිං ඔපිය,
ඣාය ගොතම මා ච පමාදො කිං තෙ බිළිබිළිකා කරිස්සතීති.
අථ ඛො ආයස්මා ආනන්දො තාය දෙවතාය සංවෙජිතො සංවෙගමාපාදීති.
9. 1. 6.
අනුරුද්ධසුත්තං.
226. එකං සමයං ආයස්මා අනුරුද්ධො කොසලෙසු විහරති අඤ්ඤතරස්මිං වනසණ්ඩෙ. අථ ඛො අඤ්ඤතරා තාවතිංසකායිකා දෙවතා ජාලිනී නාම ආයස්මතො අනුරුද්ධස්ස පුරාණදුතියිකා යෙනායස්මා අනුරුද්ධො තෙනුපසඞ්කමි. උපසඞ්කමිත්වා ආයස්මන්තං අනුරුද්ධං ගාථාහි අජ්ඣභාසි:
තත්ථ චිත්තං පණිධෙහි යත්ථ තෙ වුසිතං පුරෙ,
තාවතිංසෙසු දෙවෙසු සබ්බකාමසමිද්ධිසු,
පුරක්ඛතො පරිවුතො දෙවකඤ්ඤාහි සොභසීති.