5. 1. 7.
උපචාලාසුත්තං.
168. සාවත්ථියං–
අථ ඛො උපචාලා භික්ඛුනී පුබ්බණ්හසමයං නිවාසෙත්වා පත්තචීවරමාදාය සාවත්ථිං පිණ්ඩාය පාවිසි. සාවත්ථියං පිණ්ඩාය චරිත්වා පච්ඡාභත්තං පිණ්ඩපාතපටික්කන්තා යෙන අන්ධවනං තෙනුපසඞ්කමි දිවාවිහාරාය. අන්ධවනං අජ්ඣොගහෙත්වා අඤ්ඤතරස්මිං රුක්ඛමූලෙ දිවාවිහාරං නිසීදි.
අථ ඛො මාරො පාපිමා යෙන උපචාලා භික්ඛුනී තෙනුපසඞ්කමි. උපසඞ්කමිත්වා උපචාලං භික්ඛුනිං එතදවොච:
කත්ථ නු ත්වං භික්ඛුනී උප්පජ්ජිතුකාමාති?
[උපචාලා:]
න ඛ්වාහං ආවුසො කත්ථචි උප්පජ්ජිතුකාමාති.
[මාරො:]
තාවතිංසා ච යාමා ච තුසිතා චාපි දෙවතා,
නිම්මාණරතිනො දෙවා යෙ දෙවා වසවත්තිනො,
තත්ථ චිත්තං පණිධෙහි රතිං පච්චනුභොස්සසීති.
නිම්මාණරතිනො දෙවා යෙ දෙවා වසවත්තිනො,
තත්ථ චිත්තං පණිධෙහි රතිං පච්චනුභොස්සසීති.
[උපචාලා:]
තාවතිංසා ච යාමා ච තුසිතා චාපි දෙවතා,
නිම්මාණරතිනො දෙවා යෙ දෙවා වසවත්තිනො,
කාමබන්ධනබද්ධා තෙ එන්ති මාරවසං පුන.
නිම්මාණරතිනො දෙවා යෙ දෙවා වසවත්තිනො,
කාමබන්ධනබද්ධා තෙ එන්ති මාරවසං පුන.
සබ්බො ආදීපිතො ලොකො සබ්බො ලොකො පධූපිතො,
සබ්බො පජ්ජලිතො ලොකො සබ්බො ලොකො පකම්පිතො.
සබ්බො පජ්ජලිතො ලොකො සබ්බො ලොකො පකම්පිතො.
අකම්පිතං අජලිතං අපුථුජ්ජනසෙවිතං,
අගති යත්ථ මාරස්ස තත්ථ මෙ නිරතො මනොති.
අගති යත්ථ මාරස්ස තත්ථ මෙ නිරතො මනොති.
අථ ඛො මාරො පාපිමා -පෙ- තත්ථෙවන්තරධායීති.
5. 1. 8.
සීසූපචාලාසුත්තං
169. සාවත්ථියං–
අථ ඛො සීසූපචාලා භික්ඛුනී පුබ්බන්හසමයං නිවාසෙත්වා පත්තචීවරමාදාය සාවත්ථිං පිණ්ඩාය පාවිසි. සාවත්ථියං පිණ්ඩාය චරිත්වා පච්ඡාභත්තං පිණ්ඩපාතපටික්කන්තා යෙන අන්ධවනං තෙනුපසඞ්කමි දිවාවිහාරාය. අන්ධවනං අජ්ඣොගහෙත්වා අඤ්ඤතරස්මිං රුක්ඛමූලෙ දිවාවිහාරං නිසීදි.
අථ ඛො මාරො පාපිමා යෙන සීසූපචාලා භික්ඛුනී තෙනුපසඞ්කමි. උපසඞ්කමිත්වා සීසූපචාලං භික්ඛුනිං එතදවොච:
කස්ස නු ත්වං භික්ඛුනී පාසණ්ඩං රොචෙසීති?
[සීසූපචාලා:]
න ඛ්වාහං ආවුසො කස්සචි පාසණ්ඩං රොචෙමීති,
[මාරො:]
කින්නු උද්දිස්ස මුණ්ඩාසි සමණී විය දිස්සසි,
න ච රොචෙසි පාසණ්ඩං කිමිව චරසි මොමූහාති.
න ච රොචෙසි පාසණ්ඩං කිමිව චරසි මොමූහාති.