5. 1. 8.
සීසූපචාලාසුත්තං
169. සාවත්ථියං–
අථ ඛො සීසූපචාලා භික්ඛුනී පුබ්බන්හසමයං නිවාසෙත්වා පත්තචීවරමාදාය සාවත්ථිං පිණ්ඩාය පාවිසි. සාවත්ථියං පිණ්ඩාය චරිත්වා පච්ඡාභත්තං පිණ්ඩපාතපටික්කන්තා යෙන අන්ධවනං තෙනුපසඞ්කමි දිවාවිහාරාය. අන්ධවනං අජ්ඣොගහෙත්වා අඤ්ඤතරස්මිං රුක්ඛමූලෙ දිවාවිහාරං නිසීදි.
අථ ඛො මාරො පාපිමා යෙන සීසූපචාලා භික්ඛුනී තෙනුපසඞ්කමි. උපසඞ්කමිත්වා සීසූපචාලං භික්ඛුනිං එතදවොච:
කස්ස නු ත්වං භික්ඛුනී පාසණ්ඩං රොචෙසීති?
[සීසූපචාලා:]
න ඛ්වාහං ආවුසො කස්සචි පාසණ්ඩං රොචෙමීති,
[මාරො:]
කින්නු උද්දිස්ස මුණ්ඩාසි සමණී විය දිස්සසි,
න ච රොචෙසි පාසණ්ඩං කිමිව චරසි මොමූහාති.
[සීසූපචාලා:]
ඉතො බහිද්ධා පාසණ්ඩා දිට්ඨීසු පසීදන්ති තෙ,
න තෙසං ධම්මං රොචෙමි න තෙ ධම්මස්ස කොවිදා.
අත්ථි සක්යකුලෙ ජාතො බුද්ධො අප්පටිපුග්ගලො,
සබ්බාභිභූ මාරනුදො සබ්බත්ථමපරාජිතො,
සබ්බත්ථ මුත්තො අසිතො සබ්බං පස්සති චක්ඛුමා.
සබ්බකම්මක්ඛයප්පත්තො විමුත්තො උපධිසඞ්ඛයෙ,
සො මය්හං භගවා සත්ථා තස්ස රොචෙමි සාසනන්ති.
අථ ඛො මාරො පාපිමා -පෙ- තත්ථෙවන්තරධායීති.
5. 1. 9.
සෙලාසුත්තං.
170. සාවත්ථියං–
අථ ඛො සෙලා භික්ඛුනී පුබ්බණ්හසමයං නිවාසෙත්වා පත්තචීවරමාදාය සාවත්ථිං පිණ්ඩාය පාවිසි. සාවත්ථියං පිණ්ඩාය චරිත්වා පච්ඡාභත්තං පිණ්ඩපාතපටික්කන්තා යෙන අන්ධවනං තෙනුපසඞ්කමි දිවාවිහාරාය. අන්ධවනං අජ්ඣොගහෙත්වා අඤ්ඤතරස්මිං රුක්ඛමූලෙ දිවාවිහාරං නිසීදි.
අථ ඛො මාරො පාපිමා සෙලාය භික්ඛුනියා භයං ඡම්භිතත්තං ලොමහංසං උප්පාදෙතුකාමො සමාධිම්හා චාවෙතුකාමො යෙන සෙලා භික්ඛුනී තෙනුපසඞ්කමි. උපසඞ්කමිත්වා සෙලං භික්ඛුනිං ගාථාය අජ්ඣභාසි:
කෙනිදං පකතං බිම්බං ක්වන්නු බිම්බස්ස කාරකො,
ක්වන්නු බිම්බං සමුප්පන්නං ක්වන්නු බිම්බං නිරුජ්ඣතීති.
අථ ඛො සෙලාය භික්ඛුනියා එතදහොසි: කො නු ඛ්වායං මනුස්සො වා අමනුස්සො වා ගාථං භාසතීති. අථ ඛො සෙලාය භික්ඛුනියා එතදහොසි: මාරො ඛො අයං පාපිමා. මම භයං ඡම්භිතත්තං ලොමහංසං උප්පාදෙතුකාමො සමාධිම්හා චාවෙතුකාමො ගාථං භාසතීති. අථ ඛො සෙලා භික්ඛුනී මාරො අයං පාපිමා ඉති විදිත්වා මාරං පාපිමන්තං ගාථාහි පච්චභාසි:
නයිදං අත්තකතං බිම්බං නයිදං පරකතං අඝං,
හෙතුං පටිච්ච සම්භූතං හෙතුභඞ්ගා නිරුජ්ඣති.
යථා අඤ්ඤතරං බීජං ඛෙත්තෙ වුත්තං විරූහති,
පඨවීරසඤ්ච ආගම්ම සිනෙහඤ්ච තදූභයං.
එවං ඛන්ධා ච ධාතුයො ඡ ච ආයතනා ඉමෙ,
හෙතුං පටිච්ච සම්භූතා හෙතුභඞ්ගා නිරුජ්ඣරෙති.
අථ ඛො මාරො පාපිමා -පෙ- තත්ථෙවන්තරධායීති.