2. 2. 10.
අනාථපිණ්ඩිකසුත්තං.
101. සාවත්ථියං–
එකමන්තං ඨිතො ඛො අනාථපිණ්ඩිකො දෙවපුත්තො භගවතො සන්තිකෙ ඉමා ගාථායො අභාසි:
ඉදං හි තං ජෙතවනං ඉසිසඞ්ඝනිසෙවිතං,
ආවුත්ථං ධම්මරාජෙන පීතිසඤ්ජනනං මම.
ආවුත්ථං ධම්මරාජෙන පීතිසඤ්ජනනං මම.
කම්මං විජ්ජා ච ධම්මො ච සීලං ජීවිතමුත්තමං,
එතෙන මච්චා සුජ්ඣන්ති න ගොත්තෙන ධනෙන වා.
එතෙන මච්චා සුජ්ඣන්ති න ගොත්තෙන ධනෙන වා.
තස්මා හි පණ්ඩිතො පොසො සම්පස්සං අත්ථමත්තනො,
යොනිසො විචිනෙ ධම්මං එවං තත්ථ විසුජ්ඣති.
යොනිසො විචිනෙ ධම්මං එවං තත්ථ විසුජ්ඣති.
සාරිපුත්තොව පඤ්ඤාය සීලෙන උපසමෙන ච,
යොපි පාරගතො භික්ඛු එතාව පරමො සියාති.
යොපි පාරගතො භික්ඛු එතාව පරමො සියාති.
ඉදමවොච අනාථපිණ්ඩිකො දෙවපුත්තො. ඉදං වත්වා භගවන්තං අභිවාදෙත්වා පදක්ඛිණං කත්වා තත්ථෙවන්තරධායී.
අථ ඛො භගවා තස්සා රත්තියා අච්චයෙන භික්ඛූ ආමන්තෙසි. ඉමං භික්ඛවෙ රත්තිං අඤ්ඤතරො දෙවපුත්තො අභික්කන්තාය රත්තියා අභික්කන්තවණ්ණො කෙවලකප්පං ජෙතවනං ඔභාසෙත්වා යෙනාහං තෙනුපසඞ්කමි. උපසඞ්කමිත්වා මං අභිවාදෙත්වා එකමන්තං අට්ඨාසි. එකමන්තං ඨිතො ඛො භික්ඛවෙ සො දෙවපුත්තො මම සන්තිකෙ ඉමා ගාථායො අභාසි:
“ඉදං හි තං ජෙතවනං ඉසිසඞ්ඝනිසෙවිතං,
ආවුත්ථං ධම්මරාජෙන පීතිසඤ්ජනනං මම.
ආවුත්ථං ධම්මරාජෙන පීතිසඤ්ජනනං මම.
කම්මං විජ්ජා ච ධම්මො ච සීලං ජීවිතමුත්තමං,
එතෙන මච්චා සුජ්ඣන්ති න ගොත්තෙන ධනෙන වා.
එතෙන මච්චා සුජ්ඣන්ති න ගොත්තෙන ධනෙන වා.
තස්මා හි පණ්ඩිතො පොසො සම්පස්සං අත්ථමත්තනො,
යොනිසො විචිනෙ ධම්මං එවං තත්ථ විසුජ්ඣති.
යොනිසො විචිනෙ ධම්මං එවං තත්ථ විසුජ්ඣති.
සාරිපුත්තොව පඤ්ඤාය සීලෙන උපසමෙන ච,
යොපි පාරගතො භික්ඛු එතාව පරමො සියාති.
යොපි පාරගතො භික්ඛු එතාව පරමො සියාති.
ඉදමවොච භික්ඛවෙ සො දෙවපුත්තො. ඉදං වත්වා මං අභිවාදෙත්වා පදක්ඛිණං කත්වා තත්ථෙවන්තරධායීති.
එවං වුත්තෙ ආයස්මා ආනන්දො භගවන්තං එතදවොච: සො හි නූන භන්තෙ අනාථපිණ්ඩිකො දෙවපුත්තො භවිස්සති. අනාථපිණ්ඩිකො ගහපති ආයස්මන්තෙ සාරිපුත්තෙ අභිප්පසන්නො අහොසීති.
සාධු සාධු ආනන්ද යාවතකං ඛො ආනන්ද තක්කාය පත්තබ්බං අනුප්පත්තං තයා. අනාථපිණ්ඩිකො හි සො ආනන්ද දෙවපුත්තොති.
අනාථපිණ්ඩිකවග්ගො දුතියො.
තත්රුද්දානං:
චන්දිමසො ච වෙණ්හු ච දීඝලට්ඨි ච නන්දනො
චන්දනො වසුදත්තො ච සුබ්රහ්මා කකුධෙන ච,
උත්තරො නවමො වුත්තො දසමො අනාථපිණ්ඩිකොති.
චන්දනො වසුදත්තො ච සුබ්රහ්මා කකුධෙන ච,
උත්තරො නවමො වුත්තො දසමො අනාථපිණ්ඩිකොති.