982. දළ්හධම්මා නිසාරස්ස ධනුං ඔලුබ්භ තිට්ඨසි,
ඛත්තියො නු සි රාජඤ්ඤො ආදු ලුද්දො වනෙ චරොති.

983. අස්සකාධිපස්සාහං භන්තෙ පුත්තො වනෙ චරො,
නාමං මෙ භික්ඛු තෙ බ්රූමි සුජාතො ඉති මං විදුං.

984. මිගෙ ගවෙසමානොහං ඔගාහන්තො බ්රහාවනං,
මිගං කඤ්චෙව නාද්දක්ඛිං තඤ්ච දිස්වා ඨිතො අහන්ති.

985. ස්වාගතං තෙ මහාපුඤ්ඤ අථො තෙ අදුරාගතං,
එත්තො උදකමාදාය පාදෙ පක්ඛාලයස්සු තෙ.

986. ඉදම්පි පානීයං සීතං ආභතං ගිරිගබ්භරා,
රාජපුත්ත තතො පීත්වා සත්ථතස්මිං උපාවිසාති.

987. කල්යාණී වත තෙ වාචා සවණීයා මහාමුනි,
නෙලා චත්ථවතී වග්ගු මන්ත්වා අත්ථංච භාසසෙ

988. කා තෙ රති වනෙ විහරතො
ඉසිනිසභ වදෙහි පුට්ඨො
තව වචනපථං නිසාමයිත්වා
අත්ථධම්මපදං සමාචරෙමසෙති.

989. අහිංසා සබ්බපාණිනං කුමාරම්හාක රුච්චති.
ථෙය්යා ච අතිචාරාව මජ්ජපානා ච ආරති.

990. ආරති සමචරියා ච බාහුසච්චං කතඤ්ඤුතා,
දිට්ඨෙව ධම්මෙ පාසංසා ධම්මා එතෙ පසංසියාති.

991. සන්තිකෙ මරණං තුය්හං ඔරං මාසෙහි පඤ්චහි,
රාජපුත්ත විජානාහි අත්තානං පරිමොචයාති.

992. කතමං ස්වාහං ජනපදං ගන්ත්වා කිං කම්මං කිඤ්ච පොරිසං,
කාය වා පන විජ්ජාය භවෙය්යං අජරාමරොති.

993. න විජ්ජතෙ සො පදෙසො කම්මං විජ්ජාච පොරිසං,
යත්ථ ගන්ත්වා භවෙ මච්චො රාජපුත්තාජරාමරො.

994. මහද්ධනා මහාභොගා රට්ඨවන්තොපි ඛත්තියා,
පහූතධනධඤ්ඤාසෙ න තෙපි අජරාමරා.

995. යදි තෙ සුතා අන්ධක වෙණ්හුපුත්තා,
සූරා වීරා වික්කත්තප්පහාරිනො.
තෙපි ආයුක්ඛයං පත්තා
විද්ධස්තා සස්සතීසමා.

996. ඛත්තියා බ්රාහ්මණා වෙස්සා සුද්දා චණ්ඩාලපුක්කුසා,
යෙ කෙචඤ්ඤෙ ච ජාතියා තෙපිනො අජරාමරා.

997. යෙ මන්තං පරිවත්තෙන්ති ඡළඞ්ගං බ්රහ්මචින්තිතං,
එතෙ චඤ්ඤෙ ච විජ්ජාය තෙපි නො අජරාමරා.

998. ඉසයො චාපි යෙ සත්තා සඤ්ඤතත්තා තපස්සිනො,
සරීරං තෙපි කාලෙන විජහන්ති තපස්සිනො.

999. භාවිතත්තාපි අරහත්තො කතකිච්චා අනාසවා,
නික්ඛිපන්ති ඉමං දෙහං පුඤ්ඤපාපපරික්ඛයාති.

1000. සුභාසිතා අත්ථවතී ගාථායො තෙ මහාමුනි,
නිජ්ඣත්තොම්හි සුභට්ඨෙන ත්වඤ්ච මෙ සරණං භවාති.