969. මහන්තං නාගං අභිරුය්හ සබ්බසෙතං ගජුත්තමං
වනාවනං අනුපරියාසි නාරීගණපුරක්ඛතො
ඔභාසෙන්තො දිසා සබ්බා ඔසධී විය තාරකා.

970. කෙන තෙ තාදිසො වණ්ණො කෙන තෙ ඉධමිජ්ඣති,
උප්පජ්ජන්ති ච තෙ භොගා යෙ කෙචි මනසො පියා.

971. පුච්ඡාමි තං දෙව මහානුභාව
මනුස්සභූතො කිමකාසි පුඤ්ඤං
කෙනාසි එවං ජලිතානුභාවො
වණ්ණො ච තෙ සබ්බදිසා පභාසතීති.

972. සො දෙවපුත්තො අත්තමනො වඞ්ගීසෙනෙව පුච්ඡිතො,
පඤ්හං පුට්ඨො වියාකාසි යස්ස කම්මස්සිදං ඵලං.

973. අහං මනුස්සෙසු මනුස්සභූතො.
උපාසකො චක්ඛුමතො අහොසිං
පාණාතිපාතා විරතො අහොසිං
ලොකෙ අදින්නං පරිවජ්ජයිස්සං.

974. අමජ්ජපො නො ච මුසා අභාණිං
සකෙන දාරෙන ච තුට්ඨො අහොසිං.
අන්නං ච පානං ච පසන්නචිත්තො
සක්කච්ච දානං විපුලං අදාසිං.

975. තෙන මෙ තාදිසො වණ්ණො තෙන මෙ ඉධ මිජ්ඣති,
උප්පජ්ජන්ති ච මෙ භොගා යෙ කෙචි මනසො පියා.

976. අක්ඛාමි තෙ භික්ඛු මහානුභාව
මනුස්සභූතො යමකාසි පුඤ්ඤං
තෙනම්හි එවං ජලිතානුභාවො
වණ්ණො ච මෙ සබ්බදිසා පභාසතීති.

977. කොනු දිබ්බෙන යානෙන සබ්බසෙතෙන හත්ථිනා,
තුරියතාළිත නිග්ඝොසො අන්තළික්ඛෙ මහීයති.

978. දෙවතානුසි ගන්ධබ්බො ආදු සක්කො පුරින්දදො,
අජානන්තා තං පුච්ඡාම කථං ජානෙමු තං මයන්ති.

979. නම්හි දෙවො න ගන්ධබ්බො නාපි සක්කො පුරින්දදො,
සුධම්මා නාම යෙ දෙවා තෙසං අඤ්ඤතරො අහන්ති.

980. පුච්ඡාම දෙවං සුධම්මං පුථුං කත්වාන අඤ්ජලිං,
කිං කත්වා මානුසෙ කම්මං සුධම්මං උපපජ්ජතීති.

981. උච්ඡාගාරං තිණාගාරං වත්ථාගාරඤ්ච යො දදෙ,
තිණ්ණමඤ්ඤතරං දත්වා සුධම්මං උපපජ්ජතීති.

982. දළ්හධම්මා නිසාරස්ස ධනුං ඔලුබ්භ තිට්ඨසි,
ඛත්තියො නු සි රාජඤ්ඤො ආදු ලුද්දො වනෙ චරොති.

983. අස්සකාධිපස්සාහං භන්තෙ පුත්තො වනෙ චරො,
නාමං මෙ භික්ඛු තෙ බ්රූමි සුජාතො ඉති මං විදුං.

984. මිගෙ ගවෙසමානොහං ඔගාහන්තො බ්රහාවනං,
මිගං කඤ්චෙව නාද්දක්ඛිං තඤ්ච දිස්වා ඨිතො අහන්ති.

985. ස්වාගතං තෙ මහාපුඤ්ඤ අථො තෙ අදුරාගතං,
එත්තො උදකමාදාය පාදෙ පක්ඛාලයස්සු තෙ.

986. ඉදම්පි පානීයං සීතං ආභතං ගිරිගබ්භරා,
රාජපුත්ත තතො පීත්වා සත්ථතස්මිං උපාවිසාති.

987. කල්යාණී වත තෙ වාචා සවණීයා මහාමුනි,
නෙලා චත්ථවතී වග්ගු මන්ත්වා අත්ථංච භාසසෙ

988. කා තෙ රති වනෙ විහරතො
ඉසිනිසභ වදෙහි පුට්ඨො
තව වචනපථං නිසාමයිත්වා
අත්ථධම්මපදං සමාචරෙමසෙති.