796. පීතවත්ථෙ පීතධජෙ පීතාලඞ්කාරභූසිතෙ,
පීතචන්දනලිත්තඞ්ගෙ පීතඋප්පලමාලිනි

797. පීතපාසාදසයනෙ පීතාසනෙ පීතභාජනෙ,
පීතඡත්තෙ පීතරථෙ පීතස්සෙ පීතවීජනෙ.

798. කිං කම්මමකරී භද්දෙ පුබ්බෙ මානුසකෙ භවෙ,
දෙවතෙ පුච්ඡිතාචික්ඛ කිස්ස කම්මස්සිදං ඵල’න්ති.

799. කොසාතකී නාම ලතත්ථි භන්තෙ කිත්තිතා අනභිජ්ඣිතා,
තස්සා චත්තාරි පුප්ඵානි ථූපං අභිහරිං අහං.

800. සත්ථු සරීරමුද්දිස්ස විප්පසන්නෙන චෙතසා,
නාස්ස මග්ගං අවෙක්ඛිස්සං තදග්ගමනසා සති.

801. තතො මං අවධී ගාවී ථූපං අප්පත්තමානසං,
තඤ්චාහං අභිසඤ්චෙය්යං භීයො නූන ඉතො සියා.

802. තෙන කම්මෙන දෙවින්ද මඝවා දෙවකුඤ්ජර,
පහාය මානුසං දෙහං තව සහව්යතමාගතා, ති

803. ඉදං සුත්වා තිදසාධිපති මඝවා දෙවකුඤ්ජරො,
තාවතිංසෙ පසාදෙන්තො මාතලිං එතදබ්රවී, ති.

804. පස්ස මාතලි අච්ඡෙරං චිත්තං කම්මඵලං ඉදං,
අප්පකම්පි කතං දෙය්යං පුඤ්ඤං හොති මහප්ඵලං

805. නත්ථි චිත්තෙ පසන්නම්හි අප්පිකානාම දක්ඛිණා,
තථාගතෙ වා සම්බුද්ධෙ අථවා තස්ස සාවකෙ.

806. එහි මාතලි අම්හෙපි භිය්යො භිය්යො මහෙමසෙ,
තථාගතස්ස ධාතුයො සුඛො පුඤ්ඤානමුච්චයො.

807. තිට්ඨන්තෙ නිබ්බුතෙ චාපි සමෙ චිත්තෙ සමං ඵලං,
චෙතොපණිධිහෙතූහි සත්තා ගච්ඡන්ති සුග්ගතිං.

808. බහුන්නං වත අත්ථාය උප්පජ්ජන්ති තථාගතා,
යත්ථ කාරං කරිත්වාන සග්ගං ගච්ඡන්ති දායකා, ති.

809. ඔභාසයිත්වා පඨවිං සදෙවකං
අතිරොචසි චන්දිමසුරියා විය
සිරියා ච වණ්ණෙන යසෙන තෙජසා
බ්රහ්මා ව දෙවෙ තිදසෙ සඉන්දකෙ.

810. පුච්ඡාමි තං උප්පලමාලධාරිණී
ආවෙළිනී කඤ්චන සන්තිභත්තචෙ
අලඞ්කතෙ උත්තමවත්ථධාරිණී
කා ත්වං සුභෙ දෙවතෙ වන්දසෙ මමං

811. කිං ත්වං පුරෙ කම්මමකාසි අත්තනා
මනුස්සභූතා පුරිමාය ජාතියා
දානං සුචිණ්ණං අථ සීලසඤ්ඤමං
කෙනූපපන්නා සුගතිං යසස්සිනී.
දෙවතෙ පුච්ඡිතාචික්ඛ කිස්ස කම්මසිදං ඵල’න්ති.

812. ඉදානි භන්තෙ ඉමමෙව ගාමං
පිණ්ඩාය අම්හාක ඝරං උපාගමි
තතො තෙ උච්ඡුස්ස අදාසිං ඛණ්ඩිකං
පසන්නචිත්තා අතුලාය පීතියා.