720. අභික්කන්තෙන වණ්ණෙන යා ත්වං තිට්ඨසි දෙවතෙ,
ඔභාසෙන්ති දිසා සබ්බා ඔසධී විය තාරකා

721. කෙන තෙ තාදිසො වණ්ණො කෙන තෙ ඉධමිජ්ඣති,
උප්පජ්ජන්ති ච තෙ භොගා යෙ කෙචි මනසොපියා

722. පුච්ඡාමි තං දෙවි මහානුභාවෙ
මනුස්සභූතා කිමකාසි පුඤ්ඤං
කෙනාසි එවං ජලිතානුභාවා
වණ්ණො ච තෙ සබ්බදිසා පභාසතී’ති

723. සා දෙවතා අත්තමනා මොග්ගල්ලානෙන පුච්ඡිතා,
පඤ්හං පුට්ඨා වියාකාසි යස්ස කම්මස්සිදං ඵලං

724. අහං අන්ධකවින්දස්මිං බුද්ධස්සාදිච්චබන්ධුනො,
අදාසිං කොලසම්පාකං කඤ්ජිකං තෙලධූපිතං

725. පිප්ඵල්යා ලසුනෙන ච මිස්සං ලාමඤ්ජකෙන ච,
අදාසිං උජුභූතස්මිං විප්පසන්නෙන චෙතසා

726. යා මහෙසිත්තං කාරෙය්ය චක්කවත්තිස්ස රාජිනො
නාරී සබ්බඞ්ගකල්යාණී භත්තුචානොමදස්සිකා
එතස්ස කඤ්ජිකදානස්ස කලං නාග්ඝති සොළසිං

727. සතං නික්ඛා සතං අස්සා සතං අස්සතරී රථා
සතං කඤ්ඤාසහස්සානි ආමුත්තමණිකුණ්ඩලා
එතස්ස කඤ්ජිකදානස්ස කලං නාග්ඝන්ති සොළසිං

728. සතං හෙමවතා නාගා ඊසා දන්තා උරූළ්හවා
සුවණ්ණකච්ඡා මාතඞ්ගා හෙමකප්පන වාසසා
එතස්ස කඤ්ජිකදානස්ස කලං නාග්ඝන්ති සොළසිං

729. චතුන්නම්පි දීපානං ඉස්සරං යොධ කාරයෙ,
එතස්ස කඤ්ජිකදානස්ස කලං නාග්ඝති සොළසි’න්ති.

730. අභික්කන්තෙන වණ්ණෙන යා ත්වං තිට්ඨසි දෙවතෙ,
ඔභාසෙන්තී දිසා සබ්බා ඔසධී විය තාරකා

731. තස්සා තෙ නච්චමානාය අඞ්ගමඞ්ගෙහි සබ්බසො,
දිබ්බා සද්දා නිච්ඡරන්ති සවණීයා මනොරමා

732. තස්ස තෙ නච්චමානාය අඞ්ගමඞ්ගෙහි සබ්බසො,
දිබ්බා ගන්ධා පවායන්ති සුචිගන්ධා මනොරමා

733. විවත්තමානා කායෙන යා වෙණීසු පිළන්ධනා,
තෙසං සූයති නිග්ඝොසො තුරියෙ පඤ්චඞ්ගිකෙ යථා

734. වටංසකා වාතධූතා වාතෙන සම්පකම්පිතා,
තෙසං සූයති නිග්ඝොසො තුරියෙ පඤ්චඞ්ගිකෙ යථා

735. යාපි තෙ සිරස්මිං මාලා සුචිගන්ධා මනොරමා,
වාති ගන්ධො දිසා සබ්බා රුක්ඛො මඤ්ජුසකො යථා

736. ඝායසෙ තං සුචිං ගන්ධං රූපං පස්සසි අමානුසං,
දෙවතෙ පුච්ඡිතාචික්ඛ කිස්ස කම්මස්සිදං ඵල’න්ති

737. සාවත්ථියං මය්හං සඛී භදන්තෙ
සඞ්ඝස්ස කාරෙසි මහාවිහාරං
තත්ථප්පසන්නා අහමනුමොදිං
දිස්වා අගාරඤ්ච පියඤ්ච මෙතං

738. තායෙව මෙ සුද්ධනුමොදනාය
ලද්ධං විමානං අබ්භුතං දස්සනෙය්යං
සමන්තතො සොළස යොජනානි
වෙහාසයං ගච්ඡති ඉද්ධියා මම

739. කූටාගාරා නිවෙසා මෙ විභත්තා භාගසො මිතා,
දද්දල්ලමානා ආභන්ති සමන්තා සතයොජනං