620. දද්දල්ලමානා වණ්ණෙන යස්සා ච යසස්සිනී,
සබ්බෙ දෙවෙ තාවතිංසෙ වණ්ණෙන අතිරොචසි.

621. දස්සනං නාභිජානාමි ඉදං පඨමදස්සනං,
කස්මා කායා නු ආගම්ම නාමෙන භාසසෙ මමන්ති.

622. අහං භද්දෙ සුභද්දාසිං පුබ්බෙ මානුසකෙ භවෙ,
සහ භරියා ච තෙ ආසිං භගිනී ච කණිට්ඨිකා.

623. සා අහං කායස්ස භෙදා විප්පමුත්තා තතොචුතා,
නිම්මානරතීනං දෙවානං උපපන්නා සහව්යතන්ති.

624. පහූතකතකල්යාණා තෙ දෙවෙ යන්ති පාණිනො,
යෙසං ත්වං කිත්තයිස්සසි සුභද්දෙ ජාතිමත්තනො.

625. කථං ත්වං කෙන වණ්ණෙන කෙන වා අනුසාසිතා,
කීදිසෙනෙව දානෙන සුබ්බතෙන යසස්සිනී.

626. යසං එතාදිසං පත්තා විසෙසං විපුලමජ්ඣගා,
දෙවතෙ පුච්ඡිතාචික්ඛ කිස්ස කම්මස්සිදං ඵලන්ති.

627. අට්ඨෙව පිණ්ඩපාතානි යං දානං අද්දං පුරෙ,
දක්ඛිණෙය්යස්ස සඞ්ඝස්ස පසන්නා සෙහි පාණිහි.

628. තෙන මෙ තාදිසො වණ්ණො තෙන මෙ ඉධමිජ්ඣති,
උප්පජ්ජන්ති ච මෙ භොගා යෙ කෙචි මනසො පියා.

629. අක්ඛාමි තෙ දෙවි මහානුභාවෙ
මනුස්සභූතා යමහං අකාසිං
තෙනම්හි එවං ජලිතානුභාවා
වණ්ණො ච මෙ සබ්බදිසා පභාසතීති.

630. අහං තයා බහුතරෙ භික්ඛූ සඤ්ඤතෙ බ්රහ්මචාරිනො
කප්පෙසිං අන්නපානෙන පසන්නා සෙහි පාණිහි
තයා බහුතරං දත්වා හීනකායූපගා අහං

631. කථං ත්වං අප්පතරං දත්වා විසෙසං විපුලමජ්ඣගා,
දෙවතෙ පුච්ඡිතාචික්ඛ යස්සකම්මස්සිදං ඵලන්ති.

632. මනොභාවනීයො භික්ඛු සන්දිට්ඨො මෙ පුරෙ අහු,
තාහං භත්තෙන නිමන්තෙසිං රෙවතං අත්තනට්ඨමං.

633. සො මෙ අත්ථපුරෙක්ඛාරො අනුකම්පාය රෙවතො,
සඞ්ඝෙ දෙහීති මං අවොච තස්සාහං වචනං කරිං.

634. සා දක්ඛිණා සඞ්ඝගතා අප්පමෙය්යෙ පතිට්ඨිතා,
පුග්ගලෙසු තයා දින්නං න තං තව මහප්ඵලන්ති.

635. ඉදානෙවාහං ජානාමි සඞ්ඝෙ දින්නං මහප්ඵලං
සාහං ගන්ත්වා මනුස්සත්තං වදඤ්ඤූ වීතමච්ඡරා
සඞ්ඝෙ දානානි දස්සාමි අප්පමත්තා පුනප්පුනන්ති.

636. කා එසා දෙවතා භද්දෙ තයා මන්තයතෙ සහ,
සබ්බෙ දෙවෙ තාවතිංසෙ වණ්ණෙන අතිරොචතීති.

637. මනුස්සභූතා දෙවින්ද පුබ්බෙ මානුසකෙ භවෙ
සහභරියා ච මෙ ආසි භගිනී ච කනිට්ඨිකා
සඞ්ඝෙ දානානි දත්වාන කතපුඤ්ඤා විරොචතීති.