3. 3.
308. පල්ලඞ්කසෙට්ඨෙ මණිසොණ්ණචිත්තෙ
පුප්ඵාභිකිණ්ණෙ සයනෙ උළාරෙ
තත්ථච්ඡසි දෙවි මහානුභාවෙ
උච්චාවචා ඉද්ධි විකුබ්බමානා.
309. ඉමා ච තෙ අච්ඡරායො සමන්තතො
නච්චන්ති ගායන්ති පමොදයන්ති
දෙවිද්ධිපත්තාසි මහානුභාවෙ
මනුස්සභූතා කිමකාසි පුඤ්ඤං
කෙනාසි එවං ජලිතානුභාවා
වණ්ණො ච තෙ සබ්බදිසා පභාසතීති.
310. අහං මනුස්සෙසු මනුස්සභූතා
අඩ්ඪෙ කුලෙ සුණිසා අහොසිං
අක්කොධනා භත්තුවසානුවත්තිනී
අහොසිං අප්පමත්තා උපොසථෙ.
311. මනුස්සභූතා දහරාස’පාපිකා
පසන්නචිත්තා පතිමාභිරාධයිං
දිවා ච රත්තො ච මනාපචාරිණී
අහං පුරෙ සීලවතී අහොසිං.
312. පාණාතිපාතා විරතා අචොරිකා
සංසුද්ධකායා සුචිබ්රහ්මචාරිණී
අමජ්ජපා නො ච මුසා අභාණිං
සික්ඛාපදෙසු පරිපූරකාරිණී.
313. චාතුද්දසිං පඤ්චදසිං යා ච පක්ඛස්ස අට්ඨමී
පාටිහාරියපක්ඛඤ්ච පසන්නමනසා අහං
අට්ඨඞ්ගුපෙතං අනුධම්මචාරිණී
උපොසථං පීතිමනා උපාවසිං.
314. ඉමඤ්චාරියට්ඨඞ්ගවරෙහුපෙතං
සමාදියිත්වා කුසලං සුඛුද්රයං
පතිම්හි කල්යාණි වසානුවත්තිනී
අහොසිං පුබ්බෙ සුගතස්ස සාවිකා
315. එතාදිසං කුසලං ජීවලොකෙ
කම්මං කරිත්වාන විසෙසභාගිනී
කායස්ස භෙදා අභිසම්පරායං
දෙවිද්ධිපත්තා සුගතිම්හි ආගතා.
316. විමාන පාසාදවරෙ මනොරමෙ
පරිවාරිතා අච්ඡරාසඞ්ගණෙන
සයංපභා දෙවගණා රමෙන්ති මං
දීඝායුකිං දෙවවිමානමාගතන්ති.
පල්ලඞ්කවිමානං.
3. 4.
317. ලතා ච සජ්ජා පවරා ච දෙවතා
අච්චිමුඛී රාජවරස්ස සිරීමතො
සුතා ච රඤ්ඤො වෙස්සවණස්ස ධීතා
රාජීමතී ධම්මගුණෙහි සොභථ.
318. පඤ්චෙත්ථ නාරියො අගමංසු නහායිතුං
සීතොදිකං උප්පලිනිං සිවං නදිං
තා තත්ථ නහායිත්ව රමෙත්ව දෙවතා
නච්චිත්ව ගායිත්ව සුතා ලතං බ්රුවී.