1. 15.
124. අභික්කන්තෙන වණ්ණෙන යා ත්වං තිට්ඨසි දෙවතෙ,
ඔභාසෙන්තී දිසා සබ්බා ඔසධී විය තාරකා.
125. කෙන තෙ තාදිසො වණ්ණො කෙන තෙ ඉධමිජ්ඣති,
උප්පජ්ජන්ති ච තෙ භොගා යෙ කෙචි මනසො පියා.
126. පුච්ඡාමි තං දෙවි මහානුභාවෙ
මනුස්සභූතා කිමකාසි පුඤ්ඤං
කෙනාසි එවං ජලිතානුභාවා
වණ්ණො ච තෙ සබ්බදිසා පභාසතීති.
127. සා දෙවතා අත්තමනා මොග්ගල්ලානෙන පුච්ඡිතා,
පඤ්හං පුට්ඨා වියාකාසි යස්ස කම්මස්සිදං ඵලං.
128. ඉස්සා ච මච්ඡෙරමථො පළාසො,
නාහොසි මය්හං ඝරමාවසන්නියා
අක්කොධනා භත්තුවසානුවත්තිනී
උපොසථෙ නිච්චහමප්පමත්තා.
129. චාතුද්දසිං පඤ්චදසිං යා ච පක්ඛස්ස අට්ඨමී,
පාටිහාරියපක්ඛඤ්ච අට්ඨඞ්ගසුසමාගතං
130. උපොසථං උපවසිස්සං සදා සීලෙසු සංවුතා,
සංයමා සංවිභාගා ච විමානං ආවසාමහං
131. පාණාතිපාතා විරතා මුසාවාදා ච සඤ්ඤතා,
ථෙය්යා ච අතිචාරා ච මජ්ජපානා ච ආරකා.
132. පඤ්ච සික්ඛාපදෙ රතා අරියසච්චාන කොවිදා,
උපාසිකා චක්ඛුමතො ගොතමස්ස යසස්සිනො.
133. සාහං සකෙන සීලෙන යසසා ච යසස්සිනී,
අනුභොමි සකං පුඤ්ඤං සුඛිතා චම්හි අනාමයා.
134. තෙන මෙ තාදිසො වණ්ණො තෙන මෙ ඉධමිජ්ඣති,
උප්පජ්ජන්ති ච මෙ භොගා යෙ කෙචි මනසො පියා.
135. අක්ඛාමි තෙ භික්ඛු මහානුභාව
මනුස්සභූතා යමහං අකාසිං
තෙනම්හි එවං ජලිතානුභාවා
වණ්ණො ච මෙ සබ්බදිසා පභාසතීති.
මම ච භන්තෙ වචනෙන භගවතො පාදෙ සිරසා වන්දෙය්යාසි, උත්තරා නාම භන්තෙ උපාසිකා භගවතො පාදෙ සිරසා වන්දතීති අනච්ඡරියං ඛො පනෙතං භන්තෙ යං මං භගවා අඤ්ඤතරස්මිං සාමඤ්ඤඵලෙ ව්යාකරෙය්ය. තං භගවා සකදාගාමිඵලෙ වියාකාසීති.
උත්තරාවිමානං.
1. 16.
136. යුත්තා ච තෙ පරම අලඞ්කතා හයා
අධොමුඛා අඝසිගමා බලී ජවා
අභිනිම්මිතා පඤ්චරථා සතා ච තෙ
අන්වෙන්ති තං සාරථිචොදිතා හයා.
137. සා තිට්ඨසි රථවරෙ අලඞ්කතා
ඔභාසයං ජලමිව ජොතිපාවකො
පුච්ඡාමි තං වරතනු අනොමදස්සනෙ
කස්මා නු කායා අනධිවරං උපාගමීති.