136. යුත්තා ච තෙ පරම අලඞ්කතා හයා
අධොමුඛා අඝසිගමා බලී ජවා
අභිනිම්මිතා පඤ්චරථා සතා ච තෙ
අන්වෙන්ති තං සාරථිචොදිතා හයා.

137. සා තිට්ඨසි රථවරෙ අලඞ්කතා
ඔභාසයං ජලමිව ජොතිපාවකො
පුච්ඡාමි තං වරතනු අනොමදස්සනෙ
කස්මා නු කායා අනධිවරං උපාගමීති.

138. කාමග්ගපත්තානං යමාහුනුත්තරං
නිම්මාය නිම්මාය රමන්ති දෙවතා
තස්මා කායා අච්ඡරා කාමවණ්ණිනී
ඉධාගතා අනධිවරං නමස්සිතුන්ති.

139. කිං ත්වං පුරෙ සුචරිතමාචරීධ
කෙනච්ඡසි ත්වං අමිතයසා සුඛෙධිතා
ඉද්ධී ච තෙ අනධිවරා විහඞ්ගමා
වණ්ණො ච තෙ දසදිසා විරොචති.

140. දෙවෙහි තං පරිවුතා සක්කතා චසි
කුතො චුතා සුගතිගතාසි දෙවතෙ
කස්ස වා ත්වං වචනකරානුසාසනිං
ආචික්ඛ මෙ ත්වං යදි බුද්ධසාවිකාති.

141. නගන්තරෙ නගරවරෙ සුමාපිතෙ
පරිචාරිකා රාජවරස්ස සිරීමතො
නච්චෙ ගීතෙ පරමසුසික්ඛිතා අහුං
සිරිමාති මං රාජගහෙ අවෙදිසුං.

142. බුද්ධො ච මෙ ඉසිනිසභො විනායකො
අදෙසයී සමුදයදුක්ඛනිච්චතං
අසඞ්ඛතං දුක්ඛනිරොධසස්සතං
මග්ගඤ්චිමං අකුටිලමඤ්ජසං සිවං.

143. සුත්වානහං අමතපදං අසඞ්ඛතං
තථාගතස්සනධිවරස්ස සාසනං
සීලෙස්වහං පරමසුසංවුතා අහුං
ධම්මෙ ඨිතා නරවරබුද්ධභාසිතෙ.

144. ඤත්වානහං විරජපදං අසඞ්ඛතං
තථාගතෙන නධිවරෙන දෙසිතං
තත්ථෙවහං සමථසමාධිමාඵුසිං
සා යෙව මෙ පරමනියාමතා අහු.

145. ලද්ධානහං අමතවරං විසෙසනං
එකංසිකා අභිසමයෙ විසෙසිය
අසංසයා බහුජනපූජිතා අහං
ඛිඩ්ඩාරතිං පච්චනුභොමනප්පකං.

146. එවං අහං අමතදස්සම්හි දෙවතා
තථාගතස්සනධිවරස්ස සාවිකා
ධම්මද්දසා පඨමඵලෙ පතිට්ඨිතා
සොතාපන්නා න ච පන මත්ථිදුග්ගති.