5. 12.
122. දුග්ගතාහං පුරෙ ආසිං විධවා ච අපුත්තිකා,
විනා මිත්තෙහි ඤාතීහි භත්තචොළස්ස නාධිගං.
123. පත්තං දණ්ඩඤ්ච ගණ්හිත්වා භික්ඛමානා කුලාකුලං,
සීතුණ්හෙන ච ඩය්හන්තී සත්තවස්සානි චාරිහං.
124. භික්ඛුනිං පුන දිස්වාන අන්නපානස්ස ලාභිනිං,
උපසඞ්කම්මාවොචං පබ්බජ්ජං අනගාරියං.
125. සා ච මං අනුකම්පාය පබ්බාජෙසි පටාචාරා,
තතො මං ඔවදිත්වාන පරමත්ථෙ නියොජයී.
126. තස්සාහං වචනං සුත්වා අකාසිං අනුසාසනිං,
අමොඝොය්යාය ඔවාදො තෙවිජ්ජම්හි අනාසවාති.
ඉත්ථං සුදං චන්දා ථෙරී ගාථායො අභාසිත්ථාති.
චන්දාථෙරීගාථා.
පඤ්චකනිපාතො නිට්ඨිතො.
6. ඡක්කනිපාතො.
6. 1.
127. යස්ස මග්ගං න ජානාති ආගතස්ස ගතස්ස වා
තං කුතො ආගතං සත්තං මම පුත්තොති රොදසි.
128. මග්ගඤ්ච ඛොස්ස ජානාසි ආගතස්ස ගතස්ස වා
න නං සමනුසොචෙසි එවං ධම්මා හි පාණිනො.
129. අයාචිතො තතාගච්ඡි අනනුඤ්ඤාතො ඉතො ගතො
කුතොචි නූන ආගන්ත්වා වසිත්වා කතිපාහකං
ඉතො’පි අඤ්ඤෙන ගතො තතො අඤ්ඤෙන ගච්ඡති.
130. පෙතො මනුස්සරූපෙන ස සරන්තො ගමිස්සති,
යථාගතො තථා ගතො කා තත්ථ පරිදෙවනා.
131. අබ්බහී වත මෙ සල්ලං දුද්දසං හදයනිස්සිතං
යා මෙ සොකපරෙතාය පුත්තසොකං ව්යපානුදි.
132. සාජ්ජ අබ්බූළ්හසල්ලාහං නිච්ඡාතා පරිනිබ්බුතා
බුද්ධං ධම්මඤ්ච සඞ්ඝඤ්ච උපෙමි සරණං මුනිං.
ඉත්ථං සුදං පඤ්චසතමත්තා ථෙරී භික්ඛුනියො ගාථායො අභාසිත්ථාති.
පඤ්චසතමත්තානං ථෙරීනං ගාථා.
6. 2.
133. පුත්තසොකෙනහං අට්ටා ඛිත්තචිත්තා විසඤ්ඤිනී,
නග්ගා පකිණ්ණකෙසි ච තෙන තෙන විචාරිහං.
134. වසිං සඞ්කාරකූටෙසු සුසානෙ රථියාසු ච
අචරිං තීණි වස්සානි ඛුප්පිපාසා සමප්පිතා.
135. අථද්දසාසිං සුගතං නගරං මිථිලං පති,
අදන්තානං දමෙතාරං සම්බුද්ධමකුතොභයං.
136. සචිත්තං පටිලද්ධාන වන්දිත්වාන උපාවිසිං
සො මෙ ධම්මමදෙසෙසි අනුකම්පාය ගොතමො.
137. තස්ස ධම්මං සුණිත්වාන පබ්බජිං අනගාරියං
යුඤ්ජන්තී සත්ථු වචනෙ සච්ඡාකාසිං පදං සිවං.
138. සබ්බෙ සොකා සමුච්ඡින්නා පහීනා එතදන්තීකා
පරිඤ්ඤාතා හි මෙ වත්ථු යතො සොකානසම්භවො.
ඉත්ථං සුදං වාසෙට්ඨි ථෙරී ගාථායො අභාසීති.
වාසෙට්ඨිථෙරිගාථා.