303. ධම්මො හවෙ රක්ඛති ධම්මචාරිං
ධම්මො සුචිණ්ණො සුඛමාවහාති,
එසානිසංසො ධම්මෙ සුචිණ්ණෙ
න දුග්ගතිං ගච්ඡති ධම්මචාරී.

304. න හි ධම්මො අධම්මො ච උභො සමවිපාකිනො,
අධම්මො නිරයං නෙති ධම්මො පාපෙති සුග්ගතිං.

305. තස්මා හි ධම්මෙසු කරෙය්ය ඡන්දං
ඉති මොදමානො සුගතෙන තාදිනා,
ධම්මෙ ඨිතා සුගතවරස්ස සාවකා
නීයන්ති ධීරා සරණවරග්ගගාමිනො.

306. විප්ඵොටිතො ගණ්ඩමූලො
තණ්හාජාලො සමූහතො,
සො ඛීණසංසාරො න චත්ථි නිඤ්චනං
චන්දො යථා දොසිනා පුණ්ණමාසියාති.

307. යදා බලාකා සුචිපණ්ඩරච්ඡදා
කාළස්ස මෙඝස්ස භයෙන තජ්ජිතා,
පලෙහිති ආලයමාලයෙසිනී
තදා නදී අජකරණී රමෙති මං.

308. යදා බලාකා සුවිසුද්ධපණ්ඩරා
කාළස්ස මෙඝස්ස භයෙන තජ්ජිතා,
පරියෙසති ලෙණමලෙණදස්සිනී
තදා නදී අජකරණී රමෙති මං.

309. කං නු තත්ථ න රමෙන්ති ජම්බුයො උභතො තහිං,
සොභෙන්ති ආපගාකූලං මම ලෙණස්ස පච්ඡතො.

310. තා මතමදසඞ්ඝසුප්පහීනා
භෙකා මන්දවතී පනාදයන්ති,
නාජ්ජ ගිරිනදීහි විප්පවාසසමයො
ඛෙමා අජකරණී සිවා සුරම්මා’ති.

311. පබ්බජිං ජීවිකත්ථො’හං ලද්ධාන උපසම්පදං,
තතො සද්ධං පටිලභිං දළ්හවිරියො පරක්කමිං.

312. කාමං භිජ්ජතු’යං කායො මංසපෙසී විසීයරුං,
උභො ජණ්ණුකසන්ධීහි ජඞ්ඝායො පපතන්තු මෙ.

313. නාසිස්සං න පිවිස්සාමි විහාරා ච න නික්ඛමෙ,
න’පි පස්සං නිපාතෙස්සං තණ්හාසල්ලෙ අනූහතෙ.

314. තස්ස මෙවං විහරතො පස්ස විරියපරක්කමං,
තිස්සො විජ්ජා අනුප්පත්තා කතං බුද්ධස්ස සාසන’න්ති.

නාගසමාලො භගු ච සභියො නන්දකො’පි ච
ජම්බුකො සෙනකො ථෙරො සම්භූතො රාහුලො’පි ච
භවති චන්දනො ථෙරො දසෙතෙ බුද්ධසාවකා
ධම්මිකො සප්පකො ථෙරො මුදිතො චා’පි තෙ තයො
ගාථායො ද්වෙ ච පඤ්ඤාස ථෙරා සබ්බෙ’පි තෙරසා’ති.