264. පාපමිත්තෙ විවජ්ජෙත්වා භජෙය්යුත්තමපුග්ගලෙ
ඔවාදෙ චස්ස තිට්ඨෙය්ය පත්ථෙන්තො අචලං සුඛං.

265. පරිත්තං දාරුමාරුය්හ යථා සීදෙ මහණ්ණවෙ,
එවං කුසීතමාගම්ම සාධුජීවීපි සීදති,
තස්මා තං පරිවජ්ජෙය්ය කුසීතං හීනවීරියං.

266. පවිවිත්තෙහි අරියෙහි පහිතත්තෙහි ඣායිහි
නිච්චං ආරද්ධවිරියෙහි පණ්ඩිතෙහි සහාවසෙ’ති.

අඞ්ගාණිකො භාරද්වාජො පච්චයො බක්කුලො ඉසි
ධනියො මාතඞ්ගපුත්තො සොභිතො වාරණො ඉසි
වස්සිකො ච යසොජො ච සාටිමත්තියුපාලි ච
උත්තරපාලො අභිභූතො ගොතමො හාරිතො’පි ච
ථෙරො තිකනිපාතම්හි නිබ්බානෙ විමලො කතො
අට්ඨතාලිස ගාථායො ථෙරා සොළස කිත්තිතා’ති.

267. අලඞ්කතා සුවසනා මාලිනී චන්දනුස්සදා,
මජ්ඣෙ මහාපථෙ නාරී තුරියෙ නච්චන්ති නාටකී.

268. පිණ්ඩිකාය පවිට්ඨොහං ගච්ඡන්තො නං උදික්ඛිසං,
අලඞ්කතං සුවසනං මච්චුපාසංව ඔඩ්ඩිතං.

269. තතො මෙ මනසිකාරො යොනිසො උදපජ්ජථ,
ආදීනවො පාතුරහු නිබ්බිදා සමතිට්ඨථ.

270. තතො චිත්තං විමුච්චි මෙ පස්ස ධම්මසුධම්මතං,
තිස්සො විජ්ජා අනුප්පත්තා කතං බුද්ධස්ස සාසන’න්ති.

271. අහං මිද්ධෙන පකතො විහාරා උපනික්ඛමිං,
චඞ්කමං අභිරූහන්තො තත්ථෙව පපතිං ඡමා.

272. ගත්තානි පරිමජ්ජිත්වා පුනපාරුයුහ චඞ්කමං,
චඞ්කමෙ චඞ්කමිං සොහං අජ්ඣත්තං සුසමාහිතො.

273. තතො මෙ මනසිකාරො යොනිසො උදපජ්ජථ,
ආදීනවො පාතුරහු නිබ්බිදා සමතිට්ඨථ.

274. තතො චිත්තං විමුච්චි මෙ පස්ස ධම්මසුධම්මතං,
තිස්සො විජ්ජා අනුප්පත්තා කතං බුද්ධස්ස සාසන’න්ති.

275. පරෙ ච න විජානන්ති මයමෙත්ථ යමාමසෙ,
යෙ ච තත්ථ විජානන්ති තතො සම්මන්ති මෙධගා.

276. යදා ච අවිජානන්තා ඉරියන්ත්යමරා විය,
විජානන්ති ච යෙ ධම්මං ආතුරෙසු අනාතුරා.

277. යං කිඤ්චි සිථිලං කම්මං සඞ්කිලිට්ඨං ච යං වතං,
සඞ්කස්සරං බ්රහ්මචරියං න තං හොති මහප්ඵලං.

278. යස්ස සබ්රහ්මචාරිසු ගාරවො නූපලබ්භති,
ආරකා හොති සද්ධම්මා නභං පුථුවියා යථා’ති.