1. “යස්ස සෙලූපමං චිත්තං ඨිතං නා’නුපකම්පති,
විරත්තං රජනීයෙසු කොපනෙය්යෙ න කුප්පති.
යස්සෙවං භාවිතං චිත්තං කුතො නං දුක්ඛමෙස්සතී”ති.

2. “යො බ්රාහ්මණො බාහිතපාපධම්මො
නිහුහුංකො නික්කසාවො යතත්තො,
වෙදන්තගූ වුසිතබ්රහ්මචරියො
ධම්මෙන සො බ්රහ්මවාදං වදෙය්ය,
යස්සුස්සදා නත්ථි කුහිඤ්චි ලොකෙ”ති

3. “බාහිත්වා පාපකෙ ධම්මෙ යෙ චරන්ති සදා සතා,
ඛීණසංයොජනා බුද්ධා තෙ වෙ ලොකස්මිං බ්රාහ්මණා”ති.

4. “යත්ථ ආපො ච පඨවී තෙජො වායො න ගාධති,
න තත්ථ සුක්කා ජොතන්ති ආදිච්චො නප්පකාසති.
න තත්ථ චන්දිමා භාති තමො තත්ථ න විජ්ජති,

5. “යදා ච අත්තනා වෙදි මුනි මොනෙන බ්රාහ්මණො,
අථ රූපා අරූපා ච සුඛදුක්ඛා පමුච්චතී”තී.

6. “යදා සකෙසු ධම්මෙසු පාරගූ හොති බ්රාහ්මණො,
අථ එතං පිසාචඤ්ච පක්කුලඤ්චා’ති වත්තති”ති.

7. “නාභිනන්දති ආයන්තිං පක්කමන්තිං න සොචති,
සඞ්ගා සඞ්ගාමජිං මුත්තං තමහං බ්රූමී බ්රාහ්මණ”න්ති

8. “න උදකෙන සුචී හොති බව්හෙත්ථ න්හායති ජනො,
යම්හි සච්චං ච ධම්මො ච සො සුචි සො ච බ්රාහ්මණො”ති.

9. “යදා හවෙ පාතුභවන්ති ධම්මා
ආතාපිනො ඣායතො බ්රාහ්මණස්ස,
විධූපයං තිට්ඨති මාරසෙනං
සුරියොව ඔභාසයමන්තලික්ඛ”න්ති.

10. “සන්තින්ද්රියං පස්සථ ඉරීයමානං
තෙවිජ්ජප්පත්තං අපහානධම්මං.
සබ්බානි යොගානි උපාතිවත්තො
අකිඤ්චනො ඉරීයති පංසුකූලිකො.

11. “තං දෙවතා සම්බහුලා උළාරා
බ්රහ්මවිමානං උපසඞ්කමිත්වා
ආජානීයං ජාතිබලනිසෙධං
තිධා නමස්සන්ති පසන්නචිත්තා.

12. “නමො තෙ පුරිසාජඤ්ඤ නමො තෙ පුරිසුත්තම,
යස්ස තෙ නාභිජානාම කින්ති නිස්සාය ඣායසී”ති.

13. “සහායා වතිමෙ භික්ඛූ චිරරත්තං සමෙතිකා,
සමෙති නෙසං සද්ධම්මො ධම්මෙ බුද්ධප්පවෙදිතෙ.

14. සුවිනීතා කප්පීනෙන ධම්මෙ අරියප්පවෙදිතෙ,
ධාරෙන්ති අන්තිමං දෙහං ජිත්වා මාරං සවාහිනි”න්ති.