නෙත්තිප්පකරණං
නමො තස්ස භගවතො අරහතො සම්මා සම්බුද්ධස්ස
සංගහවාරො
1. යං ලොකො පූජයතෙ - සලොකපාලො සදා නමස්සති ච,
තස්සෙතං සාසනවරං - විදූහි ඤෙය්යං නරචරස්ස.
2. ද්වාදස පදානි සුත්තං - තං සබ්බං බ්යඤ්ජනඤ්ච අත්ථො ච,
තං විඤ්ඤෙය්යං උභයං - කො අත්ථො බ්යඤ්ජනං කතමං.
3. සොළස හාරා නෙත්ති - පඤ්ච නයා සාසනස්ස පරියෙට්ඨි,
අට්ඨාරස මූලපදා - මහාකච්චානෙන නිද්දිට්ඨා.
4. හාරා බ්යඤ්ජනවිචයො - සුත්තස්ස නයා තයො ච සුත්තත්ථො,
උභයං පරිග්ගහීතං - වුච්චති සුත්තං යථාසුත්තං.
5. යා චෙව දෙසනා යං ච - දෙසිතං උභයමෙව විඤ්ඤෙය්යං,
තත්රායමානුපුබ්බී - නවවීධ සුත්තන්තපරියෙට්ඨි’ති.
විභාගවාරො
1. උද්දෙසවාරො
තත්ථ කතමෙ සොළස හාරා: දෙසනා විචයො යුත්ති පදට්ඨානො ලක්ඛණො චතුබ්යූහො ආවත්තො විභත්ති පරිවත්තනො වෙවචනො පඤ්ඤත්ති ඔතරණො සොධනො අධිට්ඨානො පරික්ඛාරො සමාරොපනො ඉති.
තස්සානුගීති:
1. දෙසනා විචයො යුත්ති - පදට්ඨානො ච ලක්ඛණො,
චතුබ්යූහො ච ආවට්ටො - විභත්ති පරිවත්තනො.
2. වෙවචනො ච පඤ්ඤත්ති - ඔතරණො ච සොධනො,
අධිට්ඨානො පරික්ඛාරො - සමාරොපනො සොළස.
3. එතෙ සොළස හාරා - පකිත්තිතා අත්ථතො අසංකිණ්ණා,
එතෙසං චෙව භවති - විත්ථාරතයා නයවිභත්ති’ති.
තත්ථ කතමෙ පඤ්ච නයා: නන්දියාවට්ටො තිපුක්ඛලො සීහ වික්කීළිතො දිසාලොචනො අඞ්කුසො ඉති.
තස්සානුගීති:
4. පඨමො නන්දියාවට්ටො - දුතියො ච තිපුක්ඛලො,
සීහවික්කීළිතො නාම - තතියො නයලඤ්ඡකො