1. අස්සාදාදීනවතා - නිස්සරණම්පි ච ඵලං උපායො ච,
ආණත්ති ච භගවතො - යොගීනං දෙසනාහාරො

2. යං පුච්ඡිතඤ්ච විස්සජ්ජිතඤ්ච - සුත්තස්ස යා ච අනුගීති,
සුත්තස්ස යො පවිචයො - හාරො විචයොති නිද්දිට්ඨො.

3. සබ්බෙසං හාරානං - යා භූමී යො ච ගොචරො තෙසං,
යුත්තායුත්තපරික්ඛා - හාරො යුත්තීති නිද්දිට්ඨො.

4. ධම්මං දෙසෙති ජිනො - තස්ස ච ධම්මස්ස යං පදට්ඨානං,
ඉති යාව සබ්බධම්මා - එසො හාරො පදට්ඨානො.

5. වුත්තම්හි එකධම්මෙ - යෙ ධම්මා එකලක්ඛණා කෙචි,
වුත්තා භවන්ති සබ්බෙ - සො හාරො ලක්ඛණො නාම.

6. නෙරුත්තමධිප්පායො - බ්යඤ්ජනමථ දෙසනානිදානඤ්ච,
පුබ්බාපරානුසන්ධි - එසො හාරො චතුබ්යූහො

7. එකම්හි පදට්ඨානෙ - පරියෙසති සෙසකං පදට්ඨානං,
ආවට්ටති පටිපක්ඛෙ - ආවට්ටො නාම සො හාරො.

8. ධම්මං ච පදට්ඨානං - භූමිං ච විහජතෙ අයං හාරො,
සාධාරණෙ අසාධාරණෙ ච - නෙය්යො විභත්තීති.

9. කුසලාකුසලෙ ධම්මෙ - නිද්දිට්ඨෙ භාවිතෙ පහීනෙ ච,
පරිවත්තති පටිපක්ඛෙ - හාරො පරිවත්තනො නාම.

10. වෙවචනානි බහූනි තු - සුත්තෙ වුත්තානි එකධම්මස්ස,
යො ජානාති සුත්තවිදූ - වෙවචනො නාම සො හාරො.

11. එකං භගවා ධම්මං - පඤ්ඤත්තීහි විවිධාහි දෙසෙති,
සො ආකාරො ඤෙය්යො - පඤ්ඤත්ති නාම හාරො’ති.

12. යො ච පටිච්චුප්පාදො - ඉන්ද්රියඛන්ධා ච ධාතුආයතනා,
එතෙහි ඔතරති යො - ඔතරණො නාම සො හාරො.

13. විස්සජ්ජිතම්හි පඤ්හෙ - ගාථාය පුච්ඡිතා යමාරබ්භ,
සුද්ධාසුද්ධපරික්ඛා - හාරො සො සොධනො නාම.

14. එකත්තතාය ධම්මා - යෙපි ච වෙමත්තතාය නිද්දිට්ඨා,
තෙ න විකප්පසිතබ්බා - එසො හාරො අධිට්ඨානො.

15. යෙ ධම්මා යං ධම්මං - ජනයන්තිප්පච්චයා පරම්පරතො,
හෙතුමවකඩ්ඪයිත්වා - එසො හාරො පරික්ඛාරො.

16. යෙ ධම්මා යම්මූලා - යෙ චෙකත්ථා පකාසිතා මුනිනා,
තෙ සමරොපයිතබ්බා - එස සමාරොපනො භාරො.

17. තණ්හඤ්ච අවිජ්ජම්පි ච - සමථෙන විපස්සනාය යො නෙති,
සච්චෙහි යොජයිත්වා - අයං නයො නන්දියාවට්ටො.

18. යො අකුසලෙ සමූලෙහි - නෙති කුසලෙ ච කුසලමූලෙහි,
භූතං තථං අවිතථං - තිපුක්ඛලං තං නයං ආහු.

19. යො නෙති විපල්ලාසෙහි - කිලෙසෙ ඉන්ද්රියෙහි සද්ධම්මෙ,
එතං නයං නයවිදූ - සීහවික්කීළිතං ආහු.

20. වෙය්යාකරණෙසු හි යෙ - කුසලාකුසලා තහිං තහිං වුත්තා,
මනසා වොලොකයතෙ - තං ඛු දිසාලොචනං ආහු.