9-1 යස්මිං කාමා න වසන්ති (ඉච්චායස්මා තොදෙය්යො)
තණ්හා යස්ස න විජ්ජති
කථංකථා ච යො තිණ්ණො
විමොක්ඛො තස්ස කීදිසො.

9-2 යස්මිං කාමා න වසන්ති (තොදෙය්යාති භගවා)
තණ්හා යස්ස න විජ්ජති
කථංකථා ච යො තිණ්ණො
විමොක්ඛො තස්ස නාපරො.

9-3 නිරාසසො සො උද ආසසානො (ඉච්චායස්මා තොදෙය්යො)
පඤ්ඤාණ වා සො උද පඤ්ඤකප්පී
මුනිං අහං සක්ක යථා විජඤ්ඤං
තං මෙ වියාචික්ඛ සමන්තචක්ඛු.

9-4 නිරාසාසො සො න සො ආසසානො
පඤ්ඤාණවා සො න ච පඤ්ඤකප්පී
එවම්පි තොදෙය්ය මුනිං විජාන
අකිඤ්චනං කාමභවෙ අසත්තන්ති.

10-1 මජ්ඣෙ සරස්මිං තිට්ඨතං (ඉච්චායස්මා කප්පො)
ඔඝෙ ජාතෙ මහබ්භයෙ
ජරාමච්චුපරෙතානං
දීපං පබ්රූහි මාරිස
ත්වං ච මෙ දීපමක්ඛාහි
යථයිදං නාපරං සියා.

10-2 මජ්ඣෙ සරස්මිං තිට්ඨිතං (කප්පාති භගවා)
ඔඝෙ ජාතෙ මහබ්භයෙ
ජරාමච්චුපරෙතානං
දීපං පබ්රූමි කප්ප තෙ.

10-3 අකිඤ්චනං අනාදානං
එතං දීපං අනාපරං
නිබ්බානං ඉති නං බ්රූමි
ජරාමච්චුපරික්ඛයං.

10-4 එත දඤ්ඤාය යෙ සතා
දිට්ඨධම්මාභිනිබ්බුතා
න තෙ මාරවසානුගා
න තෙ මාරස්ස පද්ධගූති.

11-1 සුත්වාන’හං වීරමකාමකාමිං (ඉච්චායස්මා ජතුකණ්ණී)
ඔඝාතිගං පුට්ඨුමකාමමාගමං
සන්තිපදං බ්රූහි සහජනෙත්ත
යථාතච්ඡං භගවා බ්රූහි මෙතං,

11-2 භගවා හි කාමෙ අභිභුය්ය ඉරීයති
ආදිච්චොව පඨවිං තෙජී තෙජසා
පරිත්තපඤ්ඤස්ස මෙ භූරිපඤ්ඤ
ආචික්ඛ ධම්මං යමහං විජඤ්ඤං
ජාතිජරාය ඉධ විප්පහානං.

11-3 කාමෙසු විනය ගෙධං (ජතුකණ්ණීති භගවා)
නෙක්ඛම්මං දට්ඨු ඛෙමතො
උග්ගහිතං නිරත්ථං වා
මා තෙ විජ්ජිත්ථ කිඤ්චනං.