10-1 මජ්ඣෙ සරස්මිං තිට්ඨතං (ඉච්චායස්මා කප්පො)
ඔඝෙ ජාතෙ මහබ්භයෙ
ජරාමච්චුපරෙතානං
දීපං පබ්රූහි මාරිස
ත්වං ච මෙ දීපමක්ඛාහි
යථයිදං නාපරං සියා.

10-2 මජ්ඣෙ සරස්මිං තිට්ඨිතං (කප්පාති භගවා)
ඔඝෙ ජාතෙ මහබ්භයෙ
ජරාමච්චුපරෙතානං
දීපං පබ්රූමි කප්ප තෙ.

10-3 අකිඤ්චනං අනාදානං
එතං දීපං අනාපරං
නිබ්බානං ඉති නං බ්රූමි
ජරාමච්චුපරික්ඛයං.

10-4 එත දඤ්ඤාය යෙ සතා
දිට්ඨධම්මාභිනිබ්බුතා
න තෙ මාරවසානුගා
න තෙ මාරස්ස පද්ධගූති.

11-1 සුත්වාන’හං වීරමකාමකාමිං (ඉච්චායස්මා ජතුකණ්ණී)
ඔඝාතිගං පුට්ඨුමකාමමාගමං
සන්තිපදං බ්රූහි සහජනෙත්ත
යථාතච්ඡං භගවා බ්රූහි මෙතං,

11-2 භගවා හි කාමෙ අභිභුය්ය ඉරීයති
ආදිච්චොව පඨවිං තෙජී තෙජසා
පරිත්තපඤ්ඤස්ස මෙ භූරිපඤ්ඤ
ආචික්ඛ ධම්මං යමහං විජඤ්ඤං
ජාතිජරාය ඉධ විප්පහානං.

11-3 කාමෙසු විනය ගෙධං (ජතුකණ්ණීති භගවා)
නෙක්ඛම්මං දට්ඨු ඛෙමතො
උග්ගහිතං නිරත්ථං වා
මා තෙ විජ්ජිත්ථ කිඤ්චනං.