1. කොසලානං පුරා රම්මා-අගමා දක්ඛිණාපථං
ආකිඤ්චඤ්ඤං පත්ථයානො-බ්රාහ්මණො මන්තපාරගූ.

2. සො අස්සකස්ස විසයෙ-මූලකස්ස සමාසනෙ
වසී ගොදාවරී කූලෙ-උඤ්ඡෙන ච ඵලෙන ච.

3. තස්සෙ ව උපනිස්සාය-ගාමො ච විපුලො අහු
තතො ජාතෙන ආයෙන-මහායඤ්ඤමකප්පයී.

4. මහායඤ්ඤං යජිත්වාන-පුන පාවිසි අස්සමං
තස්මිං පතිපවිට්ඨම්හි-අඤ්ඤො ආගඤ්ඡි බ්රාහ්මණො.

5. උග්ඝට්ටපාදො තසිතො-පඞ්කදන්තො රජස්සිරො
සො ච නං උපසංකම්ම-සතානි පඤ්ච යාචති.

6. තමෙනං බාවරී දිස්වා-ආසනෙන නිමන්තයී
සුඛං ච කුසලං පුච්ඡි-ඉදං වචනමබ්රවී.

7. යං ඛො මමං දෙය්යධම්මං-සබ්බං විස්සජ්ජිතං මයා
අනුජානාහි මෙ බ්රහ්මෙ-නත්ථි පඤ්ච සතානි මෙ.

8. සචෙ මෙ යාචමානස්ස-භවං නානුපදස්සති
සත්තමෙ දිවසෙ තුය්හං-මුද්ධා ඵලතු සත්තධා.

9. අභිසඞ්ඛරිත්වා කුහකො-භෙරවං සො අකිත්තයී
තස්ස තං වචනං සුත්වා-බාවරී දුක්ඛිතො අහු.

10. උස්සුස්සති අනාහාරො-සොකසල්ලසමප්පිතො
අථො’පි එවංචිත්තස්ස-ඣානෙ න රමතී මනො.

11. උත්රස්තං දුක්ඛිතං දිස්වා-දෙවතා අත්ථකාමිනී
බාවරිං උපසඞ්කම්ම-ඉදං වචනමබ්රවී.

12. න සො මුද්ධං පජානාති-කුහකො සො ධනත්ථිකො
මුද්ධනි මුද්ධපාතෙ වා-ඤාණං තස්ස න විජ්ජති.

13. භොතී චරහි ජානාති-තං මෙ අක්ඛාහි පුච්ඡිතා
මුද්ධං මුද්ධාධිපාතං ච-තං සුණොම වචො තව.

14. අහම්පෙතං න ජානාමි-ඤාණං මෙත්ථ න විජ්ජති
මුද්ධං මුද්ධාධිපාතො ච-ජිනානං හෙතදස්සනං.

15. අථ කො චරහි ජානාති-අස්මිං පුථවි මණ්ඩලෙ
මුද්ධං මුද්ධාධිපාතං ච-තං මෙ අක්ඛාහි දෙවතෙ,

16. පුරා කපිලවත්ථුම්හා-නික්ඛන්තො ලොකනායකො
අපච්චො ඔක්කාකරාජස්ස-සක්යපුත්තො පභඞ්කරො.

17. සො හි බ්රාහ්මණ, සම්බුද්ධො-සබ්බධම්මාන පාරගු
සබ්බාභිඤ්ඤාබලප්පත්තො-සබ්බධම්මෙසු චක්ඛුමා
සබ්බකම්මක්ඛයං පත්තො-විමුත්තො උපධිසඞ්ඛයෙ.

18. බුද්ධො සො භගවා ලොකෙ-ධම්මං දෙසෙති චක්ඛුමා
තං ත්වං ගන්ත්වාන පුච්ඡස්සු-සො තෙ තං ව්යාකරිස්සති.

19. සම්බුද්ධොති වචො සුත්වා-උදග්ගො බාවරී අහු
සොකස්ස තනුකො ආසි-පීතිඤ්ච විපුලං ලභි.