1281. සුතං මෙතං මහාබ්රහ්මෙ කාමෙ භුඤ්ජති හාරිතො,
කච්චෙතං වචනං තුච්ඡං කච්චි සුද්ධො ඉරිය්යසි.

1282. එවමෙතං මහාරාජ යථා තෙ වචනං සුතං,
කුම්මග්ගෙ පටිපන්නොස්මි මොහනෙය්යෙසු මුච්ඡිතො.

1283. ආදු පඤ්ඤා කිමත්ථියා නිපුණා සාධු චින්තනී,
යාය උප්පතිතං රාගං කිං මනො න විනොදයෙ.

1284. චත්තාරො මෙ මහාරාජ ලොකෙ අතිබලා භුසා,
රාගො දොසො මදො මොහො යත්ථ පඤ්ඤා න ගාධතී.

1285. අරහං සීලසම්පන්නො සුද්ධො චරති හාරිතො,
මෙධාවී පණ්ඩිතො චෙව ඉති නො සම්මතො භවං

1286. මෙධාවිනම්පි හිංසන්ති ඉසිං ධම්මගුණෙ රතං,
විතක්කා පාපකා රාජ සුභා රාගූපසංහිතා.

1287. උප්පන්නායං සරීරජො
රාගො වණ්ණවිදුසනො තවං,
තං පජහ භද්දමත්ථු තෙ
බහුන්නාසි මෙධාවීසම්මතො.

1288. තෙ අන්ධකරණෙ කාමෙ බහුදුක්ඛෙ මහාවිසෙ,
තෙසං මූලං ගවෙසිස්සං ඡෙච්ඡං රාගං සබන්ධනං.

1289. ඉදං වත්වාන හාරිතො ඉසි සච්චපරක්කමො,
කාමරාගං විරාජෙත්වා බ්රහ්මලොකූපගො අහූති.

1290. බහුස්සුතං චිත්තකථිං ගඞ්ගා වහති පාටලං,
වුය්හමානක භද්දන්තෙ එකං මෙ දෙහි ගාථකං.

1291. යෙන සිඤ්චන්ති දුක්ඛිතං යෙන සිඤ්චන්ති ආතුරං,
තස්ස මජ්ඣෙ මරිස්සාමි ජාතං සරණතො භයං.

1292. යත්ථ බීජානි රූහන්ති සත්තා යත්ථ පතිට්ඨිතා,
සා මෙ සීසං නිපීළෙති ජාතං සරණතො භයං.

1293. යෙන භත්තානි පච්චන්ති සීතං යෙන විහඤ්ඤති,
සො මං ඩහති ගත්තානි ජාතං සරණතො භයං.

1294. යෙන භුත්තෙන යාපෙන්ති පුථු බ්රාහ්මණඛත්තියා,
සො මං භුත්තො වියාපාදි ජාතං සරණතො භයං.

1295. ගිම්හානං පච්ඡිමෙ මාසෙ වාතමිච්ඡන්ති පණ්ඩිතා,
සො මෙ භඤ්ජති ගත්තානි ජාතං සරණතො භයං.

1296. යං නිස්සිතා ජහති රුහං විහඞ්ගමා සොයං අග්ගිං පමුඤ්චති,
දිසා භජථ වක්කඞ්ගා ජාතං සරණතො භයං.

1297. යමානයිං සොමනස්සං මාලිනිං වන්දනුස්සදං,
සා මං ඝරා නීහරති ජාතං සරණතො භයං.

1298. යෙන ජාතෙන නන්දිස්සං යස්ස ච භවමිච්ඡිසං,
සො මං ඝරා නිච්ඡුහති ජාතං සරණතො භයං.

1299. සුණන්තු මෙ ජානපදා නෙගමා ච සමාගතා,
යතොදකං තදාදිත්තං යතො ඛෙමං තතො භයං.

1300. රාජා විලුම්පතෙ රට්ඨං බ්රාහ්මණො ච පුරොහිතො,
අත්තගුත්තා විහරථ ජාතං සරණතො භයන්ති.