1242. පරිසඞ්කුපථො නාම ගිජ්ඣපන්ථො සනන්තනො,
තත්රාසි මාතාපිතරො ගිජ්ඣො පොසෙසි ජිණ්ණකෙ.

1243. තෙසං අජගරං මෙදං අච්චහාසි පහූතසො,
පිතා ච පුත්තං අවච ජානං උච්චංපපාතිනං
සුපත්තං පක්ඛසම්පන්නං තෙජස්සිං දූරගාමිනං.

1244. පරිප්ලවන්තං පඨවිං යදා තාත විජානහි,
සාගරෙන පරික්ඛිත්තං චක්කංව පරිමණ්ඩලං.
තතො තාත නිවත්තස්සු මාස්සු එත්තො පරං ගමී.

1245. උද්ධං පත්තොස වෙගෙන බලී පක්ඛී දිජුත්තමො,
ඔලොකයන්තො වක්කඞ්ගො පබ්බතානි වනානි ච.

1246. අද්දසා පඨවිං ගිජ්ඣො යථා සාසි පිතුස්සුතං,
සාගරෙන පරික්ඛිත්තං චක්කංව පරිමණ්ඩලං.

1247. තඤ්ච සො සමතික්කම්ම පරමෙව පවත්තථ,
තඤ්ච වාතසිඛා තික්ඛා අච්චහාසි බලිං දිජං.

1248. නාසක්ඛාතිගතො පොසො පුනරෙව නිවත්තිතුං,
දිජො ව්යසනමාපාදි වෙරම්බානං වසං ගතො.

1249. තස්ස පුත්තා ච දාරා ච යෙ චඤ්ඤෙ අනුජීවිනො,
සබ්බෙ ව්යසනමාපාදුං අනොවාදකරෙ දිජෙ.

1250. එවම්පි ඉධ වද්ධානං යො වාක්යං නාවබුජ්ඣති,
අතීසීමචරො දිත්තො ගිජ්ඣොවාතීතසාසනො
ස චෙ ව්යසනං පප්පොති අකත්වා වුද්ධසාසනන්ති.

1251. පුථුසද්දො සමජනො න බාලො කොචි මඤ්ඤථ,
සඞ්ඝස්මිං භිජ්ජමානස්මිං නාඤ්ඤං භිය්යො අමඤ්ඤරුං.

1252. පරිමුට්ඨා පණ්ඩිතාභාසා වාචා ගොචරභාණිනො,
යාවිච්ඡන්ති මුඛායාමං යෙන නීතා න තං විදූ.

1253. අක්කොච්ඡි මං අවධි මං අජිනි මං අහාසි මෙ,
යෙ තං උපනය්හන්ති වෙරං තෙසං න සම්මති.

1254. අක්කොච්ඡි මං අවධි මං අජිනි මං අහාසි මෙ,
යෙ තං න උපනය්හන්ති වෙරං තෙසූපසම්මති.

1255. නහි වෙරෙන වෙරානි සම්මන්තීධ කුදාචනං.
අවෙරෙන ච සම්මන්ති එසධම්මො සනන්තනො.

1256. පරෙ ච න විජානන්ති මයමෙත්ථ යමාමසෙ,
යෙ ච තත්ථ විජානන්ති තතො තතො සම්මන්ති මෙධගා.

1257. අට්ඨිච්ඡින්නා පාණහාරා ගවාස්ස ධනහාරිනො,
රට්ඨං විලුම්පමානානං තෙසම්පි හොති සඞ්ගති
කස්මා තුම්හාක නො සියා.

1258. සචෙ ලභෙථ නිපකං සහායං
සද්ධිං චරං සාධු විහාරි ධීරං,
අභිභුය්ය සබ්බානි පරිස්සයානි
චරෙය්ය තෙනත්තමනො සතීමා.

1259. නො චෙ ලභෙථ නිපකං සහායං
සද්ධිං චරං සාධු විහාරි ධීරං,
රාජාව රට්ඨං විජිතං පහාය
එකො චරෙ මාතඞ්ගරඤ්ඤෙව නාගො.

1260. එකස්ස චරිතං සෙය්යො
නත්ථි බාලෙ සහායතා,
එකො චරෙ නව පාපානි කයිරා
අප්පොස්සුක්කො මාතඞ්ගරඤ්ඤෙව නාගොති.