1091. යො මං පුරෙ පච්චුදෙති අරඤ්ඤෙ දූරමායති,
සො න දිස්සති මාතඞ්ගො සොමදත්තො කුහිං ගතො.

1092. අයං වා සො මතො සෙති අල්ලපිඞ්කංව ඡිජ්ජිතො,
භුම්යා නිපතිතො සෙති අමරා වත කුඤ්ජරො.

1093. අනගාරියුපෙතස්ස විප්පමුත්තස්ස චෙතසො,
සමණස්ස න තං සාධු යං පෙතමනුසොචසි.

1094. සංවාසෙන භවෙ සක්ක මනුස්සස්ස මිගස්ස වා,
හදයෙ ජායති පෙමං තං න සක්කා අසොවිතුං.

1095. මතං මරිස්සං රොදන්ති යෙ රුදන්ති ලපන්ති ච,
තස්මා ත්වං ඉසි මාරොදි රොදිතං මොඝමාසු සන්තො.

1096. කන්දිතෙන හවෙ බ්රහ්මෙ මතො පෙතො සමුට්ඨහෙ,
සබ්බෙ සඞ්ගම්ම රොදාමි අඤ්ඤමඤ්ඤස්ස ඤාතකෙ.

1097. ආදිත්තං වත මං සන්තං ඝතසිත්තංව පාවකං,
වාරිනා විය ඔසිඤ්චං සබ්බං නිබ්බාපයෙ දරං.

1098. අබ්බහී වත මෙ සල්ලං සොකං හදයනිස්සිතං,
යො මෙ සොකපරෙතස්ස පුත්තසොකං අපානුදි.

1099. සොහං අබ්බූළ්හසල්ලොස්මි වීතසොකො අනාවිලො,
න සොචාමි න රොදාමි තව සුත්වාන වාසවා’ති.

1100. කාළානි කෙසානි පුරෙ අහෙසුං
ජාතානි සීසම්භි යථාපදෙසෙ,
තානජ්ජ සෙතානි සුසීම දිස්වා
ධම්මං චර බ්රහ්මචරියස්ස කාලො.

1101. මමෙව දෙව පලිතං න තුය්හං
මමෙව සීසං මම උත්තමඞ්ගං,
අත්ථං කරිස්සන්ති මුසා අභාණිං
එකාපරාධං ඛම රාජසෙට්ඨ.

1102. දහරො තුවං දස්සනීයොසි රාජ
පඨමුග්ගතො හොහි යථා කළීරො,
රජ්ජඤ්ච කාරෙහි මමං ච පස්ස
මා කාලිකං අනුධාවී ජිනින්ද.

1103. පස්සාමි වොහං දහරිං කුමාරිං
සාමට්ඨපස්සං සුතනුං සුමජ්ඣං,
කාළාපවාළාව පවෙල්ලමානා
පලොභයන්තීව නරෙසු ගච්ඡති.

1104. තමෙන පස්සාමි පරෙන නාරිං
අසීතිකං නාවුතිකංව ජච්චා,
දණ්ඩං ගහෙත්වාන පවෙධමානං
ගොපාණසීභොග්ගසමං චරන්තිං.

1105. සොහං තමෙවානුවිචින්තයන්තො
එකො සයාමි සයනස්ස මජ්ඣෙ,
අහම්පි එවං ඉති පෙක්ඛමානො
න ගෙහෙ රමෙ බ්රහ්මචරියස්ස කාලො.

1106. රජ්ජුවාලම්බනී චෙසා යා ගෙහෙ වසතො රති,
එතම්පි ඡෙත්වාන වජන්ති ධීරා
අනපෙක්ඛිනො කාමසුඛං පහායා’ති.