1100. කාළානි කෙසානි පුරෙ අහෙසුං
ජාතානි සීසම්භි යථාපදෙසෙ,
තානජ්ජ සෙතානි සුසීම දිස්වා
ධම්මං චර බ්රහ්මචරියස්ස කාලො.

1101. මමෙව දෙව පලිතං න තුය්හං
මමෙව සීසං මම උත්තමඞ්ගං,
අත්ථං කරිස්සන්ති මුසා අභාණිං
එකාපරාධං ඛම රාජසෙට්ඨ.

1102. දහරො තුවං දස්සනීයොසි රාජ
පඨමුග්ගතො හොහි යථා කළීරො,
රජ්ජඤ්ච කාරෙහි මමං ච පස්ස
මා කාලිකං අනුධාවී ජිනින්ද.

1103. පස්සාමි වොහං දහරිං කුමාරිං
සාමට්ඨපස්සං සුතනුං සුමජ්ඣං,
කාළාපවාළාව පවෙල්ලමානා
පලොභයන්තීව නරෙසු ගච්ඡති.

1104. තමෙන පස්සාමි පරෙන නාරිං
අසීතිකං නාවුතිකංව ජච්චා,
දණ්ඩං ගහෙත්වාන පවෙධමානං
ගොපාණසීභොග්ගසමං චරන්තිං.

1105. සොහං තමෙවානුවිචින්තයන්තො
එකො සයාමි සයනස්ස මජ්ඣෙ,
අහම්පි එවං ඉති පෙක්ඛමානො
න ගෙහෙ රමෙ බ්රහ්මචරියස්ස කාලො.

1106. රජ්ජුවාලම්බනී චෙසා යා ගෙහෙ වසතො රති,
එතම්පි ඡෙත්වාන වජන්ති ධීරා
අනපෙක්ඛිනො කාමසුඛං පහායා’ති.

1107. අහං දසසතං ව්යාමං උරගමාදාය මාගතො,
තඤ්ච මඤ්ච මහාකායං ධාරයං නප්පවෙධසි.

1108. අථ ඉමං ඛුද්දකං පක්ඛිං අප්පමංසතරං මයා,
ධාරයං ව්යාධසෙ භීතො කමත්ථං කොටිසිම්බලි.

1109. මංසභක්ඛො තුවං රාජ බලභක්ඛො අයං දිජො,
අයං නිග්රොධ බීජානි පිලක්ඛදුම්බරානි ච
අස්සත්ථානි ච භක්ඛෙත්වා ඛන්ධෙ මෙ ඔදහිස්සති.

1110. තෙ රුක්ඛා සංවිරූහන්ති මම පස්සෙ නිවාතජා,
තෙ පරියොනන්ධිස්සන්ති අරුක්ඛං මං කරිස්සරෙ.

1111. සන්ති අඤ්ඤෙපි රුක්ඛාසෙ මූලිනො ඛන්ධිනො දුමා,
ඉමිනා සකුණජාතෙන බීජමාහරිත්වා හතා.

1112. අජ්ඣාරූළ්හාභිවඩ්ඪන්ති බ්රහන්තම්පි වනස්පතිං,
තස්මා රාජ පවෙධාමි සම්පස්සං නාගතං භයං.

1113. සඞ්කෙය්ය සඞ්කිතබ්බානි රක්ඛෙය්යානාගතං භයං.
අනාගතභයා ධීරො උභො ලොකෙ අවෙක්ඛතීති.

1114. රාජා අපුච්ඡි විධුරං ධම්මකාමො යුධිට්ඨිලො,
අපි බ්රාහ්මණ ජානාසි කො එකො බහු සොචති.

1115. බ්රාහ්මණො අජයූථෙන බහූතෙධො වනෙ වසං,
ධූමං අකාසි වාසෙට්ඨො රත්තින්දිවමතන්දිතො.

1116. තස්ස තං ධූමගන්ධෙන සරභා මකසද්දිතා,
වස්සාවාසං උපගඤ්ඡුං ධූමකාරිස්ස සන්තිකෙ.