1009. තෙ කථන්නු කරිස්සන්ති වුද්ධා ගිරිදරීසයා,
අහං බද්ධොස්මි පාසෙන නීලියස්ස වසං ගතො.

1010. කිං ගිජ්ඣ පරිදෙවසි කානු තෙ පරිදෙවනා,
න මෙ සුතො වා දිට්ඨො වා භාසන්තො මානුසිං දිජො.

1011. භරාමි මාතාපිතරො මුද්ධෙ ගිරිදරීසයෙ,
තෙ කථන්නු කරිස්සන්ති අහං වසං ගතො තව.

1012. යන්නු ගිජ්ඣො යොජනසතං කුණපානි අවෙක්ඛති,
කස්මා ජාලඤ්ච පාසඤ්ච ආසජ්ජාපි න බුජ්ඣසි.

1013. යදා පරාභවො හොති පොසො ජීවිතසඞ්ඛයෙ,
අථ ජාලඤ්ච පාසඤ්ච ආසජ්ජාපි න බුජ්ඣති.

1014. භරස්සු මාතාපිතරො වුද්ධෙ ගිරිදරීසයෙ,
මයා ත්වං සමනුඤ්ඤාතො සොත්ථිං පස්සාහි ඤාතකෙ.

1015. එවං ලුද්දක නන්දස්සු සහසබ්බෙහි ඤාතිභි,
භරිස්සං මාතාපිතරො වුද්ධෙ ගිරිදරීසයෙති.

1016. අනුතීරචාරි භද්දන්තෙ සහායමනුධාව මං,
මහා මෙ ගහිතො මච්ඡො සො මං හරති වෙගසා.

1017. ගම්භීරචාරි භද්දන්තෙ දළ්හං ගණ්හාහි ථාමසා,
අහං තං උද්ධරිස්සාමි සුපණ්ණො උරගම්මිව.

1018. විවාදො නො සමුප්පන්නො දබ්භපුප්ඵ සුණොහි මෙ,
සමෙහි මෙධගං සම්ම විවාදො වූපසම්මතං.

1019. ධම්මට්ඨොහං පුරෙ ආසිං බහු අට්ටං මෙ තීරිතං,
සමෙමි මෙධගං සම්මා විවාදො උපසම්මතු.

1020. අනුතීරචාරි නඞ්ගුට්ඨං සීසං ගම්භීරචාරිනො,
අථායං මජ්ඣිමො ඛණ්ඩො ධම්මට්ඨස්ස භවිස්සති.

1021. චිරම්පි භක්ඛො අභවිස්ස සචෙ න විවදෙමසෙ,
අසීසකං අනඞ්ගුට්ඨං සිගාලො හරති රොහති.

1022. යථාපි රාජා නන්දෙය්ය රජ්ජං ලද්ධාන ඛත්තියො,
එවාහමජ්ජ නන්දාමි දිස්වා පුණ්ණමුඛං පතිං.

1023. කථන්නු ථලජො සන්තො උදකෙ මච්ඡං පරාමසි,
පුට්ඨො මෙ සම්ම අක්ඛාහි කථං අධිගතං තයා.

1024. විවාදෙන කිසා හොන්ති විවාදෙන ධනක්ඛයා,
ජීනා උද්දා විවාදෙන භුඤ්ජ මායාවි රොහිතං.

1025. එවමෙවං මනුස්සෙසු විවාදො යත්ථ ජායති,
ධම්මට්ඨං පටිධාවන්ති සො හි නෙසං විනායකො
ධනාපි තත්ථ ජීයන්ති රාජකොසො පවඩ්ඪතී’ති.