1016. අනුතීරචාරි භද්දන්තෙ සහායමනුධාව මං,
මහා මෙ ගහිතො මච්ඡො සො මං හරති වෙගසා.

1017. ගම්භීරචාරි භද්දන්තෙ දළ්හං ගණ්හාහි ථාමසා,
අහං තං උද්ධරිස්සාමි සුපණ්ණො උරගම්මිව.

1018. විවාදො නො සමුප්පන්නො දබ්භපුප්ඵ සුණොහි මෙ,
සමෙහි මෙධගං සම්ම විවාදො වූපසම්මතං.

1019. ධම්මට්ඨොහං පුරෙ ආසිං බහු අට්ටං මෙ තීරිතං,
සමෙමි මෙධගං සම්මා විවාදො උපසම්මතු.

1020. අනුතීරචාරි නඞ්ගුට්ඨං සීසං ගම්භීරචාරිනො,
අථායං මජ්ඣිමො ඛණ්ඩො ධම්මට්ඨස්ස භවිස්සති.

1021. චිරම්පි භක්ඛො අභවිස්ස සචෙ න විවදෙමසෙ,
අසීසකං අනඞ්ගුට්ඨං සිගාලො හරති රොහති.

1022. යථාපි රාජා නන්දෙය්ය රජ්ජං ලද්ධාන ඛත්තියො,
එවාහමජ්ජ නන්දාමි දිස්වා පුණ්ණමුඛං පතිං.

1023. කථන්නු ථලජො සන්තො උදකෙ මච්ඡං පරාමසි,
පුට්ඨො මෙ සම්ම අක්ඛාහි කථං අධිගතං තයා.

1024. විවාදෙන කිසා හොන්ති විවාදෙන ධනක්ඛයා,
ජීනා උද්දා විවාදෙන භුඤ්ජ මායාවි රොහිතං.

1025. එවමෙවං මනුස්සෙසු විවාදො යත්ථ ජායති,
ධම්මට්ඨං පටිධාවන්ති සො හි නෙසං විනායකො
ධනාපි තත්ථ ජීයන්ති රාජකොසො පවඩ්ඪතී’ති.

1026. දසණ්ණකං තිඛිණධාරං අසිං සම්පන්නපායිනං,
පරිසායං පුරිසො ගලති කිං දුක්කරතං තතො
යදඤ්ඤං දුක්කරං ඨානං තං මෙ අක්ඛාහි පුච්ඡිතො.

1027. ගිලෙය්ය පුරිසො ලොභා අසිං සම්පන්නපායිනං,
යො ච වජ්ජා දදාමිති තං දුක්කරතරං තතො
සබ්බඤ්ඤං සුකරං ඨානං එවං ජානාහි මාගධ.

1028. ව්යාකාසි ආයුරො පඤ්හං අත්ථධම්මස්ස කොවිදො,
පුක්කුසං දානි පුච්ඡාමි කිං දුක්කරතරං තතො;
යදඤ්ඤං දුක්කරං ඨානං තං මෙ අක්ඛාහි පුච්ඡිතො.

1029. න වාචමුපජීවන්ති අඵලං ගිරමුදීරිතං,
යො ච දත්වා අවාකයිරා තං දුක්කරතරං තතො;
සබ්බඤ්ඤං සුකරං ඨානං එවං ජානාහි මාගධ.

1030. ව්යාකාසි පුක්කුසො පඤ්හං අත්ථං ධම්මස්ස කොවිදො,
සෙනකන්දානි පුච්ඡාමි කිං දුක්කරතරං තතො;
යදඤ්ඤං දුක්කරං ඨානං තං මෙ අක්ඛාහි පුච්ඡිතො.

1031. දදෙය්ය පුරිසො දානං අප්පං වා යදි වා බහුං,
යො ච දත්වා නානුතපෙ තං දුක්කරතරං තතො;
සබ්බඤ්ඤං සුකරං ඨානං එවං ජානාහි මාගධ.

1032. ව්යාකාසි ආයුරො පඤ්හං අථො පුක්කුසපොරිසො,
සබ්බෙ පඤ්හෙ අභිභොති යථා භාසති සෙනකො’ති.

1033. විබ්භන්තචිත්තො කුපිතින්ද්රියොසි
නෙත්තෙහි තෙ වාරිගණා සවන්ති,
කිං තෙ නට්ඨං කිං පන පත්ථයානො
ඉධාගමා බ්රාහ්මණ ඉඞ්ඝ බ්රූහි.