963. යමෙතං වාරිජං පුප්ඵං අදින්නං උපසිඞ්ඝසි,
එකඞ්ගමෙතං ථෙය්යානං ගන්ධත්ථෙනොසි මාරිස.

964. න හරාමි න භඤ්ජාමි ආරා සඞ්ඝාමි වාරිජං,
අථ කෙන නු වණ්ණෙන ගන්ධත්ථෙනොති වුච්චති.

965. යොයං භිසානි ඛණති පුණ්ඩරීකානි භඤ්ජති,
එවං ආකිණ්ණකම්මන්තො කස්මා එසො න වුච්චති.

966. ආකිණ්ණලුද්දො පුරිසො ධාතිවෙළංව මක්ඛිතො,
තස්මිං මෙ වචනං නත්ථි තඤ්ච අරහාමි වත්තවෙ.

967. අනඞ්ගණස්ස පොසස්ස නිච්චං සුචිගවෙසිනො,
වාළග්ගමත්තං පාපස්ස අබ්භාමත්තංව ඛායති.

968. අද්ධා මං යක්ඛ ජානාසි අථො මං අනුකම්පසි,
පුනපි යක්ඛ වජ්ජාසි යදා පසස්සි එදිසං.

969. නෙව තං උපජීවාම නපි තෙ හතකම්හසෙ,
ත්වමෙව භික්ඛු ජානෙය්ය යෙන ගච්ඡෙය්ය සුග්ගති’න්ති.

970. සුසුඛං වත ජීවන්ති යෙ ජනා විඝාසාදිනො,
දිට්ඨෙව ධම්මෙ පාසංසා සම්පරායෙ ච සුග්ගති.

971. සුකස්ස භාසමානස්ස න නිසාමෙථ පණ්ඩිතා,
ඉදං සුණාථ සොදරියා අම්හෙ වායං පසංසති.

972. නාහං තුම්හෙ පසංසාමි කුණපාදා සුණාථ මෙ,
උච්ඡිට්ඨභොජිනො තුම්හෙ න තුම්හෙ විඝාසාදිනො.

973. සත්තවස්සා පබ්බජිතා මෙජ්ඣාරඤ්ඤෙ සිඛණ්ඩිනො,
විඝාසෙනෙව යාපෙන්තො මයඤ්චෙ භොතො ගාරය්හා,
කෙනු භොතො පසංසියා.

974. තුම්හෙ සීහානං ව්යග්ඝානං වාළානඤ්චාවසිට්ඨකං,
උච්ඡිට්ඨෙනෙව යාපෙන්තා මඤ්ඤිව්හා විඝාසාදිනො.

975. යෙ බ්රාහ්මණස්ස සමණස්ස අඤ්ඤස්ස ච වණිබ්බිනො,
දත්වාන සෙසං භුඤ්ජන්ති තෙ ජනා විඝාසාදිනො’ති.

976. පණීතං භුඤ්ජසෙ භත්තං සප්පිතෙලඤ්ච මාතුල,
අථ කෙන නු වණ්ණෙන කිසො ත්වමසි වායස.

977. අමිත්තමජ්ඣෙ වසතො තෙසු ආමිසමෙසතො,
නිච්චං උබ්බිග්ගහදයස්ස කුතො කාකස්ස දළ්හියං.

978. නිච්චං උබ්බෙධිනො කාකා ධඞ්කා පාපෙන කම්මුනා,
ලද්ධො පිණ්ඩො න පීණෙති කිසො තෙනස්මි වට්ටක.

979. ලූඛානි තිණබීජානි අප්පසෙන්හානි භුඤ්ජසි,
අථ කෙන නු වණ්ණෙන ථුලො ත්වමසි වට්ටක.

980. අප්පිච්ඡා අප්පචින්තාය අවිදූරගමනෙන ච,
ලද්ධා ලද්ධෙන යාපෙන්තො ථූලො තෙනස්මි වායස.

981. අප්පිච්ඡස්ස හි පොසස්ස අප්පචින්තිසුඛස්ස ච,
සුසඞ්ගහිතමානස්ස වුත්තී සුසමුදානියා’ති.