924. සච්චං කිරෙව මාහංසු භස්තං බාලොති පණ්ඩිතා,
පස්ස බාලො රහොකම්මං ආවිකුබ්බං න බුජ්ඣති,

925. ත්වං නුඛො සම්ම බාලොසි ඛරපුත්ත විජානහි,
රජ්ජුයා හි පරික්ඛිත්තො වඞ්කොට්ඨො ඔහිතො මුඛො.

926. අපරම්පි සම්ම තෙ බාල්යං යො මුත්තො න පලායසි,
සො ච බාලතරො සම්ම යං ත්වං වහසි සෙනකං.

927. යන්නු සම්මා අහං බාලො අජරාජ විජානහි,
අථ කෙන සෙනකො බාලො තං මෙ අක්ඛාහි පුච්ඡිතො

928. උත්තමත්ථං ලභිත්වාන භරියාය යො පදස්සති,
තෙන ජහිස්සතත්තානං සා චෙවස්ස න හෙස්සති.

929. න වෙ පියං මෙති ජනින්ද තාදිසො
අත්තං නිරං කත්වා පියානි සෙවති,
අත්තාව සෙය්යො පරමාව සෙය්යා
ලබ්භා පියා ඔචිතත්ථෙන පච්ඡාති.

930. අකක්කසං අඵරුසං ඛරධොතං සුපාසියං,
සුඛුමං තිඛිණග්ගඤ්ච කො සූචිං කෙතුමිච්ඡති.

931. සුමජ්ජඤ්ච සුපාසඤ්ච අනුපුබ්බං සුවත්තිතං,
ඝනඝාතිමං පටිත්ථද්ධං කො සූචිං කෙතුමිච්ඡති.

932. ඉතොදානි පතායන්ති සූචියො ඛළිසානි ච,
කොයං කම්මාරගාමස්මිං සූචිං වික්කෙතුමිච්ඡති.

933. ඉතො සත්ථානි ගච්ඡන්ති කම්මන්තා විවිධා පුථු,
කොයං කම්මාරගාමස්මිං සූචිං වික්කෙතුමරහති.

934. සූචිං කම්මාරගාමස්මිං වික්කෙතබ්බා පජානතා
ආචරියාව ජානන්ති කම්මං සුකතදුක්කතං.

935. ඉමඤ්ච තෙ පිතා භද්දෙ සූචිං ජඤ්ඤා මයා කතං,
තයා ච මං නිමන්තෙය්ය යඤ්චත්ථඤ්ඤං ඝරෙ ධනන්ති.

936. නවඡන්දකෙදානි දීයති
පුණ්ණායං දොණි සුවාමිනී ඨිතා,
බහුකෙ ජනෙ පාසපාණිකෙ
නො ච ඛො මෙ පටිභාති භුඤ්ජිතුං.

937. තසසි භමසි ගෙණමිච්ඡසි
අත්තාණොසි තුහිං ගමිස්සසි,
අප්පොස්සුක්කො භුඤ්ජ තුණ්ඩිල
මංසත්ථාය හි පොසියාමසෙ.

938. ඔගහ රහදං අකද්දමං
සබ්බං සෙදමලං පවාහය,
ගණ්හාහි නවං විලෙපනං
යස්ස ගන්ධො න කදාචි ඡිජ්ජති.

939. කතමො රහදො අකද්දමො
කිංසු සෙදමලන්ති වුච්චති,
කතමඤ්ච නවං විලෙපනං
තස්ස ගන්ධො න කදාචි ඡිජ්ජති.

940. ධම්මො රහදො අකද්දමො
පාපං සෙදමලන්ති වුච්චති,
සීලඤ්ච නවං විලෙපනං
තස්ස ගන්ධො න කදාචි ඡිජ්ජති.

941. නන්දන්ති සරීරඝාතිනො
න ච නන්දන්ති සරිරධාරිනො,
පුණ්ණාය ච පුණ්ණමාසියා
රමමානාව ජහන්ති ජීවිතන්ති.