950. සකුණො මය්හකො නාම ගිරිසානාදරීචරො
පක්කං පිපඵලිමාරුය්හ මය්හං මය්හන්ති කන්දති.

951. තස්සෙවං විලපන්තස්ස දිජසඞ්ඝා සමාගතා
භුත්වාන පිප්ඵලිං යන්ති විලපිත්වෙව සො දිජො.

952. එවමෙව ඉධෙකච්චො සඞ්ඝරිත්වා බහුං ධනං,
නෙවත්තනො න ඤාතීනං යථොධිං පටිපජ්ජති.

953. න සො අච්ඡාදනං භත්තං න මාලං න විලෙපනං,
අනුභොති සකිං කිඤ්චි න සඞ්ගණ්හාති ඤාතකෙ.

954. තස්සෙවං විලපන්තස්ස මය්හං මය්හන්ති රක්ඛතො,
රාජානො අථවා චොරා දායාදායෙව අප්පියා
ධනමාදාය ගච්ඡන්ති විලපිත්වෙව සො නරො.

955. ධීරො ච භොගෙ අධිගම්ම සඞ්ගණ්හාති ච ඤාතකෙ,
තෙන සො කිත්තිං පප්පොති පෙච්ච සග්ගෙ ච මොදතීති.

956. දුබ්බණ්ණරූපං තුවමරියවණ්ණි
පුරක්ඛත්වා පඤ්ජලිකො නමස්සසි,
සෙය්යො නු තෙ සො උදවා සරික්ඛො
නාමං පරස්සත්තතො චාපි බ්රූහි.

957. න නාමගොත්තං ගණ්හන්ති රාජ
සම්මග්ගතානුජ්ජුගතානදෙවා,
අහඤ්ච තෙ නාමධෙය්යං වදාමි
සක්කොහස්මි තිදසානමින්දො.

958. යො දිස්වා භික්ඛුං චරණූපපන්නං
පුරක්ඛත්වා පඤ්ජලිකො නමස්සති,
පුච්ඡාමි තං දෙවරාජෙතමත්ථං
ඉතො චුතො කිං ලභතෙ සුඛං සො.

959. යො දිස්වා භික්ඛුං චරණූපපන්නං
පුරක්ඛත්වා පඤ්ජලිකො නමස්සති,
දිට්ඨෙව ධම්මෙ ලභතෙ පසංසං
සග්ගඤ්ච සො යාති සරීරභෙදා.

960. ලක්ඛී වත මෙ උදපාදි අජ්ජ
යං වාසවං භූතපතද්දසාම,
භික්ඛුඤ්ච දිස්වාන තවජ්ජ සක්ක
කාහාමි පුඤ්ඤානි අනප්පකානි.

961. අද්ධා හවෙ සෙවිතබ්බා සපඤ්ඤා
බහුස්සුතා යෙ බහුඨානචින්තිනො,
භික්ඛුඤ්ච දිස්වාන මමඤ්ච රාජ
කරොහි පුඤ්ඤානි අනප්පකානි.

962. අක්කොධනො නිච්චපසන්නචිත්තො
සබ්බාතිථියාචයොගො භවිත්වා,
නිහච්චමානං අභිවාදයිස්සං
සුත්වාන දෙවින්ද සුභාසිතානී’ති.

963. යමෙතං වාරිජං පුප්ඵං අදින්නං උපසිඞ්ඝසි,
එකඞ්ගමෙතං ථෙය්යානං ගන්ධත්ථෙනොසි මාරිස.

964. න හරාමි න භඤ්ජාමි ආරා සඞ්ඝාමි වාරිජං,
අථ කෙන නු වණ්ණෙන ගන්ධත්ථෙනොති වුච්චති.

965. යොයං භිසානි ඛණති පුණ්ඩරීකානි භඤ්ජති,
එවං ආකිණ්ණකම්මන්තො කස්මා එසො න වුච්චති.

966. ආකිණ්ණලුද්දො පුරිසො ධාතිවෙළංව මක්ඛිතො,
තස්මිං මෙ වචනං නත්ථි තඤ්ච අරහාමි වත්තවෙ.

967. අනඞ්ගණස්ස පොසස්ස නිච්චං සුචිගවෙසිනො,
වාළග්ගමත්තං පාපස්ස අබ්භාමත්තංව ඛායති.

968. අද්ධා මං යක්ඛ ජානාසි අථො මං අනුකම්පසි,
පුනපි යක්ඛ වජ්ජාසි යදා පසස්සි එදිසං.

969. නෙව තං උපජීවාම නපි තෙ හතකම්හසෙ,
ත්වමෙව භික්ඛු ජානෙය්ය යෙන ගච්ඡෙය්ය සුග්ගති’න්ති.